കൂരാച്ചുണ്ടിൽ കാട്ടാനപ്പേടി: കൃഷിയിടങ്ങളിൽ റീമ കുന്നുമ്മൽ സന്ദർശിച്ചു; രാത്രികാലങ്ങളിൽ കടുത്ത നിയന്ത്രണം, ജാഗ്രതാ നിർദ്ദേശവുമായി പഞ്ചായത്ത്"

 

കൂരാച്ചുണ്ട്: കഴിഞ്ഞ ഏതാനും ദിവസങ്ങളായി കൂരാച്ചുണ്ട് മേഖലയിൽ ഭീതി വിതയ്ക്കുന്ന കാട്ടാനക്കൂട്ടം വ്യാപക കൃഷിനാശം വരുത്തിയ മണ്ടോപാറ, ഓട്ടപ്പാലം പ്രദേശങ്ങൾ ജില്ലാ പഞ്ചായത്ത് വികസന കാര്യ സ്റ്റാൻഡിംഗ് കമ്മിറ്റി ചെയർപേഴ്സൺ റീമ കുന്നുമ്മൽ സന്ദർശിച്ചു. ആനയിറങ്ങി കൃഷിയിടങ്ങളും ഒപ്പം തകർത്ത വീടുകളും നേരിൽ കണ്ട അവർ, വൻ സാമ്പത്തിക പ്രതിസന്ധിയിലായ കർഷകരെയും നാട്ടുകാരെയും ആശ്വസിപ്പിച്ചു. വന്യജീവി ശല്യത്തിന് ശാശ്വത പരിഹാരം കാണാൻ ആവശ്യമായ നടപടികൾ സർക്കാരിന്റെ ശ്രദ്ധയിൽപ്പെടുത്തുമെന്നും നാശനഷ്ടങ്ങൾക്ക് അടിയന്തര നഷ്ടപരിഹാരം ലഭ്യമാക്കാൻ സമ്മർദ്ദം ചെലുത്തുമെന്നും അവർ ഉറപ്പുനൽകി.

​പഞ്ചായത്ത് വൈസ് പ്രസിഡന്റ് ബിജു കടലാശ്ശേരി, വാർഡ് മെമ്പർ പ്രഭീഷ് തളിയോത്ത്, പ്രമുഖ പ്രാദേശിക നേതാക്കളായ ഒ.കെ. അമ്മദ്, വി.എസ്. ഹമീദ്, ഒ.കെ. ബഷീർ, മുഹമ്മദ് കെ.എം. തുടങ്ങിയ ജനപ്രതിനിധികളും രാഷ്ട്രീയ സാംസ്കാരിക പ്രവർത്തകരും ചെയർപേഴ്സണൊപ്പം പ്രദേശങ്ങൾ സന്ദർശിച്ചു.

​ജാഗ്രതാ നിർദ്ദേശങ്ങളുമായി പഞ്ചായത്ത് പ്രസിഡന്റ്

​മേഖലയിൽ കാട്ടാന ഭീഷണി നിലനിൽക്കുന്ന പശ്ചാത്തലത്തിൽ, പൊതുജനങ്ങളുടെ ജീവനും സ്വത്തിനും സംരക്ഷണം ഉറപ്പാക്കാൻ കൂരാച്ചുണ്ട് പഞ്ചായത്ത് പ്രസിഡന്റ് അടിയന്തര ജാഗ്രതാ നിർദ്ദേശങ്ങൾ പുറപ്പെടുവിച്ചു.

​പ്രധാന നിർദ്ദേശങ്ങൾ താഴെ പറയുന്നവയാണ്:

• ​രാത്രികാല യാത്രകൾക്ക് വിലക്ക്: രാത്രി 8 മണി മുതൽ രാവിലെ 7 മണി വരെയുള്ള സമയങ്ങളിൽ ജനങ്ങൾ വീടുകളിൽ നിന്ന് പുറത്തിറങ്ങുന്നത് പൂർണ്ണമായും ഒഴിവാക്കേണ്ടതാണ്.
• ​അടിയന്തര സാഹചര്യങ്ങളിൽ സഹായം തേടാം: മേൽപ്പറഞ്ഞ സമയങ്ങളിൽ ഏതെങ്കിലും തരത്തിലുള്ള അടിയന്തര ആവശ്യങ്ങൾക്കായി പുറത്തിറങ്ങേണ്ടി വരികയാണെങ്കിൽ, അതാത് വാർഡുകളിലെ ആർ.ആർ.ടി. (Rapid Response Team) അംഗങ്ങളെയോ വാർഡ് മെമ്പറെയോ മുൻകൂട്ടി വിവരമറിയിച്ച് സഹായം ഉറപ്പാക്കണം.
• ​സാഹസികത ഒഴിവാക്കുക: ജനവാസ മേഖലകളിൽ കാട്ടാനയെ കണ്ടെത്തുകയാണെങ്കിൽ യാതൊരു കാരണവശാലും അതിന്റെ അടുത്തേക്ക് പോകാനോ, മൊബൈൽ ഫോണുകളിൽ ഫോട്ടോയും വീഡിയോയും പകർത്താൻ ശ്രമിക്കാനോ പാടില്ല. ഇത് ആനയെ കൂടുതൽ അക്രമാസക്തനാക്കാൻ കാരണമാകും.
• ​ലൈറ്റുകൾ പ്രകാശിപ്പിക്കുക: വന്യമൃഗങ്ങൾ ജനവാസ മേഖലയിലേക്ക് ഇറങ്ങുന്നത് തടയാൻ രാത്രികാലങ്ങളിൽ വീടിന് പുറത്തുള്ള ലൈറ്റുകൾ നിർബന്ധമായും ഇട്ടു വെക്കണം.
• ​അടിയന്തര ശ്രദ്ധയ്ക്ക്: വന്യജീവി ശല്യം ശ്രദ്ധയിൽപ്പെട്ടാൽ ഉടൻ തന്നെ വനംവകുപ്പ് ഉദ്യോഗസ്ഥരെയോ തദ്ദേശ ജനപ്രതിനിധികളെയോ വിവരം അറിയിക്കണമെന്നും, വനംവകുപ്പിന്റെയും പഞ്ചായത്തിന്റെയും നിർദ്ദേശങ്ങളോട് നാട്ടുകാർ പൂർണ്ണമായി സഹകരിക്കണമെന്നും അധികൃതർ അഭ്യർത്ഥിച്ചു.