​20 രൂപ റീഫണ്ട് ഇനിയില്ല: ബെവ്കോയുടെ പ്ലാസ്റ്റിക് കുപ്പി സ്വീകരിക്കൽ പദ്ധതിക്ക് പൂട്ട്

 

തിരുവനന്തപുരം: വലിയ പ്രാധാന്യത്തോടെ ആരംഭിച്ച പ്ലാസ്റ്റിക് കുപ്പി തിരികെ വാങ്ങൽ പദ്ധതിയിൽ നിന്ന് ബീവറേജസ് കോർപ്പറേഷൻ (ബെവ്കോ) പിന്മാറുന്നു. വ്യാഴാഴ്ച മുതൽ ബെവ്കോ ഔട്ട്ലെറ്റുകളിൽ പ്ലാസ്റ്റിക് കുപ്പികൾ സ്വീകരിക്കില്ലെന്ന് വ്യക്തമാക്കി ബെവ്കോ മാനേജിംഗ് ഡയറക്ടർ ഉത്തരവിറക്കി. പദ്ധതി പിൻവലിച്ചതിനൊപ്പം ഔട്ട്ലെറ്റുകളിൽ നടപ്പിലാക്കിയിരുന്ന ഷിഫ്റ്റ് സമ്പ്രദായവും നിർത്തലാക്കിയിട്ടുണ്ട്.

​ജീവനക്കാരുടെ കടുത്ത ജോലിഭാരവും സംഭരിച്ച കുപ്പികൾ സംസ്കരിക്കുന്നതിലെ പരിസ്ഥിതി-പരിപാലന പ്രശ്നങ്ങളുമാണ് പദ്ധതി ഉപേക്ഷിക്കാൻ കാരണമായി ബെവ്കോ ചൂണ്ടിക്കാണിക്കുന്നത്. പ്ലാസ്റ്റിക് മദ്യക്കുപ്പികൾ വഴിപരിസരങ്ങളിൽ ഉപേക്ഷിക്കുന്നത് തടയാനായി തിരുവനന്തപുരത്തെയും കണ്ണൂരിലെയും 20 ഔട്ട്ലെറ്റുകളിൽ പരീക്ഷണാടിസ്ഥാനത്തിലാണ് കഴിഞ്ഞ ഒക്ടോബറിൽ പദ്ധതിക്ക് തുടക്കമിട്ടത്. തുടർന്ന് പദ്ധതി സംസ്ഥാന വ്യാപകമാക്കുമെന്നും പ്രഖ്യാപിച്ചിരുന്നു.

​പ്ലാസ്റ്റിക് കുപ്പിയിലുള്ള മദ്യം വിൽക്കുമ്പോൾ 20 രൂപ അധിക നിക്ഷേപമായി ഈടാക്കുകയും, പിന്നീട് ഒഴിഞ്ഞ കുപ്പി തിരികെ നൽകുമ്പോൾ ഈ തുക ഉപഭോക്താവിന് റീഫണ്ട് നൽകുകയും ചെയ്യുന്നതായിരുന്നു 'ഡിപ്പോസിറ്റ് റീഫണ്ട് സ്കീം'. ഏത് ഔട്ട്ലെറ്റിൽ നിന്ന് വാങ്ങുന്ന കുപ്പിയും സംസ്ഥാനത്തെ ഏത് ഔട്ട്ലെറ്റിലും തിരികെ നൽകാനുള്ള സൗകര്യത്തോടെ ജനുവരി മുതൽ എല്ലാ ബെവ്കോ, കൺസ്യൂമർഫെഡ് കേന്ദ്രങ്ങളിലും ഇത് നടപ്പാക്കാൻ തീരുമാനിച്ചിരുന്നെങ്കിലും മുന്നൊരുക്കങ്ങളുടെ അഭാവം മൂലം മുടങ്ങുകയായിരുന്നു.

​പദ്ധതി നടപ്പിലാക്കുന്നതിനെതിരെ കൺസ്യൂമർഫെഡ് എതിർപ്പ് പ്രകടിപ്പിച്ചതും ശേഖരിക്കുന്ന കുപ്പികൾ മാറ്റുന്നതിനായി വിളിച്ച ടെൻഡറിൽ അനുയോജ്യമായ ഏജൻസികളെ കണ്ടെത്താൻ കഴിയാത്തതും തിരിച്ചടിയായി. കൂടാതെ, പലരും ചാക്കുകണക്കിന് കുപ്പികൾ ഒരുമിച്ച് ഔട്ട്ലെറ്റുകളിൽ എത്തിക്കാൻ തുടങ്ങിയതോടെ ബില്ലിംഗും വിതരണവും തടസ്സപ്പെടുകയും ജീവനക്കാർ കടുത്ത പ്രതിസന്ധിയിലാവുകയും ചെയ്തു. തുടർന്നാണ് പദ്ധതി പൂർണ്ണമായി ഒഴിവാക്കാൻ അധികൃതർ തീരുമാനിച്ചത്.