"ചിക്കൻ ചില്ലിക്ക് നാരങ്ങ നീര് പോരാ..." വടക്കാഞ്ചേരിയിൽ കൂട്ടത്തല്ല്; ഒടുവിൽ പല്ല് പോയത് ഹോട്ടലുടമയ്ക്ക്

 

തൃശൂർ: ബിരിയാണിയിലെ ഏലക്കയും ചായയിലെ മധുരവുമൊക്കെ തർക്കങ്ങൾക്ക് കാരണമാകാറുണ്ടെങ്കിലും തൃശൂർ വടക്കാഞ്ചേരിയിൽ കാര്യങ്ങൾ കൈവിട്ടുപോയി! ചിക്കൻ ചില്ലിക്കൊപ്പം കിട്ടിയ നാരങ്ങയ്ക്ക് ‘നീര്’ പോരെന്ന വിചിത്ര പരാതിയെച്ചൊല്ലി ഹോട്ടലിൽ നടന്നത് ക്രിക്കറ്റ് ബാറ്റ് കൊണ്ടുള്ള അടിയും കൂട്ടത്തല്ലും. ഒടുവിൽ തർക്കം തീർക്കാൻ വന്ന ഹോട്ടലുടമയുടെ മൂന്ന് പല്ലുകളാണ് അടിയിൽ കൊഴിഞ്ഞത്!

​വടക്കാഞ്ചേരി മിണാലൂർ സെലക്ട് ഹോട്ടലിൽ ഇന്ന് വൈകിട്ട് അഞ്ച് മണിയോടെയായിരുന്നു സിനിമയെ വെല്ലുന്ന ഈ 'നാരങ്ങാ യുദ്ധം' നടന്നത്.

​ സംഭവം ഇങ്ങനെ:

​തുടക്കം ചില്ലറക്കാരനല്ല: വൈകിട്ട് ഹോട്ടലിലെത്തിയ രണ്ട് യുവാക്കൾ ഓർഡർ ചെയ്തത് ചൂടൻ ചിക്കൻ ചില്ലി. ഒപ്പം സൈഡായി കിട്ടിയ നാരങ്ങ കഷ്ണം പിഴിഞ്ഞപ്പോൾ യുവാക്കൾക്ക് തൃപ്തിയാകുന്ന രീതിയിൽ നീര് വന്നില്ലത്രേ!

​'നീരസം' അടിപിടിയായി: "ഇതാണോടാ തരുണീമണി നാരങ്ങ?" എന്ന് ചോദിച്ച് യുവാക്കൾ ബഹളം വെച്ചു. തർക്കം പരിഹരിക്കാൻ ഹോട്ടലുടമ മുജീബ് ഓടിയെത്തിയെങ്കിലും രംഗം ശാന്തമായില്ല. യുവാക്കൾ തൽക്കാലം അവിടെ നിന്നും സ്കൂട്ടായി.​

ക്രിക്കറ്റ് ബാറ്റ് റൗണ്ട്സ്: എന്നാൽ കഥ അവിടെ തീർന്നില്ല! പോയവർ വെറുതെയിരുന്നില്ല, ഏഴംഗ 'ക്വട്ടേഷൻ' സംഘത്തെയും കൂട്ടി ക്രിക്കറ്റ് ബാറ്റും മരക്കഷ്ണങ്ങളുമായി ഹോട്ടലിലേക്ക് വീണ്ടുമെത്തി. പിന്നെ അവിടെ നടന്നത് കൂട്ടയടിയായിരുന്നു.

​ പരിക്കുകളുടെ കണക്ക് പുസ്തകം:

​ആക്രമണത്തിനിടയിൽ ഹോട്ടലുടമ മുജീബിൻ്റെ മൂന്ന് പല്ലുകളാണ് നിലത്തുവീണത്. ഹോട്ടൽ ജീവനക്കാർക്കും, ഭക്ഷണം കഴിക്കാനെത്തിയ പാവങ്ങൾക്കും, എന്തിനേറെപ്പറയുന്നു തർക്കം മാറ്റാൻ ഇടയിൽ കയറിയ നാട്ടുകാർക്കും വരെ നല്ല പെട കിട്ടിയിട്ടുണ്ട്. പരിക്കേറ്റവരെയെല്ലാം തൊട്ടടുത്ത ആശുപത്രികളിൽ പ്രവേശിപ്പിച്ചു.

​സംഭവത്തിന് പിന്നാലെ വടക്കാഞ്ചേരി പൊലീസ് സ്ഥലത്തെത്തി അന്വേഷണം ആരംഭിച്ചിട്ടുണ്ട്. എന്തായാലും "ചിക്കൻ ചില്ലിയിൽ നാരങ്ങ നീര് കുറഞ്ഞാലും ചോര നീര് ഒഴുക്കരുത്" എന്നാണ് ഇപ്പോൾ സോഷ്യൽ മീഡിയയിലെ കമന്റുകൾ!