അച്ഛാ അവരെന്നെ കൊല്ലും... എന്റെ കുഞ്ഞിനെയെങ്കിലും രക്ഷിക്കൂ...! നിലവിളിച്ച് പെൺകുട്ടി, തിരിഞ്ഞുനോക്കാതെ ഡോക്ടർമാർ; റേവയിൽ പ്രസവത്തിനിടെ അമ്മയും കുഞ്ഞും മരിച്ചു

 

ഭോപ്പാൽ: മധ്യപ്രദേശിലെ റേവയിലുള്ള സഞ്ജയ് ഗാന്ധി മെമ്മോറിയൽ സർക്കാർ ആശുപത്രിയിൽ പ്രസവ ചികിത്സയ്ക്കിടെ അമ്മയും നവജാത ശിശുവും മരണപ്പെട്ട സംഭവം രാജ്യത്താകമാനം വലിയ പ്രതിഷേധത്തിനും ജനരോഷത്തിനും വഴിവെക്കുന്നു. ആശുപത്രി അധികൃതരുടെ ഗുരുതരമായ അനാസ്ഥ മൂലം റേവ ജില്ലയിലെ ഹഡ്ബസ് സ്വദേശിയായ കൽപ്പന (24) എന്ന യുവതിയും ഇവരുടെ നവജാത शिशुവുമാണ് ദാരുണമായി മരണപ്പെട്ടത്.

​ഓഗസ്റ്റ് 25-നാണ് പ്രസവേദനയെ തുടർന്ന് കൽപ്പനയെ സഞ്ജയ് ഗാന്ധി മെമ്മോറിയൽ ആശുപത്രിയിൽ പ്രവേശിപ്പിച്ചത്. ഓഗസ്റ്റ് 26-ന് രാത്രി എട്ടരയോടെ സിസേറിയൻ ശസ്ത്രക്രിയയിലൂടെയാണ് കൽപ്പന കുഞ്ഞിന് ജന്മം നൽകിയത്. എന്നാൽ ശസ്ത്രക്രിയയ്ക്കിടെ നൽകിയ അനസ്തേഷ്യയുടെ അളവ് കൂടിയതിനെ തുടർന്ന് യുവതിക്ക് ബോധം തിരികെ ലഭിച്ചില്ലെന്നും, ശസ്ത്രക്രിയയ്ക്ക് ശേഷവും മുൻപും ആവശ്യമായ വിദഗ്ധ പരിചരണം സമയബന്ധിതമായി നൽകാൻ ആശുപത്രി ജീവനക്കാർ തയാറായില്ലെന്നുമാണ് കുടുംബത്തിന്റെ പ്രധാന ആരോപണം.

​"അവരെന്നെ കൊന്നുകളയും... എന്റെ കുഞ്ഞിനെയെങ്കിലും രക്ഷിക്കൂ": വൈറലായി നിലവിളി

​മരണത്തിന് മണിക്കൂറുകൾക്ക് മുൻപ് ആശുപത്രി വാർഡിനുള്ളിൽ നിന്ന് കൽപ്പന കരഞ്ഞു നിലവിളിച്ചുകൊണ്ട് പുറത്തേക്ക് ഓടാൻ ശ്രമിക്കുന്ന ദൃശ്യങ്ങൾ സമൂഹമാധ്യമങ്ങളിൽ വൻതോതിൽ പ്രചരിക്കുന്നുണ്ട്. "ഈ ഹോസ്പിറ്റലിലെ സിസ്റ്റം ശരിയല്ല, ഇവിടെ പ്രസവിക്കാൻ എനിക്ക് പേടിയാണ്, എന്നെ ഇവിടെ നിർത്തിയാൽ കൊന്നുകളയും... എന്റെ കുഞ്ഞിനെയെങ്കിലും രക്ഷിക്കൂ..." എന്ന് അച്ഛനെ  വിളിച്ച് യുവതി അപേക്ഷിക്കുന്നത് ദൃശ്യങ്ങളിലുണ്ട്.

    ​ആശുപത്രി ജീവനക്കാർ തടഞ്ഞുനിർത്താൻ ശ്രമിക്കുമ്പോഴും തനിക്ക് ഭ്രാന്ത് പിടിച്ചിട്ടില്ലെന്നും തന്നെ ഉടൻ വീട്ടിലേക്ക് കൂട്ടിക്കൊണ്ടുപോകണമെന്നും യുവതി അപേക്ഷിക്കുന്നുണ്ടായിരുന്നു. കൽപ്പനയുടെ ആരോഗ്യനില വഷളായിട്ടും ഡ്യൂട്ടിയിലുണ്ടായിരുന്ന ഡോക്ടർമാർ തിരിഞ്ഞുനോക്കിയില്ലെന്ന് പിതാവ് രാംസമരൻ മാധ്യമങ്ങളോട് പറഞ്ഞു.

