മരണം തൊട്ടടുത്തെത്തിയ നിമിഷം! ഗ്രാമം ഉറങ്ങിയപ്പോൾ ഉണർന്നിരുന്ന 'സുന്ദരിപൂച്ച'; തൊടുപുഴയിൽ ദുരന്തത്തിന് മുമ്പ് പൂച്ച നൽകിയത് ജീവന്റെ അപായസൂചന

 

തൊടുപുഴ (ആലക്കോട്): ഉറക്കത്തിലാണ്ട ഗ്രാമത്തെ നടുക്കി മലയിടിച്ചിൽ എത്തുന്നതിന് തൊട്ടുമുമ്പ് മിണ്ടാപ്രാണി നൽകിയ അപായസൂചനയിൽ തലനാരിഴയ്ക്ക് രക്ഷപ്പെട്ട് ഒരു കുടുംബം. ആലക്കോട് ചവർണ പ്രദേശത്ത് ആഗസ്റ്റ് 1 പുലർച്ചെയുണ്ടായ പ്രകൃതിദുരന്തത്തിലാണ് 'സുന്ദരി' എന്ന വളർത്തുപൂച്ച നാല് ജീവനുകൾക്ക് രക്ഷകയായത്.

​ശക്തമായ മഴ പെയ്തിറങ്ങിയിരുന്ന രാത്രിയിൽ ചവർണയിലെ വസതിയിൽ കുടുംബാംഗങ്ങൾ ഉറക്കത്തിലായിരുന്നു. പുലർച്ചെയോടെ വീടിനുള്ളിൽ പൂച്ച പരിഭ്രാന്തിയോടെ അലറിവിളിക്കാൻ തുടങ്ങിയതാണ് സംഭവങ്ങളുടെ തുടക്കം. സാധാരണ കരച്ചിലിൽ നിന്ന് വ്യത്യസ്തമായി പേടിച്ചരണ്ട് വീടിന്റെ വിവിധ ഭാഗങ്ങളിലേക്ക് ഓടിനടന്ന് ബഹളം വെച്ച പൂച്ചയുടെ ശബ്ദം കേട്ടാണ് വീട്ടുകാർ ഞെട്ടിയുണർന്നത്. പൂച്ചയെ കൂടെ കിടത്തി ഉറക്കാൻ ശ്രമിച്ചെങ്കിലും അത് വീണ്ടും അസ്വസ്ഥത കാണിച്ച് നിലവിളിക്കുകയായിരുന്നു.

​ഇതിനിടയിലാണ് പ്രദേശത്ത് വലിയ ശബ്ദം ഉയർന്നത്. എന്തോ വൻ അപായം സംഭവിക്കാൻ പോകുന്നു എന്ന് തിരിച്ചറിഞ്ഞ വീട്ടുകാർ നിമിഷങ്ങൾക്കകം കൈക്കുഞ്ഞിനെയുമെടുത്ത് ജീവനുംകൊണ്ട് പുറത്തേക്ക് ഓടിയിറങ്ങി. ഇവർ റോഡിലേക്ക് ഓടി രക്ഷപ്പെടുന്നതിനിടയിൽത്തന്നെ വലിയ മലയിടിച്ചിലുണ്ടായി. വൻപാറകളും മണ്ണും ചെളിയും വീടിന് മുകളിലേക്ക് പതിച്ചു.

​കണ്ണടച്ചു തുറക്കുന്ന സമയം കൊണ്ട് താഴെയുള്ള രണ്ട് വീടുകൾ പൂർണ്ണമായും ഈ കുടുംബത്തിന്റെ വീട് ഭാഗികമായും തകർന്നു. ഒരു സെക്കൻഡ് എങ്കിലും വൈകിയിരുന്നെങ്കിൽ ആ നാല് ജീവനുകളും മണ്ണിനടിയിലാകുമായിരുന്നു.

​വളർത്തുപൂച്ച കൃത്യസമയത്ത് നൽകിയ മുന്നറിയിപ്പ് മാത്രമാണ് വൻ ദുരന്തം ഒഴിവാക്കിയത്. സംഭവത്തെ തുടർന്ന് പ്രദേശത്ത് ഇനിയും മണ്ണ് ഇടിയാനുള്ള സാധ്യത മുൻനിർത്തി 13 കുടുംബങ്ങളെ അധികൃതർ അടിയന്തരമായി സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു.

​തങ്ങളുടെ ജീവൻ മരണമുഖത്തുനിന്ന് തിരിച്ചുകിട്ടിയതിന്റെ ആശ്വാസത്തിലാണ് കുടുംബം. ദുരന്തമുഖത്ത് യജമാനനും കുടുംബത്തിനും കാവലായ 'സുന്ദരി' പൂച്ചയിപ്പോൾ പ്രദേശത്തെ ഒന്നാകെ സൂപ്പർ ഹീറോയാണ്.