കൂരാച്ചുണ്ട് വെറ്ററിനറി ഡിസ്പെൻസറി പോളിക്ലിനിക്കാക്കണം: മന്ത്രി ബിന്ദു കൃഷ്ണയ്ക്ക് പഞ്ചായത്ത് പ്രസിഡന്റിന്റെ നിവേദനം
കൂരാച്ചുണ്ട്: മലയോര മേഖലയായ കൂരാച്ചുണ്ട് ഗ്രാമപഞ്ചായത്തിലെ ഗവ. വെറ്ററിനറി ഡിസ്പെൻസറി കൂടുതൽ സൗകര്യങ്ങളുള്ള വെറ്ററിനറി പോളിക്ലിനിക്കായി ഉയർത്തണമെന്ന ആവശ്യവുമായി പഞ്ചായത്ത് അധികൃതർ. ഇത് സംബന്ധിച്ച് പഞ്ചായത്ത് പ്രസിഡന്റ് സിനി ജിനോ, മൃഗസംരക്ഷണ വകുപ്പ് മന്ത്രി ബിന്ദു കൃഷ്ണയ്ക്ക് നിവേദനം നൽകി. കർഷകരുടെ ദീർഘകാലത്തെ ഈ ആവശ്യം സാനുഭൂതിപൂർവ്വം പരിഗണിക്കുമെന്നും പരമാവധി വേഗത്തിൽ ഉചിതമായ നടപടികൾ സ്വീകരിക്കുമെന്നും മന്ത്രി ഉറപ്പുനൽകിയതായി പഞ്ചായത്ത് പ്രസിഡന്റ് അറിയിച്ചു.
മൃഗപരിപാലനം ജീവനമാർഗ്ഗം; വന്യമൃഗശല്യവും തിരിച്ചടിയാവുന്നു
കൂരാച്ചുണ്ട് പഞ്ചായത്തിലെ ഭൂരിഭാഗം കുടുംബങ്ങളുടെയും പ്രധാന ജീവനമാർഗ്ഗം കൃഷിയും മൃഗപരിപാലനവുമാണ്. ക്ഷീരവികസന രംഗത്തും മൃഗസംരക്ഷണ മേഖലയിലും വലിയ മുന്നേറ്റമാണ് ഈ പ്രദേശം കൈവരിച്ചിട്ടുള്ളത്. പശു, ആട്, പന്നി, കോഴി വളർത്തൽ മേഖലകളിൽ നിരവധി കർഷകരാണ് സജീവമായി പ്രവർത്തിക്കുന്നത്.
സംസ്ഥാന-ജില്ലാ തലങ്ങളിൽ മികച്ച ക്ഷീരകർഷകർക്കുള്ള അവാർഡുകൾ നേടിയ നിരവധിപേർ കൂരാച്ചുണ്ടിലുണ്ട്. കൂടാതെ വ്യാവസായിക അടിസ്ഥാനത്തിൽ പന്നികളെ വളർത്തുന്ന പത്തിലേറെ വൻകിട ഫാമുകളും ഇവിടെ പ്രവർത്തിക്കുന്നുണ്ട്. വന്യമൃഗശല്യം കാരണം പരമ്പരാഗത കൃഷികൾ ഉപേക്ഷിച്ച് പൂർണ്ണമായും മൃഗപരിപാലന മേഖലയിലേക്ക് തിരിഞ്ഞ നിരവധി കർഷകരും പഞ്ചായത്തിലുണ്ട്.
സൗകര്യങ്ങൾ അപര്യാപ്തം; കർഷകർ ദുരിതത്തിൽ
എന്നാൽ ഇത്രയധികം കർഷകരുള്ള ഈ പ്രദേശത്ത് നിലവിലുള്ള ഗവ. വെറ്ററിനറി ഡിസ്പെൻസറിയിലെ സൗകര്യങ്ങൾ തികച്ചും അപര്യാപ്തമാണെന്ന് നിവേദനത്തിൽ ചൂണ്ടിക്കാണിക്കുന്നു. നിലവിൽ ഒരു വെറ്ററിനറി സർജനും രണ്ട് ലൈവ് സ്റ്റോക്ക് ഇൻസ്പെക്ടർമാരും മാത്രമാണ് ഇവിടെ സേവനത്തിലുള്ളത്.
വിസ്തൃതമായ ഭൂപ്രകൃതിയുള്ള കൂരാച്ചുണ്ടിൽ, വിദൂര മേഖലകളിലുള്ള കർഷകരുടെ അടുത്ത് കൃത്യസമയത്ത് എത്തുന്നതിനും അടിയന്തര ചികിത്സ ലഭ്യമാക്കുന്നതിനും ജീവനക്കാരുടെ കുറവ് വലിയ തടസ്സമാകുന്നുണ്ട്. അടിയന്തര സാഹചര്യങ്ങളിലോ വിദഗ്ദ്ധ ചികിത്സ ആവശ്യമുള്ളപ്പോഴോ കർഷകർ 15 കിലോമീറ്ററിലധികം ദൂരം യാത്ര ചെയ്ത് മറ്റു കേന്ദ്രങ്ങളെ ആശ്രയിക്കേണ്ട ദുരവസ്ഥയിലുമാണ്.
ഡിസ്പെൻസറി പോളിക്ലിനിക്കായി ഉയർത്തുന്നതോടെ കൂടുതൽ ഡോക്ടർമാരുടെ സേവനവും എക്സ്റേ, ലാബ് പരിശോധനകൾ, വിദഗ്ദ്ധ ശസ്ത്രക്രിയാ സൗകര്യങ്ങൾ എന്നിവയും പ്രദേശത്ത് ലഭ്യമാകും. ഇത് മലയോര മേഖലയിലെ കർഷകർക്ക് വലിയ ആശ്വാസമാകുമെന്നാണ് പ്രതീക്ഷിക്കുന്നത്.
Comments
Post a Comment