കാട്ടുപന്നികൾക്ക് വീണ്ടും ‘റെഡ് അലർട്ട്’: കൂരാച്ചുണ്ടിൽ വേട്ട ഊർജിതം; ഇന്നും തുടരുന്നു

 

കൂരാച്ചുണ്ട്: കൂരാച്ചുണ്ട്: മേഖലയിൽ ഭീതിവിതയ്ക്കുന്ന കാട്ടുപന്നി ശല്യത്തിന് പരിഹാരം കാണാൻ കൂരാച്ചുണ്ട് ഗ്രാമപഞ്ചായത്ത് ഭരണസമിതിയുടെ നേതൃത്വത്തിൽ ആരംഭിച്ച പന്നിവേട്ട കൂടുതൽ ഊർജിതമാക്കി. കഴിഞ്ഞ ദിവസങ്ങളിൽ നടന്ന വിജയകരമായ പന്നിവേട്ടയ്ക്ക് പിന്നാലെ, ചൊവ്വാഴ്ച രാവിലെയോടെ വിവിധ വാർഡുകൾ കേന്ദ്രീകരിച്ച് വേട്ട തുടരുകയാണ്.

​എംപാനൽ ഷൂട്ടർ ചുവപ്പുങ്കൽ രാജേഷിന്റെ നേതൃത്വത്തിലാണ് പ്രദേശത്ത് കാട്ടുപന്നികളെ വെടിവെച്ചു വീഴ്ത്തുന്നത്. കഴിഞ്ഞ ദിവസങ്ങളിൽ മേഖലയിലെ ഒട്ടേറെ കാട്ടുപന്നികളെ വെടിവെച്ചുകൊന്നിരുന്നു. കാർഷിക മേഖലകളിൽ വൻ നാശനഷ്ടമുണ്ടാക്കുകയും ജനങ്ങളുടെ ജീവന് ഭീഷണിയാവുകയും ചെയ്ത സാഹചര്യത്തിലാണ് ഭരണസമിതി ഈ ശക്തമായ നടപടിയിലേക്ക് കടന്നത്.

​വെടിവെച്ചുകൊല്ലുന്ന പന്നികളെ വനംവകുപ്പിന്റെ കടുത്ത മാർഗനിർദേശങ്ങൾ പാലിച്ച്, മണ്ണെണ്ണയൊഴിച്ച് സുരക്ഷിതമായി കുഴിച്ചുമൂടുകയാണ് ചെയ്യുന്നത്. ഇതിന്റെ ഭാഗമായി ഒന്നാം വാർഡ് പള്ളിക്കുന്ന് ഭാഗത്ത് വെടിവെച്ചുവീഴ്ത്തിയ പന്നിയെ കീർത്തി ചന്ദ്രന്റെ പറമ്പിൽ മണ്ണെണ്ണയൊഴിച്ച് കുഴിച്ചുമൂടി. അഗസ്റ്റിൻ നടക്കൽ, ജോൺസൺ വിലങ്ങാട് എന്നിവരുടെ സാന്നിധ്യത്തിലാണ് നടപടികൾ പൂർത്തിയാക്കിയത്. വരും ദിവസങ്ങളിലും വിവിധ വാർഡുകളിൽ പരിശോധനയും പന്നിവേട്ടയും തുടരുമെന്ന് അധികൃതർ അറിയിച്ചു.

​രാത്രികാല വേട്ട ശക്തമാക്കും; കൂടുതൽ ഷൂട്ടർമാരെ ഉൾപ്പെടുത്തും

​നിലവിൽ പഞ്ചായത്തിൽ രജിസ്റ്റർ ചെയ്തിട്ടുള്ള നാല് എംപാനൽ ഷൂട്ടർമാരുടെ സേവനം ഉപയോഗപ്പെടുത്തി രാത്രികാലങ്ങളിലെ വേട്ട കൂടുതൽ ശക്തമാക്കാനാണ് പഞ്ചായത്ത് ഭരണസമിതിയുടെ തീരുമാനം.

• ​എംപാനൽ ലിസ്റ്റ് വിപുലീകരിക്കും: പഞ്ചായത്തിന് അകത്തും പുറത്തുമുള്ള കൂടുതൽ ലൈസൻസുള്ള ഷൂട്ടർമാരെ ഉൾപ്പെടുത്തി എംപാനൽ പട്ടിക വിപുലീകരിക്കും.
• ​ഷൂട്ടർമാരുടെ സേവനം ലഭ്യമാക്കും: പന്നിശല്യം മൂലം ജനങ്ങൾ ബുദ്ധിമുട്ടുന്ന പ്രദേശങ്ങളിൽ അടിയന്തരമായി ഇത്തരം ഷൂട്ടർമാരുടെ സേവനം നേരിട്ട് ലഭ്യമാക്കാനുള്ള സൗകര്യവുമൊരുക്കും.
• ​3 ലക്ഷം രൂപ നീക്കിവെച്ചു: 2026-27 സാമ്പത്തിക വർഷത്തെ പഞ്ചായത്ത് പദ്ധതിയിൽ കാട്ടുപന്നിവേട്ടയ്ക്കായി പ്രത്യേകം 3 ലക്ഷം രൂപ നീക്കിവെച്ചിട്ടുണ്ട്.

​കർഷകരും തൊഴിലാളികളും കടുത്ത ഭീതിയിൽ

​അഞ്ചു മാസം മുൻപ് പഞ്ചായത്തിന്റെ നേതൃത്വത്തിൽ നടത്തിയ രണ്ടു പ്രത്യേക ഡ്രൈവുകളിലായി 33 കാട്ടുപന്നികളെ കൊന്നൊടുക്കിയിരുന്നു. എന്നാൽ ഇതിനുശേഷവും പഞ്ചായത്തിലെ വിവിധ ഭാഗങ്ങളിൽ കാട്ടുപന്നിക്കൂട്ടം ഇറങ്ങി വ്യാപക നാശനഷ്ടമാണ് വരുത്തിവെക്കുന്നത്.

​വാഴ, കപ്പ, ചേന, ചേമ്പ് തുടങ്ങിയ കർഷകരുടെ പ്രധാന വിളകളെല്ലാം പന്നികൾ കൂട്ടത്തോടെയെത്തി നശിപ്പിക്കുകയാണ്. കൂടാതെ, പുലർച്ചെയും രാത്രികാലങ്ങളിലും ടാപ്പിംഗിനും മറ്റ് ആവശ്യങ്ങൾക്കുമായി പുറത്തിറങ്ങുന്ന തൊഴിലാളികളും നാട്ടുകാരും പന്നികളുടെ ആക്രമണ ഭീതിയിലായിരുന്നു. പഞ്ചായത്ത് നടപടികൾ ശക്തമാക്കിയതോടെ പന്നിശല്യത്തിന് ശാശ്വത പരിഹാരമാകുമെന്ന പ്രതീക്ഷയിലാണ് പ്രാദേശികവാസികൾ.