ഏഴു വർഷമായി ഷാർജയിൽ തെരുവിൽ കഴിഞ്ഞിരുന്ന പ്രവാസിമലയാളിയ്ക്ക് ദാരുണാന്ത്യം ഉറങ്ങുകയാണെന്ന് കരുതി ആരും ശ്രദ്ധിച്ചില്ല

 

ഷാർജ / പുനലൂർ: ഏഴ് വർഷമായി കുടുംബവുമായി ബന്ധപ്പെടാതെ ഷാർജ അൽ ഇത്തിഹാദ് സ്ക്വയർ പാർക്കിൽ കടുത്ത ചൂടും തണുപ്പുമേറ്റ് കഴിഞ്ഞിരുന്ന മലയാളി പ്രവാസിയെ മരിച്ച നിലയിൽ കണ്ടെത്തി. കൊല്ലം പുനലൂർ പേപ്പർമിൽ ആഷിഖ് മൻസിലിൽ ഷാജഹാൻ (54) ആണ് മരിച്ചത്. കഴിഞ്ഞ ഓഗസ്റ്റ് 3 ചൊവ്വാഴ്ച വൈകിട്ട് അഞ്ചോടെയായിരുന്നു സംഭവം.

​പാർക്കിൽ കിടന്നുറങ്ങുകയാണെന്ന് കരുതി മണിക്കൂറുകളോളം ആരും ശ്രദ്ധിക്കാതിരുന്ന മൃതദേഹം, രാത്രി ഒൻപ മണിയോടെ വിവരമറിഞ്ഞെത്തിയ പോലീസ് സംഘമാണ് ആംബുലൻസിൽ ആശുപത്രി മോർച്ചറിയിലേക്ക് മാറ്റിയത്. നടപടിക്രമങ്ങൾ പൂർത്തിയാക്കിയ ശേഷം മൃതദേഹം നാട്ടിലേക്ക് കൊണ്ടുപോകും.

​രണ്ടര പതിറ്റാണ്ട് നീണ്ട പ്രവാസഭാരം

​രണ്ടു പതിറ്റാണ്ടിലേറെ നീണ്ട പ്രവാസ ജീവിതത്തിന് ഒടുവിലാണ് ഷാജഹാന്റെ ദാരുണമായ മരണം. 26 വർഷം മുൻപ് സൗദി അറേബ്യയിലെത്തിയ അദ്ദേഹം ഡ്രൈവറായി 10 വർഷത്തോളം ജോലി ചെയ്ത ശേഷമാണ് നാട്ടിലേക്ക് മടങ്ങിയത്. തുടർന്ന് ഏഴ് വർഷം മുൻപ് യുഎഇയിലേക്ക് വീണ്ടും എത്തിയെങ്കിലും സൗദിയിലായിരുന്നപ്പോഴും യുഎഇയിലെത്തിയ ശേഷവും സ്വന്തം കുടുംബവുമായി യാതൊരു ബന്ധവും പുലർത്താൻ അദ്ദേഹം തയാറായിരുന്നില്ല. മകൾ തസ്നിമിന്റെയും മകൻ ആഷിഖിന്റെയും വിവാഹ മംഗളകർമങ്ങൾക്ക് പോലും ഷാജഹാൻ നാട്ടിലേക്ക് പോയില്ല.

​ഷാർജ സൗദി പള്ളിക്കടുത്തുള്ള അൽ ഇത്തിഹാദ് സ്ക്വയർ പാർക്കിലായിരുന്നു നിരാലംബരായ മറ്റ് അനേകം പ്രവാസികളെപ്പോലെ ഷാജഹാന്റെയും അവസാന നാളുകൾ. പള്ളിയിൽ നിന്ന് പ്രാഥമികാവശ്യങ്ങൾ നിറവേറ്റിയും, വഴിയാത്രക്കാർ കാരുണ്യത്തോടെ നൽകുന്ന ഭക്ഷണം കഴിച്ചും അദ്ദേഹം ദിവസങ്ങൾ തള്ളിനീക്കി. കടുത്ത പ്രമേഹബാധിതനായിരുന്നെങ്കിലും മരുന്നുകൾ കഴിക്കാൻ പോലും അദ്ദേഹം തയ്യാറായിരുന്നില്ല.

​വഴിത്തിരിവായത് സാമൂഹിക പ്രവർത്തകയുടെ ഇടപെടൽ

​ഷാർജയിലെ ഇൻഷുറൻസ് കമ്പനി ജീവനക്കാരിയും കരുനാഗപ്പള്ളി സ്വദേശിയുമായ മായ എന്ന സാമൂഹിക പ്രവർത്തകയുടെ ഓർമകളിലും ഷാജഹാന്റെ നിശബ്ദ സാന്നിധ്യമുണ്ട്. കുറച്ചുകാലം മുൻപ് റോളയിലെ റസ്റ്ററന്റിൽ ഭക്ഷണം കഴിക്കാൻ പോകുമ്പോഴാണ് മായ ഷാജഹാനെ ആദ്യമായി കാണുന്നത്. അന്ന് വിശന്നുതളർന്നിരുന്ന അയാൾക്ക് ഭക്ഷണം വാങ്ങി നൽകിയ മായ, പിന്നീട് പലപ്പോഴും അദ്ദേഹത്തിന് ആഹാരമെത്തിച്ചു നൽകിയിരുന്നു.

