കൂരാച്ചുണ്ട് - ചക്കിട്ടപ്പാറ മേഖലയിൽ ; ​ഓണ നാളിൽ തുടങ്ങി മോഷണ പരമ്പര; ഒരേ സംഘമെന്ന് സംശയം,

 

ചക്കിട്ടപ്പാറ/കൂരാച്ചുണ്ട്: മേഖലയിലെ വിവിധ ദേവാലയങ്ങളെയും തീർത്ഥാടന കേന്ദ്രങ്ങളെയും കേന്ദ്രീകരിച്ച് നേർച്ചപ്പെട്ടികൾ കുത്തിത്തുറന്നുള്ള മോഷണം പെരുകുന്നു. ചുരുങ്ങിയ ദിവസങ്ങൾക്കുള്ളിൽ മൂന്നിലധികം സ്ഥലങ്ങളിൽ മോഷണം നടന്നതോടെ പ്രദേശത്ത് വൻ പ്രതിഷേധവും ആശങ്കയും പുകയുകയാണ്.

​തിരുവോണ നാളിലാണ് മോഷണ പരമ്പരയ്ക്ക് തുടക്കമായത്. നരിനട സെന്റ് അൽഫോൻസാ ദേവാലയത്തിന് സമീപമുള്ള നേർച്ചപ്പെട്ടി കുത്തിത്തുറന്ന് ഉള്ളിലുണ്ടായിരുന്ന തുക മുഴുവൻ കവരുകയായിരുന്നു. ഈ സംഭവത്തിന്റെ ആഘാതം മാറും മുൻപാണ് തൊട്ടടുത്ത ദിവസങ്ങളിൽ കരികണ്ടൻപാറ ഊളേരി കുരിശു പള്ളിയുടെ നേർച്ചപ്പെട്ടി സമാന രീതിയിൽ തകർത്തത്.

​ഏറ്റവും ഒടുവിലായി ഇന്നലെ രാത്രിയിലാണ് മലബാറിലെ പ്രശസ്തമായ കുളത്തുവയൽ സെന്റ് ജോർജ് തീർത്ഥാടന കേന്ദ്രത്തിലും കവർച്ച നടന്നത്. പള്ളിമുറ്റത്തെ വിശുദ്ധ ഗീവർഗീസ് സഹദായുടെ ഗ്രോട്ടോയ്ക്ക് സമീപമുള്ള നേർച്ചപ്പെട്ടി പൂട്ട് തകർത്ത് പണം കവർന്നു.

​സംശയമുനയിൽ ലഹരിസംഘങ്ങളും പ്രൊഫഷണൽ മോഷ്ടാക്കളും

​തുടർച്ചയായുണ്ടാകുന്ന മോഷണങ്ങൾക്ക് പിന്നിൽ ഒരേ സംഘം തന്നെയാണെന്നാണ് പോലീസിന്റെ പ്രാഥമിക നിഗമനം. പുലർച്ചെയോടെ ആരും കാണാത്ത സമയങ്ങളിൽ പൂട്ട് പൊളിക്കാനുള്ള ആധുനിക ഉപകരണങ്ങളുമായാണ് മോഷ്ടാക്കൾ എത്തുന്നതെന്ന് കരുതപ്പെടുന്നു. രാത്രികാലങ്ങളിൽ കേന്ദ്രീകരിക്കുന്ന ലഹരി ഉപയോഗിക്കുന്ന സംഘങ്ങൾക്ക് ഇതിൽ പങ്കുണ്ടോയെന്നും പോലീസ് പരിശോധിക്കുന്നുണ്ട്.

​അന്വേഷണം ഊർജ്ജിതമാക്കി പോലീസ്

​തുടർച്ചയായ മൂന്ന് കവർച്ചകളിലും കൂരാച്ചുണ്ട്, പെരുവണ്ണാമൂഴി പോലീസ് സ്റ്റേഷനുകളിൽ പള്ളി അധികൃതർ പരാതി നൽകിയിട്ടുണ്ട്. ദേവാലയങ്ങളിലെയും പരിസരങ്ങളിലെയും പ്രധാന റോഡുകളിലെയും സിസിടിവി ദൃശ്യങ്ങൾ കേന്ദ്രീകരിച്ചാണ് നിലവിൽ അന്വേഷണം പുരോഗമിക്കുന്നത്.

​രാത്രികാല പട്രോളിംഗ് ശക്തമാക്കണമെന്നും മോഷ്ടാക്കളെ എത്രയും വേഗം വലയിലാക്കി നാട്ടുകാരുടെ ഭീതി അകറ്റണമെന്നും ഇടവക ജനങ്ങളും നാട്ടുകാരും ശക്തമായി ആവശ്യപ്പെട്ടു.