പ്രശ്നം സംസാരിച്ചു തീർക്കാൻ ഗൾഫിൽ നിന്ന് വിളിച്ചു വരുത്തി,ഭാര്യയുടെ കാമുകൻ കത്രിക കൊണ്ട് കുത്തി;

 

വർക്കല: ഗൾഫിൽ നിന്ന് അവധിക്ക് നാട്ടിലെത്തിയ യുവാവിന് നേരെ സ്വന്തം അമ്മയുടെയും കുഞ്ഞിന്റെയും മുന്നിൽ വെച്ച് ക്രൂരമായ ആക്രമണം. വർക്കല സ്വദേശി അനുവിനെയാണ് ഭാര്യയുടെ കാമുകനായ കിരൺ കത്രിക ഉപയോഗിച്ച് കുത്തിപ്പരിക്കേൽപ്പിച്ചത്. സംഭവത്തിൽ പ്രതിയായ വർക്കല സ്വദേശി കിരണിനെ അയിരൂർ പോലീസ് അതിസാഹസികമായി പിടികൂടി.

ഏതാനും ദിവസങ്ങൾക്ക് മുൻപാണ് അനു ഗൾഫിൽ നിന്ന് നാട്ടിലെത്തിയത്. തന്റെ ഭാര്യക്ക് മറ്റൊരാളുമായി ബന്ധമുണ്ടെന്ന് തിരിച്ചറിഞ്ഞ അനു, ഇത് സംബന്ധിച്ച് ഭാര്യയുടെ കാമുകന്റെ വീട്ടിലെത്തി വിവരങ്ങൾ ആരാഞ്ഞിരുന്നു. ഇതിന്റെ വൈരാഗ്യത്തിൽ, പ്രശ്നങ്ങൾ സംസാരിച്ചു തീർക്കാമെന്ന് വിശ്വസിപ്പിച്ച് കിരൺ അനുവിനെ വിളിച്ചു വരുത്തുകയായിരുന്നു.

​ജൂൺ ഇരുപത്തിമൂന്നിന് വൈകിട്ട് ഏഴരയോടെ അനു തന്റെ അമ്മ രേണുകയെയും കുഞ്ഞിനെയും കൂട്ടി ചെമ്മരുതി പനയറ മാടൻകാവിന് സമീപം എത്തി. ഇവിടെ കാത്തുനിന്നിരുന്ന കിരൺ അനുവിനെ അസഭ്യം പറയുകയും, കൈയിൽ കരുതിയിരുന്ന കത്രിക ഉപയോഗിച്ച് നെഞ്ചിലും തലയിലും ഇടത് തോളിലും തുടരെ കുത്തുകയുമായിരുന്നു. സ്വന്തം അമ്മയുടെയും കുഞ്ഞിന്റെയും കണ്മുന്നിൽ വെച്ചാണ് ഈ ക്രൂരത നടന്നത്.

​ആരോഗ്യനില ഗുരുതരം:

ആക്രമണത്തിൽ ശ്വാസകോശത്തിന് ഉൾപ്പെടെ ഗുരുതരമായി പരിക്കേറ്റ അനുവിനെ ആദ്യം പാരിപ്പള്ളി മെഡിക്കൽ കോളേജ് ആശുപത്രിയിലും, പിന്നീട് ആരോഗ്യനില വഷളായതിനെ തുടർന്ന് തിരുവനന്തപുരം മെഡിക്കൽ കോളേജിലേക്കും മാറ്റി. അനു ഇപ്പോഴും അവിടെ ചികിത്സയിൽ തുടരുകയാണ്.

​പ്രതി റിമാൻഡിൽ:

സംഭവത്തിന് ശേഷം ഒളിവിൽ പോയ പ്രതിയെ അയിരൂർ പോലീസ് നടത്തിയ അന്വേഷണത്തിനൊടുവിൽ ഒളിത്താവളത്തിൽ നിന്ന് പിടികൂടി. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. ഭാര്യയുടെ നിർദ്ദേശപ്രകാരമാണ് പ്രതി അനുവിനെ ആക്രമിച്ചതെന്ന് പോലീസ് വ്യക്തമാക്കി.