എകെജി ഭവനിലെ ഡൽഹി പോലീസ് അതിക്രമം: കൂരാച്ചുണ്ടിൽ ഡിവൈഎഫ്ഐയുടെ പ്രതിഷേധ ഇരമ്പം

 

കൂരാച്ചുണ്ട്: ന്യൂഡൽഹിയിലെ സിപിഐ എം കേന്ദ്ര കമ്മിറ്റി ഓഫീസായ എകെജി ഭവനിൽ അതിക്രമിച്ച് കയറി വിദ്യാർത്ഥി നേതാവ് ഐഷി ഘോഷിനെ അറസ്റ്റ് ചെയ്യാൻ ഡൽഹി പോലീസ് നടത്തിയ നീക്കത്തിൽ പ്രതിഷേധിച്ച് ഡിവൈഎഫ്ഐ കൂരാച്ചുണ്ട് മേഖല കമ്മിറ്റിയുടെ നേതൃത്വത്തിൽ കൂരാച്ചുണ്ട് ടൗണിൽ പ്രതിഷേധ പ്രകടനവും പൊതുയോഗവും സംഘടിപ്പിച്ചു.

​കേന്ദ്ര ഭരണകൂടത്തിന്റെ ഒത്താശയോടെ ഡൽഹി പോലീസ് നടത്തുന്ന ജനാധിപത്യവിരുദ്ധ നടപടികൾക്കെതിരെയും, പ്രതിപക്ഷ പാർട്ടി ഓഫീസുകളെയും വിദ്യാർത്ഥി-യുവജന നേതാക്കളെയും ലക്ഷ്യമിട്ടുള്ള വേട്ടയാടലിനെതിരെയും ശക്തമായ രോഷമാണ് പ്രകടനത്തിൽ ഉയർന്നത്. ഡൽഹി പോലീസിന്റെ നഗ്നമായ അധികാര ദുർവിനിയോഗമാണ് എകെജി ഭവനിൽ കണ്ടതെന്ന് നേതാക്കൾ ആരോപിച്ചു.

​കൂരാച്ചുണ്ട് ടൗണിൽ നടന്ന പ്രതിഷേധ പൊതുയോഗം ഡിവൈഎഫ്ഐ ബ്ലോക്ക് സെക്രട്ടറി എസ്.എസ്. അതുൽ ഉദ്ഘാടനം ചെയ്തു. സംഘപരിവാർ അജണ്ടകൾക്കെതിരെ ശബ്ദമുയർത്തുന്ന വിദ്യാർത്ഥി-യുവജന പ്രസ്ഥാനങ്ങളെ കേന്ദ്ര ഏജൻസികളെയും പോലീസിനെയും ഉപയോഗിച്ച് നിശ്ശബ്ദരാക്കാമെന്ന് കരുതുന്നത് വ്യാമോഹം മാത്രമാണെന്ന് അദ്ദേഹം പറഞ്ഞു. എകെജി ഭവനിലേക്ക് പോലീസ് ഇരച്ചുകയറിയ സംഭവം രാജ്യത്തെ ജനാധിപത്യ സംവിധാനങ്ങൾക്കുമേലുള്ള കടന്നുകയറ്റമാണെന്നും, ഇതിനെതിരെ രാജ്യവ്യാപകമായി ശക്തമായ ജനകീയ പ്രതിരോധം ഉയർന്നുവരുമെന്നും അദ്ദേഹം കൂട്ടിച്ചേർത്തു.

​മേഖലാ പ്രസിഡന്റ് ജസ്റ്റിൻ ജോൺ ചടങ്ങിൽ അധ്യക്ഷത വഹിച്ചു. ഡിവൈഎഫ്ഐ ബ്ലോക്ക് പ്രസിഡന്റ് അതുൽ പ്രസിൻ, നേതാക്കളായ രാഹുൽറാം, വി.എസ്. ആദർശ്, വി.എസ്. സോണറ്റ് എന്നിവർ സംസാരിച്ചു.

​പൊതുയോഗത്തിന് മുന്നോടിയായി ടൗണിൽ നൂറുകണക്കിന് യുവജനങ്ങൾ അണിനിരന്ന വീററ്റ പ്രതിഷേധ പ്രകടനം നടന്നു. 'പോലീസ് രാജ് അവസാനിപ്പിക്കുക', 'ഫാസിസ്റ്റ് നീക്കങ്ങളെ ചെറുത്തുതോൽപ്പിക്കുക' തുടങ്ങിയ ശക്തമായ മുദ്രാവാക്യങ്ങൾ മുഴക്കിക്കൊണ്ടാണ് പ്രവർത്തകർ നഗരം ചുറ്റി പ്രകടനം നടത്തിയത്. വരും ദിവസങ്ങളിലും കേന്ദ്ര നയങ്ങൾക്കെതിരെ പ്രതിഷേധ പരിപാടികൾ കൂടുതൽ ശക്തമാക്കുമെന്ന് നേതാക്കൾ അറിയിച്ചു.