നീതിന്യായത്തെ വെട്ടിച്ച് 6 വർഷം; ഒടുവിൽ വലയിലായി: കുപ്രസിദ്ധ ഒലവക്കോട് കൊലക്കേസിലെ മുഖ്യപ്രതി സുരേഷ് പിടിയിൽ
പാലക്കാട്: മനുഷ്യ മനസ്സാക്ഷിയെ നടുക്കിയ നാലുവയസ്സുകാരിയുടെ കൂട്ടബലാത്സംഗ കൊലപാതക കേസിലെ മുഖ്യപ്രതി ആറു വർഷത്തെ ഒളിവുജീവിതത്തിനൊടുവിൽ പോലീസ് പിടിയിലായി. കേസിലെ ഒന്നാം പ്രതിയായ സുരേഷിനെയാണ് പാലക്കാട് നിന്നുള്ള പ്രത്യേക പോലീസ് സംഘം തമിഴ്നാട്ടിൽ നിന്ന് അതിസാഹസികമായി വളഞ്ഞു പിടികൂടിയത്.
2019 ജനുവരി 12-ന് രാത്രിയാണ് നാടിനെ വിറങ്ങലിപ്പിച്ച ദാരുണ സംഭവം നടന്നത്. ഭിക്ഷാടന മാഫിയയുമായി ബന്ധമുള്ള സംഘം നാല് വയസ്സുള്ള പിഞ്ചുകുഞ്ഞിനെ ക്രൂരമായി പീഡിപ്പിച്ച് കൊലപ്പെടുത്തുകയായിരുന്നു. സംഭവം നടന്ന് മൂന്നാം ദിവസം ഒലവക്കോട് റെയിൽവേ ട്രാക്കിന് സമീപത്തുനിന്ന് ചാക്കിൽ കെട്ടിയ നിലയിലാണ് കുട്ടിയുടെ അഴുകിയ മൃതദേഹം കണ്ടെത്തിയത്.
രണ്ട് സ്ത്രീകൾ ഉൾപ്പെടെ അഞ്ച് പേരായിരുന്നു കേസിൽ പ്രതികൾ. കേസ് അന്വേഷണം ഊർജ്ജിതമാക്കിയ പോലീസ് ദിവസങ്ങൾക്കകം തന്നെ അഞ്ചു പ്രതികളെയും വലയിലാക്കിയിരുന്നു. തുടർന്ന് നടന്ന കോടതി നടപടികൾക്കിടയിൽ മൂന്നും അഞ്ചും പ്രതികളെ കോടതി ശിക്ഷിച്ചു.
എന്നാൽ വിചാരണ വേളയിൽ ജാമ്യത്തിലിറങ്ങിയ ഒന്നാം പ്രതി സുരേഷ്, രണ്ടാം പ്രതി പടയപ്പ, നാലാം പ്രതിയായ സുരേഷിന്റെ ഭാര്യ എന്നിവർ മുങ്ങുകയായിരുന്നു. പ്രതികളെ കണ്ടെത്താൻ പോലീസ് ലുക്കൗട്ട് നോട്ടീസ് പുറപ്പെടുവിക്കുകയും 2020-ൽ ഇവരെ കോടതി പിടികിട്ടാപ്പുള്ളികളായി പ്രഖ്യാപിക്കുകയും ചെയ്തു.
വിവിധ സംസ്ഥാനങ്ങളിൽ വ്യാജ പേരുകളിൽ ഒളിവിൽ കഴിഞ്ഞുവരികയായിരുന്ന സുരേഷിനെക്കുറിച്ച് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് പോലീസ് തമിഴ്നാട്ടിലെത്തി അറസ്റ്റ് രേഖപ്പെടുത്തിയത്. അതേസമയം, കേസിൽ ഇനി പിടിയിലാകാനുള്ള രണ്ടാം പ്രതി പടയപ്പയ്ക്കും നാലാം പ്രതിയായ സുരേഷിന്റെ ഭാര്യയ്ക്കുമായി പോലീസ് അന്വേഷണം ഊർജ്ജിതമാക്കിയിട്ടുണ്ട്
Comments
Post a Comment