പോത്തുകല്ലിൽ വീണ്ടും നടുക്കം ; പാലത്തിനടിയിൽ അഴുകിയ നിലയിൽ യുവതിയുടെ മൃതദേഹം: പങ്കാളി കസ്റ്റഡിയിൽ
പോത്തുകല്ല്: മലപ്പുറം ജില്ലയിലെ പോത്തുകല്ലിനടുത്ത് മേലേ മുണ്ടേരി അപ്പൻകാപ്പിൽ പാലത്തിനടിയിൽ യുവതിയുടെ മൃതദേഹം അഴുകിയ നിലയിൽ കണ്ടെത്തിയ സംഭവം കൊലപാതകമാണെന്ന നിഗമനത്തിൽ പോലീസ് അന്വേഷണം ഊർജ്ജിതമാക്കി. അപ്പൻകാപ്പ് സ്വദേശി നിഷയാണ് കൊല്ലപ്പെട്ടത്. സംഭവവുമായി ബന്ധപ്പെട്ട് നിഷയ്ക്കൊപ്പം താമസിച്ചിരുന്ന അപ്പൻകാപ്പ് സ്വദേശി സുരേഷിനെ പോത്തുകല്ല് പോലീസ് കസ്റ്റഡിയിലെടുത്തു.
ഇന്നലെ രാത്രി പതിനൊന്ന് മണിയോടെ പാലത്തിന്റെ പരിസരത്ത് നിന്ന് കടുത്ത ദുർഗന്ധം വമിച്ചതിനെ തുടർന്ന് നാട്ടുകാർ നടത്തിയ തിരച്ചിലിലാണ് മൃതദേഹം കണ്ടെത്തിയത്. വിവരമറിഞ്ഞ് സ്ഥലത്തെത്തിയ പോത്തുകല്ല് പോലീസ് നടത്തിയ പരിശോധനയിൽ മൃതദേഹം നിഷയുടേതാണെന്ന് സ്ഥിരീകരിക്കുകയായിരുന്നു. മൃതദേഹത്തിന് ഏകദേശം നാല് ദിവസത്തെ പഴക്കമുണ്ടെന്നാണ് പ്രാഥമിക നിഗമനം.
സംശയം നിഴലിക്കുന്നത് കസ്റ്റഡിയിലുള്ള സുരേഷിലേക്ക്
കഴിഞ്ഞ ഏഴെട്ടു മാസമായി നിഷയും സുരേഷും ഒരുമിച്ചാണ് താമസം. ഇരുവരും തമ്മിൽ നിരന്തരം വാക്കുതർക്കങ്ങൾ ഉണ്ടാകാറുണ്ടായിരുന്നുവെന്ന് പ്രദേശവാസികൾ പോലീസിന് മൊഴി നൽകിയിട്ടുണ്ട്. സുരേഷിന്റെ മുൻകാല ക്രിമിനൽ പശ്ചാത്തലമാണ് പോലീസിന്റെ സംശയം കൂടുതൽ ബലപ്പെടുത്തുന്നത്. 2002-ൽ തന്റെ മുൻ പങ്കാളിയായ സ്ത്രീയെ തലയ്ക്കടിച്ചു കൊലപ്പെടുത്തിയ കേസിലെ പ്രതിയാണ് സുരേഷ്. ഈ കേസിൽ ജയിൽ ശിക്ഷ അനുഭവിച്ച ഇയാൾ പിന്നീട് ജാമ്യത്തിലിറങ്ങുകയായിരുന്നു. ജാമ്യത്തിലിറങ്ങിയ ശേഷമാണ് ഇയാൾ അപ്പൻകാപ്പിലെത്തി നിഷയ്ക്കൊപ്പം താമസം ആരംഭിച്ചത്.
നിഷയെ കൊലപ്പെടുത്തിയ ശേഷം മൃതദേഹം പാലത്തിനടിയിൽ ഉപേക്ഷിച്ചതാണെന്നാണ് പോലീസിന്റെ പ്രാഥമിക നിഗമനം. നിലവിൽ കസ്റ്റഡിയിലുള്ള സുരേഷിനെ പോലീസ് വിശദമായി ചോദ്യം ചെയ്തുവരികയാണ്.
മൃതദേഹത്തിന്റെ പോസ്റ്റ്‌മോർട്ടം നടപടികൾ നാളെ പൂർത്തിയാകും. ശാസ്ത്രീയമായ തെളിവുകൾ ശേഖരിച്ച ശേഷം സുരേഷിന്റെ അറസ്റ്റ് ഉടൻ രേഖപ്പെടുത്തുമെന്ന് അന്വേഷണ ഉദ്യോഗസ്ഥർ വ്യക്തമാക്കി.
Comments
Post a Comment