​നാല് മണിക്കൂർ നീണ്ട ഉപരോധം; പോസ്റ്റ്‌മോർട്ടം തടഞ്ഞു

​ദാരുണ സംഭവത്തിന് പിന്നാലെ ആശുപത്രി കവാടത്തിൽ ബന്ധുക്കളും നാട്ടുകാരും സംഘടിച്ച് പ്രതിഷേധിച്ചു. നാല് മണിക്കൂറോളം നീണ്ട ഉപരോധത്തിൽ ആശുപത്രിയുടെ പ്രവർത്തനം താളംതെറ്റി. സംഭവത്തിൽ ഉത്തരവാദികളായ ജീവനക്കാർക്കെതിരെ ക്രിമിനൽ കേസ് രജിസ്റ്റർ ചെയ്യാതെ മൃതദേഹം പോസ്റ്റ്‌മോർട്ടത്തിന് വിട്ടുനൽകില്ലെന്ന് ബന്ധുക്കൾ നിലപാടെടുത്തു.

​തുടർന്ന് ആശുപത്രി ഡീൻ, സൂപ്രണ്ട്, മുതിർന്ന പോലീസ് ഉദ്യോഗസ്ഥർ എന്നിവർ സ്ഥലത്തെത്തി പ്രതിഷേധക്കാരുമായി ചർച്ച നടത്തി. അന്വേഷണം ഉറപ്പുനൽകിയതിനെ തുടർന്നാണ് കുടുംബം പോസ്റ്റ്‌മോർട്ടത്തിന് സമ്മതിച്ചത്.

​ജീവനക്കാർക്ക് സസ്‌പെൻഷൻ; ഉന്നതതല അന്വേഷണം

​സംഭവത്തിൽ പ്രാഥമിക അന്വേഷണത്തിന്റെ അടിസ്ഥാനത്തിൽ ഡ്യൂട്ടിയിലുണ്ടായിരുന്ന സാധനാ വർമ്മ, സീമാ മുജാൽഡെ എന്നീ രണ്ട് നേഴ്സിംഗ് ഓഫീസർമാരെ ഉടനടി സസ്‌പെൻഡ് ചെയ്തതായി അധികൃതർ വ്യക്തമാക്കി.

​സംഭവത്തെക്കുറിച്ച് വിശദമായി അന്വേഷിക്കാൻ ഉന്നതതല അന്വേഷണ സമിതിയെ നിയോഗിച്ചിട്ടുണ്ടെന്നും അന്വേഷണ റിപ്പോർട്ടിന്റെ അടിസ്ഥാനത്തിൽ വീഴ്ച വരുത്തിയ മുഴുവൻ പേർക്കുമെതിരെ ശക്തമായ നിയമനടപടി സ്വീകരിക്കുമെന്നും ആശുപത്രി ഡീൻ ഡോ. സുനിൽ അഗർവാൾ അറിയിച്ചു.

​സംസ്ഥാനത്ത് ആരോഗ്യമേഖല തകർച്ചയിൽ

​മധ്യപ്രദേശിലെ പബ്ലിക് ഹെൽത്ത് കെയർ സംവിധാനങ്ങളുടെ ദയനീയ അവസ്ഥയിലേക്കാണ് ഈ സംഭവം വീണ്ടും വിരൽ ചൂണ്ടുന്നത്. സംസ്ഥാനത്ത് സ്പെഷ്യലിസ്റ്റ് ഡോക്ടർമാരുടെ 72 ശതമാനത്തോളം തസ്തികകളും മെഡിക്കൽ ഓഫീസർമാരുടെ 40 ശതമാനത്തോളം തസ്തികകളും ഒഴിഞ്ഞുകിടക്കുന്ന കടുത്ത ആരോഗ്യ പ്രതിസന്ധിക്കിടയിലാണ് ഒരു കുടുംബത്തിന്റെ പ്രതീക്ഷകൾ തല്ലിക്കെടുത്തിയ ഈ ദാരുണ സംഭവം അരങ്ങേറിയത്.