നിയന്ത്രണം വിട്ട കാർ മതിലിലും സ്കൂട്ടറിലും ഇടിച്ചു; എട്ടുവയസ്സുകാരി ഉൾപ്പെടെ 4 പേർക്ക് പരിക്ക്
അത്തോളി: കൊയിലാണ്ടി-താമരശ്ശേരി സംസ്ഥാനപാതയിലെ കന്നൂർ ടൗണിൽ കാർ നിയന്ത്രണം വിട്ട് മതിലിലും സ്കൂട്ടറിലും ഇടിച്ച് നാല് പേർക്ക് പരിക്കേറ്റു. കാർ യാത്രക്കാരായ പുത്തൻചേരി ഉള്ളൂർ കടവ് സ്വദേശികളായ വൈഷ്ണവ് (28), ആദർശ് (22), നിധിൻ (29), സ്കൂട്ടർ യാത്രികയായ എട്ടുവയസ്സുകാരി അനിക എന്നിവർക്കാണ് പരിക്കേറ്റത്.
വ്യാഴാഴ്ചയായിരുന്നു അപകടം. കൊയിലാണ്ടി ഭാഗത്തേക്ക് വരികയായിരുന്ന കാർ നിയന്ത്രണം വിട്ട് റോഡരികിലെ മതിലിൽ ഇടിക്കുകയും തുടർന്ന് ഉള്ളിയേരി ഭാഗത്തേക്ക് വരികയായിരുന്ന സ്കൂട്ടറിൽ തട്ടുകയുമായിരുന്നു. ഇടിയുടെ ആഘാതത്തിൽ ഇരുവാഹനങ്ങൾക്കും കാര്യമായ കേടുപാടുകൾ സംഭവിച്ചിട്ടുണ്ട്.
നാട്ടുകാരും പ്രദേശവാസികളും ഉടൻ തന്നെ രക്ഷാപ്രവർത്തനം നടത്തി പരിക്കേറ്റവരെ കൊയിലാണ്ടി താലൂക്ക് ആശുപത്രിയിൽ എത്തിച്ചു. പ്രാഥമിക ചികിത്സയ്ക്ക് ശേഷം പരിക്കുകൾ ഗുരുതരമായതിനാൽ ഇവരെ കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി.
സംഭവമറിഞ്ഞ് അത്തോളി പോലീസ് സ്ഥലത്തെത്തി തുടർനടപടികൾ സ്വീകരിച്ചു. അപകടത്തെത്തുടർന്ന് സംസ്ഥാനപാതയിൽ അൽപ്പസമയം ഗതാഗതം തടസ്സപ്പെട്ടു.
Comments
Post a Comment