200 മീറ്റർ മുൻപേ ബ്രേക്ക് പോയി; പോത്തുണ്ടിയിൽ KSRTC ബസ് താഴ്ചയിലേക്ക് ഇടിച്ചിറങ്ങി

 

പോത്തുണ്ടി: നെല്ലിയാമ്പതി പാതയിലെ തേക്കിൻകാട് ഭാഗത്ത് കെ.എസ്.ആർ.ടി.സി ബസ് നിയന്ത്രണം വിട്ട് താഴ്ചയിലേക്ക് ഇടിച്ചിറങ്ങി ഉണ്ടായ അപകടത്തിൽ പരിക്കേറ്റവരുടെ കൂടുതൽ വിവരങ്ങൾ പുറത്തുവന്നു. ബസിലുണ്ടായിരുന്ന 72 യാത്രക്കാരിൽ ആറു പേർക്ക് ഗുരുതരമായി പരിക്കേറ്റിട്ടുണ്ട്. ഇതിൽ പാലക്കാട് ജില്ലാ ആശുപത്രിയിൽ ചികിത്സയിൽ കഴിയുന്ന രണ്ടുപേരുടെ ആരോഗ്യനില അതീവ ഗുരുതരമായി തുടരുകയാണ്.

​അപകടത്തിൽ നെല്ലിയാമ്പതി ഗവൺമെന്റ് ഓറഞ്ച് ഫാമിലെ തൊഴിലാളിയായ ജയന്തി സംഭവസ്ഥലത്തുതന്നെ മരണപ്പെട്ടിരുന്നു. തലയ്ക്ക് ഗുരുതരമായി പരിക്കേറ്റ നെല്ലിയാമ്പതി സ്വദേശിനി കലാവതി (58) ഉൾപ്പെടെയുള്ളവരാണ് ജില്ലാ ആശുപത്രിയിലെ തീവ്രപരിചരണ വിഭാഗത്തിൽ കഴിയുന്നത്. ഗുരുതരമായി പരിക്കേറ്റ മറ്റ് അഞ്ചുപേർക്ക് പുറമെ എട്ടുപേർ കൂടി ഇവിടെ ചികിത്സയിലുണ്ട്. എന്നാൽ ഇവരുടെ പരിക്ക് ഗുരുതരമല്ലെന്നാണ് പ്രാഥമിക റിപ്പോർട്ടുകൾ. ബാക്കിയുള്ള യാത്രക്കാർക്ക് പ്രാഥമിക ചികിത്സ നൽകിയ ശേഷം വിട്ടയച്ചു.

​അപകടസ്ഥലത്തിന് ഏകദേശം 200 മീറ്റർ മുൻപ് തന്നെ ബസിന്റെ ബ്രേക്ക് നഷ്ടപ്പെട്ടതായി കണ്ടക്ടർ പ്രസന്നകുമാർ വെളിപ്പെടുത്തി. ബ്രേക്ക് നഷ്ടപ്പെട്ട വിവരം ഡ്രൈവർ വിജയൻ ഉറക്കെ വിളിച്ചുപറഞ്ഞതോടെ യാത്രക്കാർ വലിയ പരിഭ്രാന്തിയിലാവുകയും നിലവിളിക്കുകയും ചെയ്തു. തൊട്ടുപിന്നാലെ നിയന്ത്രണം വിട്ട ബസ് സമീപത്തെ താഴ്ചയിലേക്ക് ഇടിച്ചിറങ്ങുകയായിരുന്നു.

​അപകടം നടന്നയുടൻ കണ്ടക്ടർ പ്രസന്നകുമാറിന്റെ നേതൃത്വത്തിൽ രക്ഷാപ്രവർത്തനം ആരംഭിച്ചു. വിവരമറിഞ്ഞ് മിനുട്ടുകൾക്കകം നാട്ടുകാരും പോലീസും ഫയർഫോഴ്സും സ്ഥലത്തെത്തി ബസിനുള്ളിൽ കുടുങ്ങിയ മുഴുവൻ ആളുകളെയും പുറത്തെടുത്ത് ആശുപത്രിയിലേക്ക് മാറ്റി.

​അപകടത്തിന്റെ കാരണം സംബന്ധിച്ച് മോട്ടോർ വാഹന വകുപ്പും (MVD) പോലീസും അന്വേഷണം ആരംഭിച്ചിട്ടുണ്ട്. ബസിന്റെ ബ്രേക്ക് നഷ്ടപ്പെടാനുണ്ടായ സാങ്കേതിക തകരാറുകൾ ഉൾപ്പെടെയുള്ള കാര്യങ്ങൾ വിദഗ്ദ്ധ സംഘം പരിശോധിച്ച് വരികയാണെന്ന് അധികൃതർ അറിയിച്ചു.