ഏഴ് മക്കൾ, എന്നിട്ടും വിശപ്പും കണ്ണീരും; അമ്പലനടയിൽ അഭയം തേടിയ വൃദ്ധദമ്പതികൾക്ക് തുണയായി ക്ഷേത്രനട

 

മാവേലിക്കര: ഏഴ് മക്കളെ കഷ്ടപ്പെട്ട് വളർത്തി വലുതാക്കിയ വൃദ്ധദമ്പതികൾക്ക് ഒടുവിൽ അഭയമായത് ക്ഷേത്രനട. വിശപ്പും കണ്ണീരുമായി ക്ഷേത്രത്തിലെത്തിയ വയോധികരായ അച്ഛനെയും അമ്മയെയും ഏറ്റെടുക്കാൻ സ്വന്തം മക്കൾ വിസമ്മതിച്ചതോടെ, ഒടുവിൽ മാവേലിക്കര പോലീസും ക്ഷേത്രഭാരവാഹികളും ചേർന്ന് അവർക്ക് സുരക്ഷിതമായ അഭയമൊരുക്കി.

​ഉച്ചപൂജാ സമയത്താണ് അവശരായ നിലയിൽ വൃദ്ധദമ്പതികൾ ക്ഷേത്രത്തിലെത്തിയത്. ദേവിയുടെ മുന്നിൽ നിന്ന് വിതുമ്പിക്കരയുന്ന ഇവരെ ശ്രദ്ധയിൽപ്പെട്ട ഭക്തർ കാര്യമന്വേഷിച്ചപ്പോഴാണ് ഹൃദയഭേദകമായ ആ സത്യം പുറത്തറിഞ്ഞത്. രണ്ടു ദിവസമായി ഒന്നും കഴിച്ചിട്ടില്ലെന്ന് പറഞ്ഞ അവർ പൊട്ടിക്കരഞ്ഞു. ഉടൻ തന്നെ ക്ഷേത്രഭാരവാഹികൾ ഇവരെ ശ്രീദേവി വിലാസം ഹിന്ദുമത കൺവെൻഷൻ ഓഫീസിലെത്തിച്ച് ഭക്ഷണം നൽകി.

​തുടർന്ന് നടത്തിയ അന്വേഷണത്തിൽ ഞെട്ടിപ്പിക്കുന്ന വിവരങ്ങളാണ് പുറത്തുവന്നത്. സാമ്പത്തികമായി ഭദ്രരായ രണ്ട് ആൺമക്കളും അഞ്ച് പെൺമക്കളും ഇവർക്കുണ്ട്. കൂലിപ്പണി ചെയ്ത് കുടുംബം പുലർത്തിയിരുന്ന അച്ഛന് പക്ഷാഘാതം വന്നതോടെ പണിക്ക് പോകാൻ കഴിയാതായി. കാഴ്ചക്കുറവുള്ള അമ്മയും കഷ്ടപ്പാടിലായി.

​ഭാരവാഹികൾ മക്കളുമായി ബന്ധപ്പെട്ടെങ്കിലും ആരും മാതാപിതാക്കളെ ഏറ്റെടുക്കാൻ തയ്യാറായില്ലെന്നു മാത്രമല്ല, അവരെ കുറ്റപ്പെടുത്തുന്ന സമീപനമാണ് സ്വീകരിച്ചത്. അച്ഛനെയും അമ്മയെയും ഉപേക്ഷിച്ച മക്കളുടെ ക്രൂരതയ്ക്കെതിരെ നാട് ഒന്നടങ്കം പ്രതിഷേധത്തിലാണ്.

​രാത്രി വൈകിയും മക്കളുടെ ഭാഗത്തുനിന്ന് അനുകൂലമായ നടപടി ഉണ്ടാകില്ലെന്ന് ഉറപ്പായതോടെ ക്ഷേത്രഭാരവാഹികൾ മാവേലിക്കര ജനമൈത്രി പോലീസിൽ വിവരം അറിയിച്ചു. എസ്.ഐമാരായ അനന്തു, സിയാദ്, സി.പി.ഒ വിജിത്ത് എന്നിവർ സ്ഥലത്തെത്തി. കൺവെൻഷൻ ഭാരവാഹികൾ നൽകിയ ഔദ്യോഗിക അപേക്ഷയുടെ അടിസ്ഥാനത്തിൽ, ദമ്പതികളെ മാവേലിക്കര ദയാഭവനിലേക്ക് മാറ്റി.

​തങ്ങളെ തള്ളിപ്പറഞ്ഞ മക്കളെക്കുറിച്ച് പറയുമ്പോൾ പോലും ഒരക്ഷരം ദോഷം പറയാൻ ഈ വൃദ്ധദമ്പതികൾ തയ്യാറായില്ല എന്നത് ഏവരുടെയും കണ്ണുനനയിച്ചു. "മാസത്തിൽ നാലുദിവസം വീതം പങ്കിട്ടെടുത്താൽ ഈ പാവങ്ങൾക്ക് ഒരു ജീവിതം നൽകാമായിരുന്നില്ലേ?" എന്ന ചോദ്യമാണ് ഇപ്പോൾ നാട്ടുകാർക്കിടയിൽ ഉയരുന്നത്. ചെയ്ത നന്മകൾക്കൊക്കെയും കാലം മറുപടി നൽകുമെന്ന വിശ്വാസത്തോടെ ഈ വൃദ്ധദമ്പതികൾ പുതിയൊരിടത്ത് അഭയം തേടുകയാണ്.