ഐഫോൺ കൊണ്ടുപോയത് ആക്ടിവയിൽ വന്ന സ്ത്രീ; തിരികെ കിട്ടാൻ കൊട്ടാരക്കരയുടെ കടത്തിണ്ണകളിൽ കണ്ണീരോടെ ഒരു പെൺകുട്ടി

 

കൊട്ടാരക്കര: റോഡിൽ വീണുകിട്ടിയ ഒന്നര ലക്ഷം രൂപ വിലമതിക്കുന്ന ഐഫോൺ ഉടമയ്ക്ക് തിരികെ നൽകാൻ സാമാന്യ മര്യാദ കാണിക്കാതെ, സ്വിച്ച് ഓഫ് ചെയ്ത് കടന്നുകളഞ്ഞ സ്കൂട്ടർ യാത്രികയ്ക്കായി തിരച്ചിൽ ശക്തമാക്കി. സ്വന്തം അധ്വാനത്തിൽ വാങ്ങിയ, വെറും ഒരു മാസം മാത്രം പഴക്കമുള്ള ഫോൺ നഷ്ടപ്പെട്ട സങ്കടത്തിൽ കൊട്ടാരക്കരയിലെ കടത്തിണ്ണകളിൽ പൊട്ടിക്കരഞ്ഞുകൊണ്ട് സിസിടിവി ദൃശ്യങ്ങൾ പരിശോധിക്കുകയാണ് ഒരു പെൺകുട്ടി.

​സംഭവം ഇങ്ങനെ:

​ഒരു ഡെലിവറി ആവശ്യത്തിനായി കൊട്ടാരക്കര ഭാഗത്തേക്ക് ബൈക്കിൽ പോകവെ രാജധാനി പെട്രോൾ പമ്പിന് സമീപം വച്ചാണ് യുവതിയുടെ കയ്യിൽ നിന്നും അബദ്ധത്തിൽ ഐഫോൺ താഴെ വീഴുന്നത്. യാത്രയ്ക്കിടയിലായതിനാൽ ഫോൺ നഷ്ടപ്പെട്ട കാര്യം യുവതി ഉടനടി അറിഞ്ഞിരുന്നില്ല. പിന്നീട് 'കിള്ളൂർ' ഭാഗത്തെത്തിയപ്പോൾ, പിന്നാലെ വന്ന ഒരു ഓട്ടോ ഡ്രൈവറാണ് ഫോൺ റോഡിൽ വീണുപോയ വിവരം ഇവരെ അറിയിക്കുന്നത്. ഉടൻ തന്നെ തിരികെ പോയി സ്ഥലത്ത് തിരച്ചിൽ നടത്തിയെങ്കിലും ഫോൺ കണ്ടെത്താനായില്ല.

​സിസിടിവി ദൃശ്യങ്ങളിൽ സത്യം പുറത്ത്

​വിവരമറിയിച്ച ഓട്ടോ ഡ്രൈവറെ പിന്നീട് നേരിട്ട് കണ്ടെത്താൻ കഴിയാതിരുന്ന യുവതി, പ്രദേശത്തെ സിസിടിവി ദൃശ്യങ്ങൾ വഴി ഓട്ടോയുടെ നമ്പർ കണ്ടെത്തുകയായിരുന്നു. തുടർന്ന് കൊട്ടാരക്കര പൊലീസിന്റെ സഹായത്തോടെ ഓട്ടോ ഡ്രൈവറെ ബന്ധപ്പെട്ടപ്പോഴാണ് രാജധാനി പെട്രോൾ പമ്പിന് മുന്നിലാണ് ഫോൺ വീണതെന്ന് ഉറപ്പിച്ചത്.

​തുടർന്ന് പെട്രോൾ പമ്പിന് എതിർവശത്തുള്ള സൂപ്പർ മാർക്കറ്റിലെ സിസിടിവി ക്യാമറകൾ പരിശോധിച്ചപ്പോഴാണ് നിർണ്ണായക ദൃശ്യങ്ങൾ ലഭിച്ചത്. റോഡിൽ വീണുകിടന്ന ഫോൺ ആ വഴി ആക്ടിവ സ്കൂട്ടറിലെത്തിയ ഒരു സ്ത്രീ എടുത്തു കൊണ്ടുപോകുന്നത് ദൃശ്യങ്ങളിൽ വ്യക്തമായി പതിഞ്ഞിട്ടുണ്ട്.

​സ്വിച്ച് ഓഫ് ചെയ്ത് കടന്നു കളഞ്ഞു

​ഫോൺ നഷ്ടപ്പെട്ടതറിഞ്ഞ് ഉടൻ തന്നെ യുവതി ആ നമ്പറിലേക്ക് വിളിച്ചപ്പോൾ ബെൽ അടിച്ചിരുന്നു. എന്നാൽ ഫോൺ കൈക്കലാക്കിയ സ്ത്രീ പിന്നീട് ഫോൺ സ്വിച്ച് ഓഫ് ചെയ്യുകയായിരുന്നു. തുടർന്ന് രാവിലെ 10:30 മുതൽ വൈകുന്നേരം 4 മണി വരെ പെൺകുട്ടി പ്രദേശത്തെ ഓരോ കടകളിലും കയറിയിറങ്ങി സിസിടിവി ദൃശ്യങ്ങൾ പരിശോധിച്ച് വരികയാണ്. ദൃശ്യങ്ങളിൽ സ്കൂട്ടറും സ്ത്രീയും വ്യക്തമായി കാണാമെങ്കിലും വാഹ നമ്പർ പൂർണ്ണമായി ലഭ്യമായിട്ടില്ല.

​യുവതി നൽകിയ പരാതിയിൽ കൊട്ടാരക്കര പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. ദൃശ്യങ്ങളിൽ കാണുന്ന സ്കൂട്ടർ യാത്രികയെക്കുറിച്ചുള്ള വിവരങ്ങൾ ശേഖരിച്ചു വരികയാണെന്ന് പൊലീസ് അറിയിച്ചു.

​സഹായഭ്യർത്ഥന:

സ്വന്തം അധ്വാന തുക കൊണ്ട് വാങ്ങിയ ഉയർന്ന സുരക്ഷാ സംവിധാനമുള്ള (High Security System) ഈ ഐഫോൺ മറ്റൊരാൾക്ക് ഉപയോഗിക്കാൻ സാധിക്കില്ല. പെൺകുട്ടിയുടെ കണ്ണീരും സങ്കടവും കണക്കിലെടുത്ത് ഫോൺ കൈക്കലാക്കിയ സ്ത്രീ അത് അടുത്തുള്ള പോലീസ് സ്റ്റേഷനിലോ ഉടമയ്ക്കോ തിരികെ നൽകാൻ തയ്യാറാകണമെന്ന് പ്രദേശവാസികളും ബന്ധുക്കളും അഭ്യർത്ഥിക്കുന്നു.