വിദ്യാർത്ഥികളുടെയും സഹപ്രവർത്തകരുടെയും കണ്ണുമുന്നിൽ ദാരുണാന്ത്യം; അധ്യാപികയെ കുത്തിക്കൊലപ്പെടുത്തിയ യുവാവ് പിടിയിൽ

 

ഫരീദാബാദ്: വിദ്യാർത്ഥികളുടെയും സഹപ്രവർത്തകരുടെയും മുന്നിൽ വെച്ച് യുവ അധ്യാപികയെ യുവാവ് അതിക്രൂരമായി കുത്തിക്കൊലപ്പെടുത്തി. ഫരീദാബാദിലെ സിക്കോണയിലുള്ള സരസ്വതി സീനിയർ സെക്കൻഡറി സ്കൂളിലാണ് നാടിനെ ഒന്നാകെ നടുക്കിയ ഈ ദാരുണ സംഭവം അരങ്ങേറിയത്. ഇവിടെ ക്ലാസെടുക്കുകയായിരുന്ന ഇരുപത്തിയാറുകാരിയായ ഇംഗ്ലീഷ് അധ്യാപിക സന്ധ്യയാണ് കൊല്ലപ്പെട്ടത്. സംഭവത്തിൽ കോട്ട് വില്ലേജ് സ്വദേശിയായ അമിത് (21) എന്നയാളെ പോലീസ് മണിക്കൂറുകൾക്കകം അറസ്റ്റ് ചെയ്തു.

​ചൊവ്വാഴ്ച രാവിലെ ഒമ്പതരയോടെയാണ് മുഖം മറച്ചെത്തിയ പ്രതി സ്കൂളിലെത്തിയത്. സന്ധ്യയുടെ ഭർത്താവ് വികാസിന്റെ പേര് ഉപയോഗിച്ച്, 'വിക്കിയാണ് വിളിക്കുന്നത്' എന്ന് തെറ്റിദ്ധരിപ്പിച്ചാണ് ഇയാൾ അധ്യാപികയെ ക്ലാസ് മുറിയിൽ നിന്നും പുറത്തേക്ക് വിളിച്ചിറക്കിയത്. പുറത്തിറങ്ങിയ ഉടനെ സന്ധ്യയെ ബലം പ്രയോഗിച്ച് ഇടനാഴിയിലേക്ക് വലിച്ചിഴച്ച പ്രതി, കൈയിൽ കരുതിയിരുന്ന കത്തി ഉപയോഗിച്ച് കഴുത്തിലും വയറിലും തുരുതുരെ കുത്തുകയായിരുന്നു. വെറും പതിമൂന്ന് സെക്കൻഡിനുള്ളിൽ ഇരുപതിലധികം തവണ പ്രതി അധ്യാപികയെ കുത്തിയതായി സിസിടിവി ദൃശ്യങ്ങളിൽ വ്യക്തമാണ്. സന്ധ്യയുടെ നിലവിളി കേട്ട് ഓടിയെത്തിയ സ്കൂൾ പ്രിൻസിപ്പൽ തേജ്പാലിനെയും ഇയാൾ കത്തി കാണിച്ച് ഭീഷണിപ്പെടുത്തി.

​ഗുരുതരമായി പരിക്കേറ്റ് രക്തം വാർന്ന് കിടന്ന സന്ധ്യയെ ഉടൻ തന്നെ സമീപത്തെ അൽ-ഫലാ മെഡിക്കൽ കോളേജിലേക്ക് കൊണ്ടുപോയെങ്കിലും വഴിമധ്യേ മരണം സംഭവിച്ചു. കൃത്യം നടപ്പാക്കിയ ശേഷം കടന്നുകളയാൻ ശ്രമിച്ച പ്രതിയെ സ്കൂളിലെ ക്യാമറ ദൃശ്യങ്ങളുടെ സഹായത്തോടെ പോലീസ് തിരിച്ചറിഞ്ഞു. തുടർന്ന് ആന്റി വെഹിക്കിൾ തെഫ്റ്റ് സ്ക്വാഡിന്റെയും സിക്കോണ പോലീസിന്റെയും നേതൃത്വത്തിൽ നടത്തിയ ഊർജ്ജിതമായ തിരച്ചിലിൽ രണ്ടു മണിക്കൂറിനുള്ളിൽ അമിതിനെ കസ്റ്റഡിയിലെടുത്തു.

​കഴിഞ്ഞ രണ്ടു വർഷത്തോളമായി അമിത് സന്ധ്യയെ പിന്തുടർന്ന് ശല്യം ചെയ്തുവരികയായിരുന്നുവെന്ന് പോലീസ് അന്വേഷണത്തിൽ വ്യക്തമായി. സന്ധ്യ മുൻപ് പഠിപ്പിച്ചിരുന്ന സ്കൂളിൽ വെച്ചാണ് ഇരുവരും പരിചയപ്പെട്ടതെന്ന് പോലീസ് വക്താവ് യശ്പാൽ യാദവ് അറിയിച്ചു. എന്നാൽ അടുത്തകാലത്തായി അമിത്തുമായുള്ള സംസാരം പൂർണ്ണമായും അവസാനിപ്പിച്ച സന്ധ്യ, ശല്യം തുടർന്നാൽ പോലീസിൽ പരാതി നൽകുമെന്ന് കർശന മുന്നറിയിപ്പ് നൽകിയിരുന്നു. ഇതിലുള്ള വൈരാഗ്യമാണ് കൊലപാതകത്തിലേക്ക് നയിച്ചത്. കൊലപാതകത്തിനായി ഉപയോഗിച്ച കത്തി രണ്ടു മാസം മുൻപ് തന്നെ വാങ്ങിയതാണെന്നും അന്നുമുതൽ കൊലപാതകം ആസൂത്രണം ചെയ്തിരുന്നുവെന്നും ചോദ്യം ചെയ്യലിൽ പ്രതി സമ്മതിച്ചു. പോസ്റ്റ്മോർട്ടം നടപടികൾക്ക് ശേഷം മൃതദേഹം ബന്ധുക്കൾക്ക് വിട്ടുനൽകും.