സഹോദരി ഭർത്താവിനെ വെട്ടിക്കൊന്ന് ഒളിവിൽപ്പോയി; 40 വർഷത്തിനുശേഷം അറസ്‌റ്റ്;പിടിയിലായത് നാട്ടുകാരനെ അവിചാരിതമായി കണ്ടുമുട്ടിയപ്പോൾ നടത്തിയ പരിചയം പുതുക്കലിലൂടെ

 

കൊല്ലം: 1987-ൽ നടന്ന കൊലപാതകത്തിന് ശേഷം ഒളിവിൽ പോയ പ്രതി 39 വർഷങ്ങൾക്ക് ശേഷം നിയമത്തിന് മുന്നിൽ. പൂയപ്പള്ളി വെളിയം പടിഞ്ഞാറ്റിൻകര കോടിയാട്ട് വീട്ടിൽ മോഹനൻ പിള്ളയാണ് (68) പൂയപ്പള്ളി പോലീസിന്റെ പിടിയിലായത്. 1987 ജനുവരി 11-ന് വൈകുന്നേരം ആറുമണിയോടെ സഹോദരിയുടെ ഭർത്താവായ ചന്ദ്രശേഖരൻ പിള്ളയെ വെട്ടിക്കൊലപ്പെടുത്തിയ കേസിലെ പ്രതിയാണ് ഇയാൾ.

​നീണ്ട ഒളിവുജീവിതം

കൃത്യത്തിന് ശേഷം നാടുവിട്ട പ്രതി ആദ്യം വേളാങ്കണ്ണിയിലേക്ക് കടന്നു. അവിടെ ഒരു ഹോട്ടലിൽ ജോലി നോക്കിയ ശേഷം പിന്നീട് കോട്ടയത്തെ തോട്ടം മേഖലയിലേക്ക് മാറി. യഥാർത്ഥ പേരും മേൽവിലാസവും മറച്ചുവെച്ച് മറ്റൊരു പേരിൽ കോട്ടയം ജില്ലയിലെ കല്ലറയിൽ ഇയാൾ കുടുംബമായി താമസിച്ചുവരികയായിരുന്നു. അവിടെ വിവാഹം കഴിച്ച് സ്ഥിരതാമസമാക്കിയ പ്രതിക്ക് ഇപ്പോൾ 35-ഉം 37-ഉം വയസ്സുള്ള രണ്ട് മക്കളുമുണ്ട്.

​നിർണ്ണായകമായത് രണ്ട് സംഭവങ്ങൾ

വർഷങ്ങളായി കോടതിയിൽ കെട്ടിക്കിടന്ന കേസിൽ ജില്ലാ പോലീസ് മേധാവി ഷാജി സുഗുണന്റെ നേതൃത്വത്തിൽ പ്രത്യേക അന്വേഷണ സംഘം രൂപീകരിച്ച് അന്വേഷണം ശക്തമാക്കിയിരുന്നു. ഇതിനിടയിലാണ് നിർണ്ണായകമായ രണ്ട് സംഭവങ്ങൾ പോലീസിന് ലഭിച്ചത്.

​  വെളിയം സ്വദേശിയായ ഒരാൾ വർഷങ്ങൾക്ക് ശേഷം പ്രതിയെ കല്ലറയിൽ വെച്ച് യാദൃശ്ചികമായി കാണുകയും, പഴയ കൊലപാതകത്തെക്കുറിച്ച് ചോദിക്കുകയും ചെയ്തതാണ് അന്വേഷണത്തിന് തുമ്പായത്. ഇതിനു പുറമെ, സമീപത്തെ ഒരു കള്ളുഷാപ്പിൽ വെച്ച് മദ്യലഹരിയിൽ നാട്ടുകാരുമായി വഴക്കുണ്ടാക്കിയ പ്രതി, താൻ കൊലക്കേസ് പ്രതിയാണെന്ന് വെല്ലുവിളിച്ചതും പോലീസിന് ഇയാളിലേക്കെത്താൻ എളുപ്പമായി.

​തിരിച്ചറിഞ്ഞത് സഹോദരി

ലഭിച്ച വിവരങ്ങളുടെ അടിസ്ഥാനത്തിൽ പൂയപ്പള്ളി പോലീസ് കല്ലറയിലെത്തി പ്രതിയെ കസ്റ്റഡിയിലെടുക്കുകയായിരുന്നു. പോലീസ് കസ്റ്റഡിയിലിരിക്കെ പ്രതിയുടെ സഹോദരിയെ സ്റ്റേഷനിലെത്തിച്ച് നടത്തിയ പരിശോധനയിൽ, ഇയാൾ മോഹനൻ പിള്ള തന്നെയാണെന്ന് ഉറപ്പിച്ചു. തുടർന്ന് അറസ്റ്റ് രേഖപ്പെടുത്തിയ പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

​വർഷങ്ങളായി നീതിക്കായി കാത്തിരുന്ന കുടുംബത്തിനും നാട്ടുകാർക്കും ആശ്വാസം പകരുന്നതാണ് അറസ്റ്റ്. പൂയപ്പള്ളി പോലീസിന്റെ സമയോചിതമായ ഇടപെടലാണ് ദീർഘകാലമായി പിടികിട്ടാപ്പുള്ളിയായിരുന്ന പ്രതിയെ വലയിലാക്കാൻ സഹായിച്ചത്.