കോഴിക്കോട് പുതിയ ബസ് സ്റ്റാൻഡിൽ നിന്ന് യുവതിയെ തട്ടിക്കൊണ്ടുപോയി പല്ലുകൾ തകർത്ത് സ്വർണം കവർന്നു; പ്രതികൾ പിടിയിൽ

 

കോഴിക്കോട്: നഗരമധ്യത്തിൽ യുവതിയെ ഓട്ടോറിക്ഷയിൽ തട്ടിക്കൊണ്ടുപോയി ക്രൂരമായി മർദ്ദിച്ച് സ്വർണ്ണാഭരണങ്ങൾ കവർന്ന സംഭവത്തിൽ നാല് സ്ത്രീകൾ ഉൾപ്പെടെ ആറുപേരെ കസബ പോലീസ് അറസ്റ്റ് ചെയ്തു. കുന്നമംഗലം സ്വദേശിനിയായ യുവതിയാണ് അതിദാരുണമായ ആക്രമണത്തിന് ഇരയായത്.

​സംഭവം ഇങ്ങനെ:

പുതിയ ബസ് സ്റ്റാൻഡ് കെട്ടിടത്തിൽ ക്ലീനിങ് തൊഴിലാളിയായ യുവതി ജോലി കഴിഞ്ഞ് വീട്ടിലേക്ക് മടങ്ങാൻ മിൽമ ബൂത്തിന് സമീപം നിൽക്കുകയായിരുന്നു. ഈ സമയം, യുവതിക്ക് മുൻപരിചയമുള്ള ഒരു സ്ത്രീ അവിടെയെത്തുകയും പെരിങ്ങളത്തേക്ക് പോകുകയാണെന്ന് പറഞ്ഞ് യുവതിയെ ഓട്ടോറിക്ഷയിൽ കയറ്റുകയുമായിരുന്നു. പരിചയക്കാരിയായതിനാൽ സംശയമൊന്നും തോന്നാതെ യുവതി ഓട്ടോയിൽ കയറി. എന്നാൽ, സ്വർണ്ണാഭരണങ്ങൾ ധരിക്കുന്ന സ്ത്രീകളെ കണ്ടെത്തി അവരുമായി സൗഹൃദം സ്ഥാപിച്ച് സ്വർണ്ണം കവരുന്ന സ്ഥിരം സംഘമായിരുന്നു ഇവർ.

​മർദ്ദനവും കവർച്ചയും:

യാത്ര തുടങ്ങിയതിന് പിന്നാലെ പ്രതികൾ യുവതിയെ വളഞ്ഞിട്ട് ആക്രമിക്കുകയായിരുന്നു. ചുരുട്ടിയ മുഷ്ടികൊണ്ട് മുഖത്തും വായയിലും അതിക്രൂരമായി ഇടിച്ചതിനെത്തുടർന്ന് യുവതിയുടെ മുൻവശത്തെ നാല് പല്ലുകൾ കൊഴിഞ്ഞുപോവുകയും മുഖത്ത് ഗുരുതരമായി പരിക്കേൽക്കുകയും ചെയ്തു. മർദ്ദനത്തിന് ശേഷം യുവതി ധരിച്ചിരുന്ന ഒന്നേകാൽ പവന്റെ മാലയും, രണ്ടര പവന്റെ പാദസരവും, ഒരു പവന്റെ ബ്രേസ്ലെറ്റും ഉൾപ്പെടെയുള്ള സ്വർണ്ണാഭരണങ്ങൾ സംഘം ബലമായി പിടിച്ചുപറിച്ചു. തുടർന്ന് അവശ നിലയിലായ യുവതിയെ വഴിയിൽ ഇറക്കിവിട്ട് സംഘം കടന്നുകളയുകയായിരുന്നു.

​അറസ്റ്റും തുടർന്നുള്ള അന്വേഷണവും:

യുവതി നൽകിയ പരാതിയുടെ അടിസ്ഥാനത്തിൽ സിസിടിവി ദൃശ്യങ്ങൾ കേന്ദ്രീകരിച്ച് കസബ പോലീസ് നടത്തിയ ശാസ്ത്രീയമായ അന്വേഷണത്തിനൊടുവിലാണ് പ്രതികൾ പിടിയിലായത്. രണ്ട് ഓട്ടോറിക്ഷകളിലായാണ് പ്രതികൾ കവർച്ചയ്ക്കായി സഞ്ചരിച്ചിരുന്നത്.

​കാക്കൂർ സ്വദേശിനി റഹ്മത്ത്, എറണാകുളം സ്വദേശി അനിൽ കുമാർ, അന്നശ്ശേരി സ്വദേശിനി സുഹറ, കല്ലായി സ്വദേശിനി ആയിഷ, വെള്ളയിൽ സ്വദേശിനി സൗദ, മുക്കം സ്വദേശി സുബിരാജ് എന്നിവരാണ് പോലീസിന്റെ പിടിയിലായത്.

​കവർച്ചാ മുതൽ കണ്ടെത്തി:

അപഹരിച്ച സ്വർണ്ണം രാമനാട്ടുകരയിലെ ഒരു ജ്വല്ലറിയിൽ വിൽക്കാൻ ശ്രമിച്ചെങ്കിലും അവർ തയ്യാറായില്ല. പിന്നീട് കമ്മത്ത് ലൈനിലുള്ള മറ്റൊരു കടയിൽ വെച്ച് 3,80,000 രൂപയ്ക്ക് സ്വർണ്ണം വിറ്റതായി പോലീസ് കണ്ടെത്തി. ഇതിൽ 3,30,000 രൂപ പ്രതികൾ വീതിച്ചെടുത്തു. പോലീസ് നടത്തിയ പരിശോധനയിൽ ഇവരിൽ നിന്ന് രണ്ട് ലക്ഷത്തിലധികം രൂപ കണ്ടെടുത്തിട്ടുണ്ട്. പ്രതികളെ അറസ്റ്റ് ചെയ്ത ശേഷം കോടതിയിൽ ഹാജരാക്കി റിമാൻഡ് ചെയ്തു.