5,100 രൂപയിൽ തീർന്ന അച്ഛനോടുള്ള കടമ; മരണത്തിലും മക്കൾ എത്തിയില്ല; സംസ്കാരച്ചടങ്ങുകൾക്ക് അയച്ചത് 5,100 രൂപ, വിഡിയോ കോൾ വഴി അന്ത്യയാത്ര!

 

സോനിപ്പത്ത്: ജന്മം നൽകി പോറ്റി വളർത്തിയ അച്ഛൻ വാർദ്ധക്യത്തിന്റെ ആകുലതകളിൽ ഒടുവിൽ കണ്ണടച്ചപ്പോൾ, ഒന്നു കാണാൻ പോലും എത്താതിരുന്ന മക്കൾ കടമ തീർത്തത് വെറുമൊരു 5,100 രൂപയിൽ! ഹരിയാനയിലെ സോനിപ്പത്തിലുള്ള വൃദ്ധസദനത്തിൽ അന്തരിച്ച ശിവ്ചരൺ റാം റതൻ ഗുപ്ത എന്ന വയോധികന്റെ അന്ത്യയാത്രയാണ് സാങ്കേതികവിദ്യയുടെ കാലത്തും മനുഷ്യത്വത്തിന്റെയും കുടുംബബന്ധങ്ങളുടെയും ജീർണത വെളിവാക്കുന്ന നടുക്കുന്ന ഓർമ്മയാകുന്നത്.

​ശിവ്ചരൺ രാമിന്റെ ആരോഗ്യനില വൻതോതിൽ മോശമാണെന്ന വിവരം വൃദ്ധസദനം അധികൃതർ മുൻകൂട്ടി തന്നെ അദ്ദേഹത്തിന്റെ മൂന്ന് പെൺമക്കളെയും അറിയിച്ചിരുന്നു. എന്നാൽ മരണത്തോട് മല്ലിടുമ്പോഴും അച്ഛനെ ഒന്ന് കാണാനോ ആശ്വാസവാക്ക് പറയാനോ മക്കളിൽ ഒരാൾ പോലും എത്തിയില്ല. ഒടുവിൽ അദ്ദേഹം വാർദ്ധക്യമന്ദിരത്തിലെ മുറിയിൽ വെച്ച് മരണത്തിന് കീഴടങ്ങി.

​അച്ഛന്റെ വേർപാടറിഞ്ഞിട്ടും നേരിട്ടെത്താൻ മക്കൾ തയ്യാറായില്ല. പകരം സംസ്കാരച്ചടങ്ങുകൾ നടത്താനായി 5,100 രൂപ വൃദ്ധസദനം അധികൃതർക്ക് ബാങ്ക് അക്കൗണ്ട് വഴി അയച്ചുനൽകുകയാണ് മക്കൾ ചെയ്തത്. അന്ത്യകർമങ്ങൾ നേരിട്ട് കാണുന്നതിന് പകരം സ്ക്രീനിലൂടെ 'വീഡിയോ കോൾ' വഴി പങ്കെടുക്കുക മാത്രമാണ് ഇവർ ചെയ്തത്. എന്ന് തന്നെയുമല്ല, ചടങ്ങുകൾ മുഴുവനായി റെക്കോർഡ് ചെയ്ത് ഫോണിലേക്ക് അയച്ചുതരണമെന്ന വിചിത്രവും വേദനാജനകവുമായ ആവശ്യവും മക്കളിലൊരാൾ അധികൃതർക്ക് മുന്നിൽ വെച്ചു.

​പിതാവിന്റെ അന്ത്യകർമങ്ങൾ പോലും ഒരു ചടങ്ങ് പോലെ പണം നൽകി നിർവ്വഹിച്ച മക്കളുടെ ക്രൂരമായ അവഗണനയെ തുടർന്ന്, വൃദ്ധസദനത്തിലെ ജീവനക്കാരും പ്രദേശത്തെ സന്നദ്ധപ്രവർത്തകരും ചേർന്നാണ് അന്ത്യകർമങ്ങൾ പൂർത്തിയാക്കിയത്. ആയുസ്സിന്റെ നല്ലൊരു പങ്കും മക്കളുടെ വളർച്ചയ്ക്കായി മാറ്റിവെച്ച മാതാപിതാക്കൾ ഒടുവിൽ ജീവിതത്തിന്റെ അവസാന നാളുകളിൽ വൃദ്ധസദനങ്ങളിലേക്ക് തള്ളപ്പെടുന്നതും, മരണശേഷവും വെറുമൊരു വീഡിയോ കോളിലേക്ക് ഒതുങ്ങിപ്പോകുന്നതും സമൂഹത്തിൽ വലിയ പ്രതിഷേധത്തിനും നൊമ്പരത്തിനും ഇടയാക്കിയിട്ടുണ്ട്.