കള്ളൻ നടന്ന വഴിയിലൂടെ പോലീസും നടന്നു; വീട്ടമ്മയെ ആക്രമിച്ച പ്രതിയെ പിടികൂടിയത് അതിബുദ്ധിപരമായ നീക്കത്തിലൂടെ

 

ചാലക്കുടി: വാഴക്കുന്നിൽ പുലർച്ചെ പള്ളിയിൽ പോകാനിറങ്ങിയ വീട്ടമ്മയെ ക്രൂരമായി മർദ്ദിച്ച് മൂന്ന് പവൻ സ്വർണ്ണവളകൾ കവർന്ന കേസിൽ പ്രതിയെ ചാലക്കുടി പോലീസ് പിടികൂടി. കണ്ണൂർ സ്വദേശിയും പ്രമുഖ ധനകാര്യ സ്ഥാപനത്തിലെ ലോൺ അപ്രൂവറുമായ തലശ്ശേരി സ്വദേശി റോഷനെ (46) ആണ് തൃശൂർ റൂറൽ എസ്പിയുടെ നേതൃത്വത്തിലുള്ള പ്രത്യേക അന്വേഷണ സംഘം ബുദ്ധിപരമായ നീക്കത്തിലൂടെ വലയിലാക്കിയത്.

​ഓൺലൈൻ ലോൺ ആപ്പുകളുടെ കെണിയിൽപ്പെട്ട് ലക്ഷങ്ങളുടെ കടബാധ്യത തീർക്കാനാണ് ഉയർന്ന സാമ്പത്തിക ശേഷിയും വിദ്യാഭ്യാസവുമുള്ള പ്രതി ഈ ക്രൂരതയ്ക്ക് മുതിർന്നത്. കവർച്ച ചെയ്യപ്പെട്ട മൂന്ന് വളകളും പോലീസ് വിവിധയിടങ്ങളിൽ നിന്നായി കണ്ടെടുത്തു.

​പുലർച്ചെയുണ്ടായ അപ്രതീക്ഷിത ആക്രമണം

​കഴിഞ്ഞ ദിവസമാണ് കേസിനാസ്പദമായ സംഭവം നടക്കുന്നത്. ചാലക്കുടി പോട്ട സ്വദേശിനിയായ ലാലി (58) പതിവുപോലെ പുലർച്ചെ അഞ്ചരയോടെ ലിറ്റിൽ ഫ്ലവർ പള്ളിയിലേക്ക് പോകുന്നതിനായി വീട്ടിൽ നിന്നും ഇറങ്ങിയതായിരുന്നു. വീടിന് അല്പം അകലെയുള്ള വാഴക്കുന്ന് എന്ന വിജനമായ സ്ഥലത്ത് എത്തിയപ്പോൾ പിന്നിൽ നിന്നെത്തിയ ഒരാൾ അപ്രതീക്ഷിതമായി ലാലിയുടെ വായ പൊത്തിപ്പിടിച്ച് തൊട്ടടുത്തുള്ള പറമ്പിലേക്ക് വലിച്ചിഴച്ചു കൊണ്ടുപോവുകയായിരുന്നു.

​   കയ്യിൽ ഗ്ലൗസ് ധരിച്ച, നല്ല മസിലുള്ള, പ്രഭാത സവാരിക്കിറങ്ങുന്നവരുടെ ശരീരപ്രകൃതിയുള്ള ഒരു ചെറുപ്പക്കാരനാണ് തനിക്കൊപ്പമുള്ളതെന്ന് ലാലിക്ക് മനസ്സിലായി. എന്നാൽ പിടിവലിക്കിടെ മുഖത്ത് ക്രൂരമായി മർദ്ദനമേറ്റതോടെ ഇവർ ബോധരഹിതയായി വീണു. ബോധം വീണ്ടെടുത്തു നോക്കിയപ്പോഴാണ് കയ്യിലുണ്ടായിരുന്നു ഓരോ പവന്റെ മൂന്ന് സ്വർണ്ണ വളകൾ നഷ്ടപ്പെട്ട വിവരം ലാലി അറിയുന്നത്. ഉടൻ തന്നെ നാട്ടുകാരും ചാലക്കുടി പോലീസും സംഭവസ്ഥലത്തെത്തി അന്വേഷണം ആരംഭിച്ചു.

​പോലീസിനെ കുഴപ്പിച്ച ആദ്യഘട്ടം; വഴിത്തിരിവായ എസ്പിയുടെ തന്ത്രം

​പ്രദേശം മുഴുവൻ സിസിടിവി ദൃശ്യങ്ങൾ പരിശോധിച്ചെങ്കിലും സംശയാസ്പദമായി വാഹനങ്ങളൊന്നും കണ്ടെത്താൻ കഴിഞ്ഞില്ല. ഇതോടെ കള്ളൻ കാൽനടയായിട്ടാണ് എത്തിയതെന്ന നിഗമനത്തിൽ പോലീസ് എത്തിച്ചേർന്നു. എന്നാൽ ആദ്യദിനം പ്രതിയെക്കുറിച്ച് യാതൊരു സൂചനയും ലഭിച്ചില്ല.

