. "അവൾ മരുമകളല്ല, എന്റെ മകളാണ്!" മകന്റെ വേർപാടിൽ ത തളരാതെ മരുമകളുടെ കയ്യെ പിടിച്ച് പുനർവിവാഹം നടത്തി നൽകിയ അച്ഛൻ
ഉജ്ജയിൻ (മധ്യപ്രദേശ്): ഭർതൃവീടുകളിൽ പെൺകുട്ടികൾ അനുഭവിക്കുന്ന പീഡനങ്ങളുടെയും അവഗണനകളുടെയും വാർത്തകൾ പതിവാകുന്ന കാലത്ത്, സ്നേഹത്തിന്റെയും കരുതലിന്റെയും ഹൃദയസ്പർശിയായ മാതൃകയായി ഒരു പിതാവ്. സ്വന്തം മകന്റെ വേർപാടിന്റെ ആഴത്തിലുള്ള വേദന ഉള്ളിലൊതുക്കി, വിധവയായ മരുമകളെ സ്വന്തം മകളായി കണ്ട് പുനർവിവാഹം നടത്തിക്കൊടുത്ത ദിനേഷ് വൈരാഗി എന്ന പിതാവാണ് ഇപ്പോൾ വാർത്തകളിൽ നിറയുന്നത്. മധ്യപ്രദേശിലെ ഉജ്ജയിൻ ജില്ലയിലുള്ള ജൈതൽ ഗ്രാമത്തിലാണ് മനുഷ്യത്വത്തിന്റെ നന്മ വിളിച്ചോതുന്ന ഈ സംഭവം നടന്നത്.
കുറച്ചു വർഷങ്ങൾക്ക് മുൻപാണ് ദിനേഷ് വൈരാഗിയുടെ മകൻ കപിലും പ്രിയങ്കയും തമ്മിലുള്ള വിവാഹം നടക്കുന്നത്. എന്നാൽ സന്തോഷകരമായ ദാമ്പത്യത്തിനിടയിൽ കപിലിന് ക്യാൻസർ സ്ഥിരീകരിക്കുകയായിരുന്നു. തുടർന്ന് കഠിനമായ രോഗാവസ്ഥയിലും ഒരു കുഞ്ഞിനെയെന്നപോലെ സ്നേഹത്തോടെയും ആത്മാർത്ഥതയോടെയും പ്രിയങ്ക ഭർത്താവിനെ പരിചരിച്ചു. എന്നാൽ ചികിത്സകൾ ഫലിക്കാതെ 2023-ൽ കപിൽ മരണത്തിന് കീഴടങ്ങി.
മകന്റെ വേർപാടോടെ തകർന്നുപോയ പ്രിയങ്ക വിധവയായി ശേഷിക്കുന്ന ജീവിതം കഴിച്ചുകൂട്ടട്ടെ എന്നായിരുന്നു ബന്ധുക്കളുടെ നിലപാട്. എന്നാൽ ഇതിനെ ശക്തമായി എതിർത്തത് ഭർത്താവിന്റെ പിതാവായ ദിനേഷ് വൈരാഗിയായിരുന്നു. "അവൾ എന്റെ മരുമകളല്ല, എന്റെ സ്വന്തം മകളാണ്. ചെറുപ്രായത്തിൽ മകൻ പോയെന്ന് കരുതി ജീവിതകാലം മുഴുവൻ അവൾ വിധവയായി കഴിയേണ്ടതില്ല" എന്ന് അദ്ദേഹം ഉറപ്പിച്ചു പറഞ്ഞു.
തുടർന്ന് ദിനേഷ് തന്നെ മുൻകൈയെടുത്ത് പ്രിയങ്കയുടെ പിതാവായ രാംബാബുവുമായി സംസാരിക്കുകയും, വിദിഷ സ്വദേശിയായ ഗോവിന്ദ് എന്ന യുവാവുമായി അവളുടെ വിവാഹം ഉറപ്പിക്കുകയുമായിരുന്നു. ഭോപ്പാലിലെ പ്രമുഖ റിസോർട്ടിൽ വച്ച് നടന്ന ചടങ്ങിൽ പ്രിയങ്കയുടെ കന്യാദാനം നിർവഹിച്ചതും ദിനേഷ് തന്നെയായിരുന്നു. വിവാഹച്ചിലവുകൾ, സ്വർണം, പണം തുടങ്ങിയവയെല്ലാം കപിലിന്റെ മാതാപിതാക്കൾ തന്നെയാണ് നൽകിയത്.
"എന്റെ മോൾ സന്തോഷത്തോടെ ജീവിക്കണം, ഞങ്ങളെ കാണാൻ ഇടയ്ക്കിടെ വരണം" എന്ന സ്നേഹാശംസകളോടെയാണ് പ്രിയങ്കയെ പുതിയ ജീവിതത്തിലേക്ക് അവർ യാത്രയാക്കിയത്. സ്വാർത്ഥതയില്ലാത്ത ദിനേഷ് വൈരാഗിയുടെയും കുടുംബത്തിന്റെയും ഈ വലിയ മനസ്സിന് സോഷ്യൽ മീഡിയയിലും പൊതുസമൂഹത്തിലും വൻ ജനശ്രദ്ധയും അഭിനന്ദനങ്ങളുമാണ് ലഭിച്ചുകൊണ്ടിരിക്കുന്നത്.
Comments
Post a Comment