ചന്ദ്രനിലൊരു ക്രാഷ് ലാൻഡിങ്ങ്; ഫാൽക്കൺ 9 റോക്കറ്റ് അവശിഷ്ടം ചന്ദ്രനിൽ ഇടിച്ചിറങ്ങി

 

വാഷിംഗ്ടൺ: ബഹിരാകാശ ഗവേഷണ രംഗത്ത് ആശങ്കയും അതോടൊപ്പം വലിയ ശാസ്ത്ര കൗതുകവും സൃഷ്ടിച്ചുകൊണ്ട് അമേരിക്കൻ സ്വകാര്യ ബഹിരാകാശ കമ്പനിയായ സ്പേസ് എക്സിന്റെ നിയന്ത്രണം നഷ്ടപ്പെട്ട റോക്കറ്റ് ഭാഗം ചന്ദ്രന്റെ ഉപരിതലത്തിൽ ഇടിച്ചിറങ്ങി. ഏകദേശം 4,000 കിലോഗ്രാം ഭാരമുള്ള പേടകത്തിന്റെ അപ്പർ സ്റ്റേജ്  ഭാഗമാണ് അതിശക്തമായ വേഗതയിൽ ചന്ദ്രനിൽ പതിച്ചത്.

​കൂട്ടിയിടിയുടെ ആഘാതത്തിൽ ചന്ദ്രനിൽ വൻ ഗർത്തം രൂപപ്പെട്ടതായും വലിയ അളവിൽ പൊടിപടലങ്ങൾ ചന്ദ്രന്റെ അന്തരീക്ഷത്തിലേക്ക് ഉയർന്നതായും പ്രാരംഭ റിപ്പോർട്ടുകൾ സൂചിപ്പിക്കുന്നു. ചന്ദ്രനെ വലംവെക്കുന്ന വിവിധ നിരീക്ഷണ പേടകങ്ങൾ വഴിയോ വരും ദിവസങ്ങളിൽ ഈ മേഖലയിലൂടെ കടന്നുപോകുന്ന മറ്റ് ബഹിരാകാശ പേടകങ്ങൾ വഴിയോ കൂട്ടിയിടിയുടെ കൂടുതൽ ചിത്രങ്ങളും വിവരങ്ങളും ലഭ്യമാകുമെന്നാണ് ശാസ്ത്രലോകം പ്രതീക്ഷിക്കുന്നത്. സ്ഫോടനത്തിന്റെ ശേഷിപ്പുകളും അടയാളങ്ങളും കണ്ടെത്തുന്നതിനായി അമേരിക്കയിലെ പ്രമുഖ ഗ്രൗണ്ട് ടെലിസ്കോപ്പുകൾ നിലവിൽ ആ പ്രദേശം തുടർച്ചയായി നിരീക്ഷിച്ചു വരികയാണ്. എങ്കിലും സംഭവത്തിന്റെ വ്യക്തമായ ദൃശ്യങ്ങൾ പുറത്തുവരാൻ ഇനിയും കുറച്ചു ദിവസങ്ങൾ എടുത്തേക്കും.

​നിയന്ത്രണം വിട്ടത് 2025-ലെ ദൗത്യം

​2025 ജനുവരിയിൽ ചന്ദ്രനിലേക്ക് ലാൻഡറുമായി വിക്ഷേപിച്ച ഫാൽക്കൺ 9  റോക്കറ്റിന്റെ ഭാഗമാണ് ഈ അപകടത്തിൽപ്പെട്ടത്. സാധാരണയായി ഉപയോഗശേഷം സ്പേസ് എക്സ് റോക്കറ്റ് ഭാഗങ്ങൾ ഭൂമിയുടെ അന്തരീക്ഷത്തിലേക്ക് തിരികെ പ്രവേശിച്ച് കത്തിത്തീരുകയോ സമുദ്രത്തിൽ സുരക്ഷിതമായി പതിക്കുകയോ ആണ് പതിവ്. എന്നാൽ ഈ പ്രത്യേക ദൗത്യത്തിന്റെ അപ്പർ സ്റ്റേജ് ബഹിരാകാശത്ത് ഒരു വർഷത്തിലേറെയായി വന്യമായ മറ്റൊരു ഭ്രമണപഥത്തിൽ തുടരുകയായിരുന്നു.

​റോക്കറ്റ് ഭാഗം ചന്ദ്രനിൽ ഇടിച്ചിറങ്ങുമെന്ന് കമ്പനി മുൻകൂട്ടി കരുതിയിരുന്നില്ല. സൗരയൂഥത്തിലെ മറ്റു ഗ്രഹങ്ങളുടെ സ്വാധീനവും ചന്ദ്രന്റെ ശക്തമായ ഗുരുത്വാകർഷണവും ചേർന്നാണ് റോക്കറ്റ് ഭാഗത്തെ ചന്ദ്രന്റെ ദിശയിലേക്ക് വലിച്ചടുത്തതെന്ന് നാസയുടെ  സയൻസ് ആന്റ് ഡ്രാഗൺ പ്രോഗ്രാം ഡയറക്ടർ വ്യക്തമാക്കി.

​ഭൂമിക്ക് ഭീഷണിയില്ല; ശാസ്ത്രലോകത്തിന് അപൂർവ്വ അവസരം

​ഈ അപകടം ഭൂമിക്ക് യാതൊരുവിധ ഭീഷണിയും ഉയർത്തുന്നില്ലെന്ന് നാസ അധികൃതർ ഔദ്യോഗികമായി അറിയിച്ചിട്ടുണ്ട്. അതേസമയം, ശാസ്ത്രജ്ഞർക്ക് ഇതൊരു അപൂർവ്വ പഠനാവസരമാണ് പ്രധാനം ചെയ്യുന്നത്. കൃത്രിമമായി ഉണ്ടാകുന്ന ഇത്തരം ആഘാതങ്ങൾ ചന്ദ്രന്റെ ഉപരിതലത്തിൽ വരുത്തുന്ന മാറ്റങ്ങളും, ഭാവി ചാന്ദ്ര ദൗത്യങ്ങളെ ഇവ എങ്ങനെ ബാധിക്കുമെന്നും ആഴത്തിൽ പഠിക്കാൻ ഗവേഷകർ ഈ സംഭവം ഉപയോഗപ്പെടുത്തും.

​ബഹിരാകാശത്ത് വർദ്ധിച്ചുവരുന്ന അവശിഷ്ടങ്ങളും മാലിന്യങ്ങളും ഭാവിയിലെ ഉപഗ്രഹ ദൗത്യങ്ങൾക്ക് വലിയ വെല്ലുവിളിയാകുമെന്ന് ബഹിരാകാശ വിദഗ്ധർ മുന്നറിയിപ്പ് നൽകുന്നു. ചന്ദ്രനിൽ ഇത്തരത്തിൽ പേടകങ്ങൾ തകർന്നുവീഴുന്നത് അപൂർവ്വമാണെങ്കിലും, ഇതിനുമുമ്പ് 2022 മാർച്ചിൽ ഒരു ചൈനീസ് റോക്കറ്റിന്റെ ഭാഗവും സമാനമായ രീതിയിൽ ചന്ദ്രനിൽ പതിച്ചിരുന്നു.