ദുരിതാശ്വാസ പ്രവർത്തനത്തിന് ഉപയോഗിച്ച ഓഫ് റോഡ് വാഹനത്തിന് പിഴയിട്ടു; MVD ഉദ്യോഗസ്ഥന് സസ്പെൻഷൻ

 

പത്തനംതിട്ട: ദുരിതാശ്വാസ പ്രവർത്തനങ്ങളിൽ പങ്കാളിയായ ഓഫ് റോഡ് വാഹനത്തിന് നിയമലംഘനം ആരോപിച്ച് പിഴ ചുമത്തിയ മോട്ടോർ വാഹന വകുപ്പ് (എംവിഡി) ഉദ്യോഗസ്ഥന് സസ്പെൻഷൻ. സംഭവം വിവാദമാവുകയും പൊതുജന പ്രതിഷേധം ശക്തമാവുകയും ചെയ്തതിനെ തുടർന്നാണ് ഗതാഗത വകുപ്പ് അടിയന്തര നടപടി സ്വീകരിച്ചത്. അടൂർ എംവിഡി സ്ക്വാഡിലെ ഉദ്യോഗസ്ഥനെതിരെയാണ് സസ്പെൻഷൻ ഉത്തരവിറങ്ങിയത്.

​കഴിഞ്ഞ ദിവസങ്ങളിൽ ആറൻമുളയിലെ പ്രളയബാധിത മേഖലകളിൽ രക്ഷാപ്രവർത്തനങ്ങൾക്കും ദുരിതാശ്വാസ സാമഗ്രികൾ എത്തിക്കുന്നതിനും സജീവമായി രംഗത്തുണ്ടായിരുന്ന വാഹനത്തിനാണ് ഉദ്യോഗസ്ഥർ പിഴ ചുമത്തിയത്. ദുരിതാശ്വാസ പ്രവർത്തനങ്ങൾക്കിടെ വാഹനത്തിന് ഉണ്ടായ കേടുപാടുകൾ തീർക്കുന്നതിനായി സ്പെയർപാർട്സുകൾ വാങ്ങാൻ അടൂരിലേക്ക് പോകുന്ന വഴിക്കായിരുന്നു സംഭവം. അടൂർ ബൈപ്പാസിൽ നടന്ന പതിവു വാഹന പരിശോധനയ്ക്കിടെ എംവിഡി സ്ക്വാഡ് വാഹനം തടഞ്ഞുനിർത്തുകയും ഓഫ് റോഡ് രൂപമാറ്റം ആരോപിച്ച് വലിയ തുക പിഴയായി ചുമത്തുകയുമായിരുന്നു.

​ദുരിതാശ്വാസ ആവശ്യത്തിനാണ് വാഹനം ഉപയോഗിച്ചതെന്നും അടിയന്തര അറ്റകുറ്റപ്പണിക്കായി പോവുകയാണെന്നും വാഹന ഉടമ വിശദീകരിച്ചെങ്കിലും ഉദ്യോഗസ്ഥർ കേൾക്കാൻ തയ്യാറായില്ലെന്ന് പരാതിയുണ്ട്. സംഭവം പുറത്തറിഞ്ഞതോടെ എംവിഡി ഉദ്യോഗസ്ഥരുടെ നിലപാടിനെതിരെ പ്രദേശവാസികളിൽ നിന്നും വലിയ പ്രതിഷേധമാണ് ഉയർന്നത്.

​പ്രതിഷേധ സൂചകമായി അബിൻ വർക്കി എംഎൽഎയുടെ നേതൃത്വത്തിൽ യൂത്ത് കോൺഗ്രസ് പ്രവർത്തകർ ജനങ്ങളിൽ നിന്ന് പിഴ തുക പിരിച്ചെടുത്ത് വാഹന ഉടമയ്ക്ക് കൈമാറുകയും തുടർന്ന് തുക അടച്ചുതീർക്കുകയും ചെയ്തിരുന്നു. ദുരന്തമുഖത്ത് സേവനം ചെയ്ത വാഹനത്തോടും അതിന്റെ ഉടമയോടും കാണിച്ച ക്രൂരതയ്‌ക്കെതിരെ ഉയർന്ന ശക്തമായ പ്രതിഷേധത്തെ തുടർന്നാണ് വകുപ്പുതല അന്വേഷണത്തിന് ശേഷം ഉദ്യോഗസ്ഥനെതിരെ ഗതാഗത വകുപ്പ് സസ്പെൻഷൻ നടപടിയെടുത്തത്.