മുതുകാട്ടിൽ വാതിൽ തകർത്ത് അകത്തുകയറി കാട്ടാനകൾ; എസ്റ്റേറ്റിൽ സൂക്ഷിച്ച കുടംപുളി തിന്നും ചവിട്ടിയും നശിപ്പിച്ചു

 

ചക്കിട്ടപാറ: മുതുകാട്ടിലെ പേരാമ്പ്ര എസ്റ്റേറ്റിൽ കാട്ടാനക്കൂട്ടം അതിക്രമിച്ചു കയറി സംഭരിച്ചു വെച്ചിരുന്ന ടൺ കണക്കിന് കുടംപുളി നശിപ്പിച്ചു. എസ്റ്റേറ്റ് കെട്ടിടത്തിന്റെ വാതിൽ തകർത്ത് അകത്തുകടന്ന കാട്ടാനകൾ സൂക്ഷിച്ചുവെച്ചിരുന്ന ആറ് ചാക്കോളം കുടംപുളിയാണ് തിന്നും ചവിട്ടിയരച്ചും നശിപ്പിച്ചത്.

​കഴിഞ്ഞ ദിവസം രാത്രിയിലാണ് വനമേഖലയോട് ചേർന്നുകിടക്കുന്ന എസ്റ്റേറ്റിലേക്ക് ഇറങ്ങിയ കാട്ടാനകൾ വ്യാപകമായ നാശനഷ്ടം വരുത്തിയത്. കെട്ടിടത്തിനുള്ളിൽ സൂക്ഷിച്ചിരുന്ന പുളി പൂർണ്ണമായും ഉപയോഗശൂന്യമായ നിലയിലാണ്. കാട്ടാന ശല്യം രൂക്ഷമായതോടെ തൊഴിലാളികളും പ്രദേശവാസികളും കടുത്ത ഭീതിയിലാണ് കഴിയുന്നത്.

​വനമേഖലയിൽ നിന്ന് ജനവാസ കേന്ദ്രങ്ങളിലേക്കും കൃഷിയിടങ്ങളിലേക്കും കാട്ടാനകൾ ഇറങ്ങുന്നത് പതിവായിട്ടും വനംവകുപ്പിന്റെ ഭാഗത്തുനിന്ന് കാര്യക്ഷമമായ നടപടികളുണ്ടാകുന്നില്ലെന്നാണ് നാട്ടുകാരുടെ പരാതി. സംഭവത്തിൽ അടിയന്തരമായി ഇടപെട്ട് നഷ്ടപരിഹാരം നൽകണമെന്നും കാട്ടാന ശല്യത്തിന് ശാശ്വത പരിഹാരം കാണണമെന്നും എസ്റ്റേറ്റ് അധികൃതരും തൊഴിലാളികളും ആവശ്യപ്പെട്ടു.