ഓടുന്ന ബസിലേത് 'സ്പോട്ട് ജസ്റ്റിസ്': പെൺകുട്ടിയുടെ കരച്ചിൽ കേട്ടു; ഡ്രൈവർ സീറ്റിൽ നിന്നിറങ്ങി നിർണ്ണായക ഇടപെടൽ, കാമഭ്രാന്തനെ വട്ടമിട്ട് തല്ലി യാത്രക്കാർ

 

ബെംഗളൂരു: ഓടുന്ന ബസിനുള്ളിൽ യുവതിക്ക് നേരെ ലൈംഗിക അതിക്രമം നടത്തിയ യുവാവിനെ ഡ്രൈവറും സഹയാത്രക്കാരും ചേർന്ന് കൈകാര്യം ചെയ്തു. ബെംഗളൂരു ഹെബ്ബാളിന് സമീപമാണ് നാടകീയ സംഭവങ്ങൾ അരങ്ങേറിയത്. ഹെബ്ബാളിൽ നിന്ന് മാന്യത ടെക്ക് പാർക്ക് ഭാഗത്തേക്ക് പോകുകയായിരുന്ന ബസിലായിരുന്നു സംഭവം.

​ബസിൽ യാത്ര ചെയ്യുകയായിരുന്ന യുവതിയുടെ അടുത്തിരുന്ന യുവാവ് മോശമായി പെരുമാറുകയും ലൈംഗികമായി അതിക്രമിക്കാൻ ശ്രമിക്കുകയുമായിരുന്നു. ഭയന്നുപോയ യുവതി കരഞ്ഞുവിളിച്ചതോടെയാണ് ബസിലുണ്ടായിരുന്ന മറ്റ് യാത്രക്കാർ വിവരമറിയുന്നത്. പെൺകുട്ടിയുടെ വെപ്രാളവും കരച്ചിലും കണ്ടതോടെ ഡ്രൈവർ വണ്ടി നിർത്തി സീറ്റിൽ നിന്നും ചാടിയിറങ്ങുകയായിരുന്നു.

​തുടർന്ന് അക്രമിയായ യുവാവിനെ കൈയ്യിൽ കിട്ടിയതും ഡ്രൈവർ ചോദ്യം ചെയ്യുകയും മുഖത്തടിക്കുകയുമായിരുന്നു. ഡ്രൈവറുടെ ധീരമായ ഇടപെടലിന് പിന്നാലെ സഹയാത്രക്കാരും രോഷാകുലരായി യുവാവിനെ വട്ടമിട്ട് കൈകാര്യം ചെയ്തു. ഇതിനിടെ അക്രമിയുടെ ഷർട്ട് വലിച്ചുകീറുകയും ഭയന്നുവിറച്ച യുവതിയോടും ഇയാളെ തല്ലാൻ യാത്രക്കാർ ആവശ്യപ്പെടുകയും ചെയ്യുന്നുണ്ടായിരുന്നു.

​പെട്ടെന്നുണ്ടായ പ്രകോപനമല്ല, മറിച്ച് അക്രമത്തിന് ഇരയായ പെൺകുട്ടിക്ക് നീതി ഉറപ്പാക്കാനാണ് ബസ് ജീവനക്കാരും യാത്രക്കാരും ഒന്നിച്ച് രംഗത്തിറങ്ങിയത്. സംഭവത്തിന്റെ ദൃശ്യങ്ങൾ പുറത്തുവന്നതോടെ ബസ് ഡ്രൈവറുടെയും സഹയാത്രക്കാരുടെയും തൽക്ഷണ ഇടപെടലിന് സമൂഹമാധ്യമങ്ങളിലടക്കം വലിയ കയ്യടിയാണ് ലഭിക്കുന്നത്. എന്നാൽ സംഭവത്തിൽ യുവതി ഇതുവരെ പൊലീസിൽ പരാതി നൽകിയിട്ടില്ലെന്നാണ് വിവരങ്ങൾ സൂചിപ്പിക്കുന്നത്.