വടകര, താമരശ്ശേരി താലൂക്കുകളിലെ വിദ്യാഭ്യാസ സ്ഥാപനങ്ങൾക്ക് നാളെ അവധി
കോഴിക്കോട്: കനത്ത മഴ തുടരുന്ന സാഹചര്യത്തിൽ സുരക്ഷാ മുൻകരുതലിന്റെ ഭാഗമായി കോഴിക്കോട് ജില്ലയിലെ വടകര, താമരശ്ശേരി താലൂക്കുകളിലെ മുഴുവൻ വിദ്യാഭ്യാസ സ്ഥാപനങ്ങൾക്കും നാളെ (31/07/2026, വെള്ളിയാഴ്ച) ജില്ലാ കളക്ടർ അവധി പ്രഖ്യാപിച്ചു.
പ്രൊഫഷണൽ കോളേജുകൾ, അങ്കണവാടികൾ, മദ്രസകൾ, ട്യൂഷൻ സെന്ററുകൾ, കേന്ദ്രീയ വിദ്യാലയങ്ങൾ ഉൾപ്പെടെയുള്ള എല്ലാ രീതിയിലുമുള്ള പഠന കേന്ദ്രങ്ങൾക്കും അവധി ബാധകമായിരിക്കും.
ശ്രദ്ധിക്കുക: മുൻകൂട്ടി നിശ്ചയിച്ച പരീക്ഷകൾക്കും അഭിമുഖങ്ങൾക്കും മാറ്റമുണ്ടായിരിക്കില്ലെന്ന് അധികൃതർ വ്യക്തമാക്കിയിട്ടുണ്ട്.
തീരദേശ മേഖലകളിലും മലയോര മേഖലകളിലും മഴ ശക്തമായി തുടരുന്നതും ചിലയിടങ്ങളിൽ വെള്ളക്കെട്ടും ഉരുൾപൊട്ടൽ ഭീഷണിയും നിലനിൽക്കുന്നതും കണക്കിലെടുത്താണ് തീരുമാനം. വടകര, താമരശ്ശേരി താലൂക്ക പരിധികളിലെ നദികളിൽ ജലനിരപ്പ് ഉയർന്നതിനെ തുടർന്ന് താഴ്ന്ന പ്രദേശങ്ങൾ വെള്ളപ്പൊക്ക ഭീഷണിയിലാണ്.
പ്രത്യേക ജാഗ്രതാ നിർദ്ദേശം
കുട്ടികൾ ജലാശയങ്ങളിലും വെള്ളക്കെട്ടുകളിലും ഇറങ്ങുന്നത് കർശനമായി തടയണമെന്ന് രക്ഷിതാക്കൾക്ക് കളക്ടർ നിർദ്ദേശം നൽകി. മലയോര മേഖലകളിലേക്കുള്ള രാത്രികാല യാത്രകൾ പരമാവധി ഒഴിവാക്കണമെന്നും അടിയന്തര സാഹചര്യങ്ങളിൽ താലൂക്ക് കൺട്രോൾ റൂമുകളുമായി ബന്ധപ്പെടണമെന്നും ജില്ലാ ഭരണകൂടം അറിയിച്ചു.
Comments
Post a Comment