കുമരകത്ത് ഭക്ഷ്യവിഷബാധ: കള്ളുഷാപ്പിൽ നിന്ന് ഭക്ഷണം കഴിച്ച യുവാവ് മരിച്ചു; ആറുപേർ ചികിത്സയിൽ

 

കോട്ടയം: കുമരകം ചൂളഭാഗത്ത് കള്ളുഷാപ്പിൽ നിന്ന് ഭക്ഷണം കഴിച്ചതിനെത്തുടർന്ന് യുവാവ് ഭക്ഷ്യവിഷബാധയേറ്റ് മരിച്ചു. ചൂളഭാഗം സ്വദേശി ജ്യോതിഷ് (40) ആണ് സ്വകാര്യ ആശുപത്രിയിൽ ചികിത്സയിലിരിക്കെ മരണപ്പെട്ടത്. സംഭവത്തിൽ ജ്യോതിഷിനൊപ്പമുണ്ടായിരുന്ന ആറുപേർ വിവിധ ആശുപത്രികളിൽ ചികിത്സയിലാണ്.

​കഴിഞ്ഞ ശനിയാഴ്ച ഉച്ചയ്ക്ക് രണ്ടരയോടെയാണ് ജ്യോതിഷും സുഹൃത്തുക്കളും അടങ്ങുന്ന ഏഴംഗ സംഘം പരിപ്പ് തൊള്ളായിരം ചിറയിലെ കള്ളുഷാപ്പിലെത്തിയത്. കുമളി സ്വദേശികളായ മൂന്നുപേരും കുമരകത്തുള്ള നാലുപേരുമായിരുന്നു സംഘത്തിലുണ്ടായിരുന്നത്. ഇവിടെ നിന്ന് കള്ളും മീൻ തലക്കറിയും കഴിച്ചതിന് പിന്നാലെയാണ് എല്ലാവർക്കും കടുത്ത ശാരീരിക അസ്വസ്ഥതകൾ അനുഭവപ്പെട്ടത്.

​ഛർദ്ദി, വയറുവേദന, വയറിളക്കം, പനി, വിറയൽ തുടങ്ങിയ ലക്ഷണങ്ങൾ പ്രകടമായതിനെത്തുടർന്ന് ഇവരെ ഉടൻ തന്നെ വിവിധ ആശുപത്രികളിലേക്ക് മാറ്റുകയായിരുന്നു. ചികിത്സയിലിരിക്കെ ജ്യോതിഷ് മരണപ്പെടുകയായിരുന്നു. ആശുപത്രിയിൽ നടത്തിയ പരിശോധനയിൽ ജ്യോതിഷിന്റെ ക്രിയാറ്റിനിൻ നിരക്ക് ഒൻപത് ശതമാനത്തിന് മുകളിലാണെന്ന് കണ്ടെത്തിയിരുന്നു. ഇത് വൃക്കകളുടെ പ്രവർത്തനത്തെ സാരമായി ബാധിച്ചതാണ് മരണകാരണമെന്നാണ് ഡോക്ടർമാരുടെ പ്രാഥമിക നിഗമനം.

​സംഭവമറിഞ്ഞ് പോലീസും ആരോഗ്യവകുപ്പ് അധികൃതരും ഷാപ്പിലെത്തി പരിശോധന നടത്തി. ഭക്ഷണസാമ്പിളുകൾ ശേഖരിച്ച് ലാബിലേക്ക് അയച്ചിട്ടുണ്ട്. ഇരുപതു വർഷത്തിലേറെയായി പ്രവർത്തിച്ചുവരുന്ന ഷാപ്പാണിത്. അന്ന് ഇവിടെനിന്ന് ഭക്ഷണം കഴിച്ച മറ്റ് മൂന്നുപേർക്കും ചെറിയ തോതിൽ ശാരീരിക ബുദ്ധിമുട്ടുകൾ ഉണ്ടായെങ്കിലും അവർ ആശുപത്രിയിൽ ചികിത്സ തേടിയിട്ടില്ലെന്ന് വിവരമുണ്ട്.

​ഭക്ഷ്യവിഷബാധയാണോ മരണകാരണമെന്ന് ഔദ്യോഗികമായി സ്ഥിരീകരിക്കുന്നതിനായി കൂടുതൽ ശാസ്ത്രീയ പരിശോധനാഫലങ്ങൾ വരണമെന്ന് ആരോഗ്യവകുപ്പ് അറിയിച്ചു. ഷാപ്പിൽ നിന്നുള്ള ഭക്ഷണമാണോ അതോ മറ്റേതെങ്കിലും കാരണമാണോ മരണത്തിലേക്ക് നയിച്ചതെന്ന് പോലീസ് സംഘം വിശദമായി അന്വേഷിച്ചുവരികയാണ്.