കോഴിക്കോട് ജില്ലയിലെ വിദ്യാഭ്യാസ സ്ഥാപനങ്ങൾക്ക് നാളെ അവധി; പ്രൊഫഷണൽ കോളേജുകൾക്ക് ഇളവ്
കോഴിക്കോട്: ജില്ലയിൽ കനത്ത മഴ തുടരുന്ന സാഹചര്യത്തിലും കേന്ദ്ര കാലാവസ്ഥാ വകുപ്പ് നാളെ ഓറഞ്ച് അലർട്ട് പ്രഖ്യാപിച്ചതിനാലും പ്രൊഫഷണൽ കോളേജുകൾ ഒഴികെയുള്ള മുഴുവൻ വിദ്യാഭ്യാസ സ്ഥാപനങ്ങൾക്കും നാളെ (ഓഗസ്റ്റ് 5, ബുധൻ) ജില്ലാ കളക്ടർ അവധി പ്രഖ്യാപിച്ചു.
മലയോര-തീരദേശ മേഖലകളിൽ മഴയും കാറ്റും കനത്തതോടെ വിദ്യാർത്ഥികളുടെ സുരക്ഷ ഉറപ്പാക്കുന്നതിന്റെ ഭാഗമായാണ് നടപടി. അങ്കണവാടികൾ, മദ്റസകൾ, ട്യൂഷൻ സെന്ററുകൾ, പ്രൈവറ്റ് അക്കാദമികൾ തുടങ്ങിയവക്കും അവധി ബാധകമായിരിക്കും.
പരീക്ഷകൾ മാറ്റമില്ലാതെ തുടരും
അവധി പ്രഖ്യാപിച്ചെങ്കിലും മുൻകൂട്ടി നിശ്ചയിച്ച പൊതുപരീക്ഷകൾ, യൂണിവേഴ്സിറ്റി പരീക്ഷകൾ എന്നിവക്ക് മാറ്റമുണ്ടായിരിക്കില്ല. ഓൺലൈൻ ക്ലാസുകൾ നടത്തുന്നതിന് തടസ്സമില്ലെന്നും ഉത്തരവിൽ വ്യക്തമാക്കുന്നു.
ജാഗ്രതാ നിർദേശം
മലയോര മേഖലകളിൽ മണ്ണിടിച്ചിൽ, ഉരുൾപൊട്ടൽ ഭീഷണിയും തീരദേശങ്ങളിൽ കടലാക്രമണ സാധ്യതയും നിലനിൽക്കുന്നതിനാൽ പൊതുജനങ്ങൾ ജാഗ്രത പാലിക്കണമെന്ന് ജില്ലാ ഭരണകൂടം അറിയിച്ചു. പുഴകളിലും ജലാശയങ്ങളിലും ഇറങ്ങുന്നതിനും മലയോര മേഖലകളിലേക്കുള്ള രാത്രികാല യാത്രകൾക്കും വിലക്കുണ്ട്. അടിയന്തര സാഹചര്യ നേരിടാൻ താലൂക്ക് തലങ്ങളിൽ കൺട്രോൾ റൂമുകൾ സജ്ജമാക്കിയിട്ടുണ്ട്.
Comments
Post a Comment