കൂരാച്ചുണ്ടിൽ കനത്ത മഴയിൽ നാശനഷ്ടം: റീമ കുന്നുമ്മലിന്റെ നേതൃത്വത്തിൽ അടിയന്തര സന്ദർശനം; വിണ്ടുകീറിയ മലയോര ഹൈവേയിൽകോൺക്രീറ്റ് ഫില്ലിംഗിന് നിർദ്ദേശം

കൂരാച്ചുണ്ട്: കനത്ത മഴയെ തുടർന്ന് കൂരാച്ചുണ്ട് പഞ്ചായത്തിന്റെ വിവിധ ഭാഗങ്ങളിലുണ്ടായ മഴക്കെടുതികളും നാശനഷ്ടങ്ങളും ജില്ലാ പഞ്ചായത്ത് വികസനകാര്യ സ്റ്റാൻഡിങ് കമ്മിറ്റി ചെയർപേഴ്സൺ റീമ കുന്നുമ്മൽ നേരിട്ടെത്തി സന്ദർശിച്ചു.

​മലയോര ഹൈവേയുടെ ഇരുപത്തിയെട്ടാം മൈൽ - തലയാട് റീച്ചിൽ പാറ പൊട്ടിയടർന്ന പ്രദേശം അവർ സന്ദർശിക്കുകയും സ്ഥിതിഗതികൾ വിലയിരുത്തുകയും ചെയ്തു. തുടർന്ന് കെ.ആർ.എഫ്.ബി (KRFB) അധികൃതരുമായി ഉടൻ ബന്ധപ്പെടുകയും വിണ്ടുകീറിയ ഭാഗങ്ങളിൽ അടിയന്തരമായി കോൺക്രീറ്റ് ഫില്ലിംഗ് നടത്തി അപകടസാധ്യത ഒഴിവാക്കണമെന്ന് ആവശ്യപ്പെടുകയും ചെയ്തു.

​പഞ്ചായത്തിലെ വിവിധ പ്രദേശങ്ങളിൽ മണ്ണിടിച്ചിൽ ഭീഷണി നേരിടുന്നതും വെള്ളം കയറി കേടുപാടുകൾ സംഭവിച്ചതുമായ വീടുകൾ റീമ കുന്നുമ്മൽ സന്ദർശിച്ച് വീട്ടുകാരുടെ പരാതികൾ കേട്ടറിഞ്ഞു. കക്കയം ഡാമിന്റെ ഷട്ടറുകൾ തുറക്കുന്നതുമായി ബന്ധപ്പെട്ട് ജനങ്ങൾക്കുണ്ടായ ആശങ്കകൾ പരിഹരിക്കുന്നതിനായി കെ.എസ്.ഇ.ബി (KSEB) ഉദ്യോഗസ്ഥരുമായി സംസാരിക്കുകയും ആവശ്യമായ മുൻകരുതലുകൾ സ്വീകരിക്കാൻ നിർദ്ദേശം നൽകുകയും ചെയ്തു.

​സന്ദർശന വേളയിൽ ബ്ലോക്ക് പഞ്ചായത്ത് അംഗം അരുൺ ജോസ്, കൂരാച്ചുണ്ട് പഞ്ചായത്ത് വൈസ് പ്രസിഡന്റ് ബിജു കടലാശ്ശേരി, ഗ്രാമപഞ്ചായത്ത് അംഗങ്ങളായ റസീന യൂസഫ്, ജോസ് വെളിയത്ത്, ഡാർലി പുല്ലങ്കുന്നേൽ, മുൻ പഞ്ചായത്ത് പ്രസിഡന്റ് ഒ.കെ. അഹമ്മദ്, വി.എസ്. ഹമീദ് എന്നിവരും ജനപ്രതിനിധികൾക്കൊപ്പം ഉണ്ടായിരുന്നു.