അച്ഛൻ തട്ടിയെറിഞ്ഞ ബന്ധങ്ങൾ കാലം തിരികെ നൽകി:അമ്മയുടെ ദാരുണ ഓർമ്മയും തെരുവിലെ വിശപ്പും കടന്ന്... 26 വർഷങ്ങൾക്ക് ശേഷം നാല് കൂടപ്പിറപ്പുകൾ ഒരേ കുടക്കീഴിൽ

 

കണ്ണൂർ: അച്ഛന്റെ ക്രൂരതയും അമ്മയുടെ ദാരുണമായ വേർപാടും കാരണം ബാല്യത്തിൽ തന്നെ അനാഥത്വത്തിലേക്ക് തള്ളപ്പെടുകയും വെവ്വേറെ വഴികളിലേക്ക് ചിതറിപ്പോവുകയും ചെയ്ത നാല് സഹോദരങ്ങൾ നീണ്ട 26 വർഷത്തെ കാത്തിരിപ്പിനൊടുവിൽ വീണ്ടും ഒന്നിച്ചു. അഞ്ചാം വയസ്സിൽ വേർപിരിഞ്ഞുപോയ സഹോദരിയെയും സഹോദരന്മാരെയും കണ്ടുമുട്ടിയപ്പോൾ കണ്ടുനിന്നവരുടെയെല്ലാം കണ്ണുനിറയ്ക്കുന്ന അപൂർവ്വ നിമിഷങ്ങൾക്കാണ് ആലക്കോട്ടെ 'ആശ്രയ ശിശുഭവൻ' സാക്ഷ്യം വഹിച്ചത്.

​ദാരുണമായ ബാല്യം, തെരുവിലെ ദുരിതങ്ങൾ

​തമിഴ്നാട്ടിലെ കള്ളക്കുറിച്ചിയിലാണ് നടുക്കുന്ന ഈ ജീവിതകഥയുടെ തുടക്കം. മദ്യപാനിയായ അച്ഛൻ മാരിമുത്തുവിന്റെ ക്രൂരത താങ്ങാനാവാതെ നാല് പിഞ്ചുമക്കളുടെ മുന്നിൽ വെച്ച് അമ്മ സ്വയം തീ കൊളുത്തി മരിക്കുകയായിരുന്നു. അമ്മയുടെ ദാരുണമായ വിയോഗത്തിന് സാക്ഷികളാകേണ്ടി വന്ന അഞ്ചു വയസ്സുകാരി സരസു, നാലു വയസ്സുകാരി ശരണ്യ, ചെറിയ അനുജന്മാരായ സുരേഷ്, ഉമേഷ് എന്നിവരുടെ ജീവിതം തുടർന്ന് കൂടുതൽ ദുരിതത്തിലായി.

​അമ്മയുടെ മരണശേഷം അച്ഛൻ മാരിമുത്തു രണ്ടാമത്തെ മകളായ ശരണ്യയെ മറ്റൊരാൾക്ക് വളർത്താൻ വിട്ടുകൊടുത്തു. തുടർന്ന് ബാക്കി മൂന്ന് കുട്ടികളുമായി ഇയാൾ കേരളത്തിലേക്ക് കടന്നു. കണ്ണൂരിലെ വഴിയോരങ്ങളിൽ ആക്രി പെറുക്കി ജീവിച്ച ഈ കുടുംബത്തിന്റെ ജീവിതം വിശപ്പും ഭയവും നിറഞ്ഞതായിരുന്നു.

​രക്ഷകരായി കലയപുരം ജോസും മിനിയും

​2002-ൽ കണ്ണൂർ ആലക്കോട്ടുവെച്ച് വിശപ്പുസഹിക്കാനാവാതെ കരയുന്ന കൊച്ചു സരസുവിനെയും അനിയന്മാരെയും കലയപുരം ജോസും ഭാര്യ മിനിയും കാണാനിടയായി. തെരുവിൽ ഉപേക്ഷിക്കപ്പെട്ട നിലയിലായ ആ മൂന്ന് കുട്ടികളെയും അവർ ദത്തെടുക്കുകയും അവരുടെ സംരക്ഷണം ഏറ്റെടുക്കുകയും ചെയ്തു. ഈ കുട്ടികൾക്ക് അഭയമേകാനാണ് പിന്നീട് 'ആശ്രയ ശിശുഭവൻ' എന്ന ചാരിറ്റബിൾ പ്രസ്ഥാനം രൂപീകൃതമാകുന്നത്.

