താമരശ്ശേരിയിൽ മദ്യലഹരിയിൽ സഹോദരനെ കുത്തിക്കൊന്നു, പ്രതി പോലീസ് പിടിയിൽ.

 

താമരശ്ശേരി: കൊടുവള്ളിയിൽ മദ്യലഹരിയിലുണ്ടായ തർക്കത്തെത്തുടർന്ന് സഹോദരനെ കുത്തിക്കൊന്നു. കൊടുവള്ളി വലിയപറമ്പ് കത്തറമ്മൽ താന്നിരിക്കംപൊയിൽ പ്രസാദ് (50) ആണ് കൊല്ലപ്പെട്ടത്. സംഭവത്തിൽ സഹോദരൻ പ്രമോദിനെ (54) കൊടുവള്ളി പോലീസ് കസ്റ്റഡിയിലെടുത്തു.

​ശനിയാഴ്ച രാത്രി 10.30-ഓടെയാണ് ദാരുണമായ സംഭവം നടന്നത്. ഇരുവരും ഒരേ വീട്ടിലാണ് താമസിച്ചിരുന്നത്. തർക്കത്തിനിടെ പ്രമോദ് സഹോദരനെ കുത്തുകയായിരുന്നു. സംഭവത്തിന് ശേഷം പ്രമോദ് തന്നെയാണ് വിവരം ബന്ധുക്കളെ അറിയിച്ചത്. തുടർന്ന് പുലർച്ചെ ഒരു മണിയോടെയാണ് പോലീസ് സംഭവസ്ഥലത്തെത്തി നടപടികൾ സ്വീകരിച്ചത്.

​തൊഴിൽപരമായി പ്രസാദ് കൂലിപ്പണിക്കാരനും പ്രമോദ് മരപ്പണിക്കാരനുമാണ്. കുടുംബത്തിലെ നാല് മക്കളിൽ മൂന്ന് പുരുഷന്മാരും അവിവാഹിതരാണ്. മാതാപിതാക്കൾ നേരത്തെ മരണപ്പെട്ടിരുന്നു. ഇവരുടെ സഹോദരി കൊടുവള്ളി കരുവൻപൊയിലിലും മറ്റൊരു സഹോദരൻ നരിക്കുനി അത്താണിയിലുമാണ് താമസിക്കുന്നത്.

​സംഭവത്തിൽ കൊടുവള്ളി പോലീസ് കേസെടുത്ത് അന്വേഷണം ആരംഭിച്ചു. ഇൻക്വസ്റ്റ് നടപടികൾക്ക് ശേഷം മൃതദേഹം പോസ്റ്റ്‌മോർട്ടത്തിനായി ആശുപത്രി മോർച്ചറിയിലേക്ക് മാറ്റി.