ജാതിക്കയ്ക്കൊപ്പം സ്കൂട്ടർ താക്കോലും കൊണ്ടുപോയി; ​"ജാതിക്ക ഞാൻ എടുത്തോളാം, താക്കോൽ നിങ്ങൾച്ചുവെച്ചോ!" — കള്ളന്റെ അപൂർവ 'എത്തിക്സ്'

 

മൂവാറ്റുപുഴ: ജാതിക്ക മോഷണത്തിനിടെ അബദ്ധത്തിൽ കൈക്കലാക്കിയ സ്കൂട്ടർ താക്കോൽ രണ്ടു ദിവസത്തിന് ശേഷം വീട്ടുമുറ്റത്ത് തിരികെ എത്തിച്ച് 'മാതൃകാ കള്ളൻ'. മൂവാറ്റുപുഴയിലാണ് സമീപകാലത്തൊന്നും കേട്ടുകേൾവിയില്ലാത്ത കൗതുകകരമായ സംഭവം നടന്നത്.

​കഴിഞ്ഞ ദിവസമാണ് പ്രദേശത്തെ ഒരു വീട്ടുമുറ്റത്തുണ്ടായിരുന്ന ജാതിമരത്തിൽ നിന്ന് കള്ളൻ ജാതിക്ക മോഷ്ടിച്ചത്. ഇതിനിടെ, സ്കൂട്ടർ വച്ചിരുന്ന ഭാഗത്ത് സിമന്റ് ചട്ടിക്കുള്ളിൽ വീട്ടുകാർ സൂക്ഷിച്ചിരുന്ന വാഹനത്തിന്റെ താക്കോലും മോഷണവസ്തുക്കൾക്കൊപ്പം കള്ളൻ അബദ്ധത്തിൽ എടുക്കുകയായിരുന്നു. മോഷണശേഷം താക്കോൽ കാണാതായതോടെ വീട്ടുകാർ വൻ ദുരിതത്തിലായി. വാഹനം പുറത്തിറക്കാനോ അത്യാവശ്യ കാര്യങ്ങൾക്ക് ഉപയോഗിക്കാനോ കഴിയാതെ കുടുംബം വലഞ്ഞു. താക്കോൽ എവിടെപ്പോയി എന്ന് തിരിച്ചറിയാനാകാതെ വിഷമിച്ചിരിക്കുകയായിരുന്നു വീട്ടുകാർ.

​എന്നാൽ, സംഭവത്തിന് കൃത്യം രണ്ടു ദിവസത്തിന് ശേഷം വീട്ടുകാർ രാവിലെ മുറ്റത്തിറങ്ങിയപ്പോൾ കണ്ട കാഴ്ച ഏവരെയും അത്ഭുതപ്പെടുത്തുന്നതായിരുന്നു. കാണാതായ സ്കൂട്ടർ താക്കോൽ വീട്ടുമുറ്റത്തെ പ്ലാസ്റ്റിക് വള്ളിയിൽ വളരെ ഭദ്രമായി കെട്ടിത്തൂക്കിയ നിലയിൽ കാണപ്പെട്ടു.

​ജാതിക്ക മോഷ്ടിച്ചെങ്കിലും വീട്ടുകാർക്ക് വാഹനം ഉപയോഗിക്കാൻ കഴിയാതെ ബുദ്ധിമുട്ടേണ്ടി വന്നതിലുള്ള പശ്ചാത്താപമാകാം കള്ളനെക്കൊണ്ട് താക്കോൽ തിരികെ എത്തിക്കാൻ പ്രേരിപ്പിച്ചതെന്നാണ് കരുതുന്നത്. ജാതിക്ക നഷ്ടപ്പെട്ട വിഷമത്തിനിടയിലും, കൊണ്ടുപോയ താക്കോൽ കൃത്യമായി തിരികെ നൽകിയ കള്ളന്റെ ഈ 'എത്തിക്സ്' ആണ് ഇപ്പോൾ പ്രദേശവാസികൾക്കിടയിലെ പ്രധാന സംസാരവിഷയം.