​ആശ്രയയുടെ സ്നേഹത്തണലിൽ വളർന്ന മൂവരും ഉയർന്ന വിദ്യാഭ്യാസവും നേടി. സരസു സോഷ്യൽ വർക്കിൽ മാസ്റ്റർ ബിരൂദം (MSW) സ്വന്തമാക്കി. രണ്ടു വർഷം മുൻപ് ആശ്രയയുടെ മുൻകൈയിൽ തന്നെ സരസുവിന്റെ വിവാഹവും നടന്നു.

​മനസ്സിൽ മായാത്ത സഹോദരിയുടെ ഓർമ്മ

​   സ്വന്തം കാലിൽ നിലയുറപ്പിച്ചപ്പോഴും, അഞ്ചാം വയസ്സിൽ വേർപിരിഞ്ഞുപോയ അനിയത്തി ശരണ്യ എവിടെയായിരിക്കും എന്ന ചിന്ത സരസുവിനെയും സഹോദരങ്ങളെയും വേട്ടയാടിക്കൊണ്ടിരുന്നു. മറുഭാഗത്ത്, സേലത്ത് വളർന്ന ശരണ്യ എം.എഡ് പൂർത്തിയാക്കി അധ്യാപികയായി ജോലി നേടി, ഭർത്താവ് രഘുറാമിനൊപ്പം ഹൈദരാബാദിൽ സ്ഥിരതാമസമാക്കിയെങ്കിലും തന്റെ കൂടപ്പിറപ്പുകളെ കണ്ടെത്തണമെന്ന ആഗ്രഹം മനസ്സിൽ സൂക്ഷിച്ചിരുന്നു.

​ഭർത്താവ് രഘുറാമിന്റെ പിന്തുണയോടെ ശരണ്യ സഹോദരങ്ങൾക്കായുള്ള അന്വേഷണം ശക്തമാക്കി. തുടർന്ന് നടത്തിയ തിരച്ചിലുകൾക്കിടയിലാണ് രണ്ടു വർഷം മുൻപ് മാധ്യമങ്ങളിൽ വന്ന സരസുവിന്റെ വിവാഹവാർത്തയും ചിത്രങ്ങളും രഘുറാമിന്റെ ശ്രദ്ധയിൽപ്പെടുന്നത്. ഫോട്ടോയിലെ സരസുവിന്റെ മുഖത്തിന് ശരണ്യയുമായുള്ള അദ്ഭുതകരമായ സാദൃശ്യം കണ്ടതോടെ സംശയം ബലപ്പെടുകയും അവർ ആലക്കോട്ടെ ആശ്രയ ശിശുഭവനുമായി ബന്ധപ്പെടുകയുമായിരുന്നു.

​വൈകാരികമായ കണ്ടുമുട്ടൽ

​സംശയം സത്യമാണെന്ന് ഉറപ്പിച്ചതോടെ ശരണ്യ ഭർത്താവിനും മക്കൾക്കുമൊപ്പം ഹൈദരാബാദിൽ നിന്നും ഉടൻ തന്നെ കണ്ണൂരിലെത്തി. വിവരമറിഞ്ഞ് സരസുവും സഹോദരങ്ങളും ഓടിയെത്തിയപ്പോൾ ആശ്രയയുടെ മുറ്റത്ത് വിങ്ങിപ്പൊട്ടുന്ന വൈകാരിക രംഗങ്ങളാണ് അരങ്ങേറിയത്.

​26 വർഷത്തെ നീണ്ട ഇടവേളയ്ക്ക് ശേഷം നാലു കൂടപ്പിറപ്പുകളും പരസ്പരം കെട്ടിപ്പിടിച്ച് കണ്ണീർ വാർത്തു. ആശ്രയയുടെ അമരക്കാരായ കലയപുരം ജോസും ഭാര്യ മിനിയും ശിശുഭവനിലെ മറ്റ് അംഗങ്ങളും ഈ പുനഃസമാഗമത്തിന് സാക്ഷികളായി. വിധിയുടെ ക്രൂരതയിൽ ചിതറിപ്പോയ ആ കുടുംബം കാൽ നൂറ്റാണ്ടിനു ശേഷം വീണ്ടും ഒരേ കുടക്കീഴിൽ ഒന്നിച്ചതിന്റെ സന്തോഷത്തിലാണ് ഇപ്പോൾ.