  ​   സ്വന്തം കാര്യങ്ങൾ ആരോടും പറയാൻ ഇഷ്ടപ്പെടാതിരുന്ന ഷാജഹാൻ, ഒരിക്കൽ ഭാര്യ ഷൈലജയുടെ ഫോൺ നമ്പർ മായക്ക് കൈമാറിയിരുന്നു. മായ നാട്ടിലേക്ക് വിളിച്ച് ഷൈലജയോടും മകൾ തസ്നിയോടും, സൗദിയിലുണ്ടായിരുന്ന മകൻ ആഷിഖിനോടും സംസാരിച്ചപ്പോഴാണ് കണ്ണീരണിയിക്കുന്ന ആ ജീവിത കഥ പുറത്തറിയുന്നത്.

​വർഷങ്ങളായി ഷാജഹാൻ കുടുംബവുമായി യാതൊരു ബന്ധവുമില്ലാതെ കഴിയുകയാണെന്നും ജീവിക്കാൻ മാർഗമില്ലാതെ കഷ്ടപ്പെടുകയാണെന്നും ഷൈലജ വെളിപ്പെടുത്തി. മാത്രമല്ല, ഷാജഹാന് യുഎഇയിലേക്ക് വരാൻ വേണ്ടി ഉണ്ടായ കടബാധ്യതകൾ വീട്ടാൻ നെട്ടോട്ടമോടുകയായിരുന്നു ആ കുടുംബം. യുഎഇ ഡ്രൈവിങ് ലൈസൻസുള്ള താങ്കൾക്ക് വീണ്ടും ജോലി ചെയ്ത് കുടുംബത്തെ സംരക്ഷിച്ചുകൂടെ എന്ന് മായ സ്നേഹത്തോടെ ചോദിച്ചെങ്കിലും അദ്ദേഹം അതിന് വഴങ്ങിയില്ല. അതിനുശേഷം തന്റെ മുന്നിൽപ്പെടാതെ മാറിനടക്കാനായിരുന്നു ഷാജഹാന്റെ ശ്രമം.

​മരണം സ്ഥിരീകരിച്ചത് പഴയ ഫോൺ നമ്പറിലൂടെ

​പാർക്കിനടുത്ത് താമസിക്കുന്ന സുഹൃത്ത് വഴിയാണ് പാർക്കിൽ ഒരു മലയാളി മരണപ്പെട്ടതായും മൃതദേഹം ആംബുലൻസിൽ കൊണ്ടുപോകുന്നതായും മായ അറിയുന്നത്. സംശയം തോന്നിയ മായ, പണ്ട് ഷൈലജയെ വിളിച്ച ഫോൺ നമ്പർ തിരിഞ്ഞുപിടിച്ച് നാട്ടിലേക്ക് വിളിച്ച് കാര്യമന്വേഷിക്കുകയായിരുന്നു. തുടർന്ന് ബന്ധുക്കൾ അയച്ചുകൊടുത്ത പാസ്‌പോർട്ട് കോപ്പിയും പഴയ ഫോട്ടോയും പരിശോധിച്ചാണ് മരിച്ചത് ഷാജഹാൻ തന്നെയാണെന്ന് സ്ഥിരീകരിച്ചത്.

​"അവസാനമായി എനിക്ക് ആ മുഖമൊന്ന് കാണണം"

​ഷാജഹാന്റെ മരണം സ്ഥിരീകരിച്ചതു മുതൽ നാട്ടിലുള്ള മകൾ തസ്നിം കരച്ചിൽ നിർത്തിയിട്ടില്ലെന്ന് മായ പറയുന്നു. "ഏഴ് വർഷം മുൻപാണ് വാപ്പയെ അവസാനമായി കണ്ടത്. അതിൽപ്പിന്നെ ഒന്നു ഫോണിൽ പോലും സംസാരിച്ചിട്ടില്ല. ഞാനദ്ദേഹത്തിന്റെ മകളല്ലേ... അവസാനമായി എനിക്ക് ആ മുഖമൊന്നു കാണണം. ദയവു ചെയ്ത് മൃതദേഹം നാട്ടിലെത്തിക്കാനുള്ള സഹായം അവിടുത്തെ സാമൂഹിക പ്രവർത്തകരും ഇന്ത്യൻ കോൺസുലേറ്റും ചെയ്തുതരണം" - വിങ്ങലോടെ തസ്നിം അഭ്യർത്ഥിക്കുന്നു.

​പ്രവാസ ജീവിതത്തിന്റെ ഏതോ നിഗൂഢമായ മുറിവുകൾ ഉള്ളിലൊതുക്കി, ആരോടും പറയാതെ പോയ ആ പ്രവാസി ഒടുവിൽ വിധി ബാക്കിവച്ച ചോദ്യങ്ങൾക്ക് ഉത്തരം നൽകാനാകാതെ ജന്മനാട്ടിലേക്ക് അന്ത്യയാത്രയാവുകയാണ്.