​തുടർന്ന് തൃശ്ശൂർ റൂറൽ എസ്പി ബി. കൃഷ്ണകുമാർ ഈ കേസിൽ ഒരു നിർണ്ണായക തന്ത്രം മെനഞ്ഞു. കള്ളനെ ഉടൻ പിടിച്ചില്ലെങ്കിൽ സമാനമായ ആക്രമണങ്ങൾ തുടരാൻ സാധ്യതയുണ്ടെന്ന് മനസ്സിലാക്കിയ അദ്ദേഹം, ഒരു ഡസനോളം വരുന്ന പോലീസ് ഉദ്യോഗസ്ഥരോട് പുലർച്ചെ മുതൽ ആ റൂട്ടിൽ സാധാരണക്കാരെപ്പോലെ നടക്കാൻ നിർദ്ദേശം നൽകി.

​അതനുസരിച്ച് ചാലക്കുടി ഡിവൈഎസ്പി കെ.പി. ബെന്നി, ഇൻസ്പെക്ടർ ടി. ശശികുമാർ, പ്രൊബേഷൻ എസ്ഐ വൈശാഖ് എന്നിവരടങ്ങുന്ന സംഘം പുലർച്ചെ 4 മണി മുതൽ പോട്ട മുതൽ ആളൂർ വരെയുള്ള 4 കിലോമീറ്റർ ദൂരത്തിൽ നിരീക്ഷണം തുടങ്ങി. ഈ വഴിയിലൂടെ സ്ഥിരമായി നടക്കുന്ന 72 ഓളം പേരുടെ ചിത്രങ്ങൾ രഹസ്യമായി പകർത്തി ലാലിയെ കാണിച്ചു. അങ്ങനെ അന്വേഷണം ഒടുവിൽ ചെന്നെത്തിയത് റോഷനിലാണ്.

​ഫോൺ ഗാലറിയിലെ ചിത്രങ്ങൾ; ഞെട്ടിക്കുന്ന സത്യം പുറത്ത്

​റോഷന്റെ ശരീരപ്രകൃതിക്ക് ലാലി പറഞ്ഞ അടയാളങ്ങളുമായി വലിയ സാമ്യമുണ്ടായിരുന്നു. ഇക്കണോമിക്സിൽ പിജിയുള്ള, കണ്ണൂരിലെ ഒരു ധനകാര്യ സ്ഥാപനത്തിൽ ലോൺ അപ്രൂവറായി ജോലി ചെയ്യുന്ന വ്യക്തിയാണ് റോഷൻ എന്ന് അറിഞ്ഞപ്പോൾ പോലീസും ഞെട്ടി. സാമ്പത്തികമായി നല്ല നിലയിലുള്ള, ജിമ്മിലൊക്കെ പോകുന്ന സിനിമ നടനെപ്പോലെയുള്ള ഒരാൾ ഇത്തരം ഒരു പിടുത്തുപറിക്ക് മുതിരുമെന്ന് വിശ്വസിക്കാൻ പ്രയാസമായിരുന്നു.

​ആദ്യം റോഷൻ കുറ്റം നിഷേധിച്ചെങ്കിലും പോലീസ് ഫോൺ വാങ്ങി പരിശോധിച്ചതോടെ കഥ മാറി. ഫോൺ ഗാലറിയിൽ കണ്ണൂരിലെയും ചാലക്കുടിയിലെയും ജ്വല്ലറികളിൽ സ്വർണ്ണം വിറ്റതിന്റെ രസീതുകളും ചിത്രങ്ങളും ഉണ്ടായിരുന്നു. വ്യക്തമായ തെളിവ് ലഭിച്ചതോടെ ഓൺലൈൻ ലോൺ ആപ്പുകളുടെ കെണിയിൽ പെട്ടാണ് താൻ ഇത് ചെയ്തതെന്ന് റോഷൻ സമ്മതിച്ചു. വായ്പാ കമ്പനികളുടെ ഭീഷണിയും സമ്മർദ്ദവും ശക്തമായപ്പോൾ നാണക്കേട് ഭയന്നാണ് ഈ ക്രൂരതയ്ക്ക് മുതിർന്നതെന്നായിരുന്നു അയാളുടെ മൊഴി.

​പോലീസിന് അഭിനന്ദനപ്രവാഹം

​രണ്ടോ മൂന്നോ ദിവസം കഴിഞ്ഞ് പോലീസ് അന്വേഷണം ഉപേക്ഷിക്കുമെന്നായിരുന്നു റോഷൻ കരുതിയത്. എന്നാൽ കള്ളൻ നടന്ന അതേ വഴിയിലൂടെ നടന്ന് പ്രതിയെ വലയിലാക്കുക എന്ന പോലീസിന്റെ തന്ത്രം വൻ വിജയമായി മാറി.

​കേസ് അന്വേഷണത്തിൽ മികച്ച പ്രകടനം കാഴ്ചവെച്ച പോലീസ് ഉദ്യോഗസ്ഥരായ: ഡിവൈഎസ്പി ബെന്നി കെ.പി, ​ഇൻസ്പെക്ടർ ടി. ശശികുമാർ, ​പ്രൊബേഷൻ എസ്ഐ വൈശാഖ്, ​ടീം അംഗങ്ങളായ സതീശൻ മടപ്പാട്ടിൽ, പി.എം. മൂസ, വി.യു. സിൽജോ, എ.യു. റെജി, എം.ജെ. ബിനു, ശ്രീജിത്ത് ഇ.എ, ​സൈബർ സെല്ലിലെ ഷനൂക് സി.കെ, സനൂപ് സി.ആർ എന്നിവരുടെ സമഗ്രമായ ഇടപെടലാണ് ഈ കേസ് ഇത്രയും വേഗം തെളിയിക്കാൻ സഹായിച്ചത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.