​"മനുഷ്യന് കൊടുക്കാനല്ലേ ഇതൊക്കെ ഉണ്ടാക്കുന്നത്?": കടുത്ത നിയമലംഘനം പിടികൂടിയ ഹെൽത്ത് ഇൻസ്പെക്ടർക്ക് നേരെ ഹോട്ടലുടമയുടെ അസഭ്യവർഷം

 

കോട്ടയം: മുളക്കുളത്ത് ഹോട്ടലിൽ പരിശോധനയ്ക്കെത്തിയ വനിതാ ഹെൽത്ത് ഇൻസ്പെക്ടർ ഉൾപ്പെടെയുള്ള ആരോഗ്യവകുപ്പ് ഉദ്യോഗസ്ഥർക്ക് നേരെ കടുത്ത അസഭ്യവർഷവും ഭീഷണിയും മുഴക്കിയ ഹോട്ടലുടമയ്ക്കെതിരെ പോലീസ് കേസെടുത്തു. മുളക്കുളം മൂർക്കാട്ടിപ്പടിയിൽ പ്രവർത്തിക്കുന്ന ഹോട്ടലിന്റെ ഉടമ ബെഞ്ചമിനെതിരെയാണ് വെള്ളൂർ പോലീസ് കേസ് രജിസ്റ്റർ ചെയ്തത്. ഔദ്യോഗിക കൃത്യനിർവഹണം തടസ്സപ്പെടുത്തൽ, സ്ത്രീത്വത്തെ അപമാനിക്കൽ തുടങ്ങിയ കുറ്റങ്ങൾ ചുമത്തിയാണ് നടപടി.

​പരിശോധനയ്ക്കിടെ കടുത്ത നിയമലംഘനം, ചോദ്യം ചെയ്തപ്പോൾ തെറിയഭിഷേകം

​മൂർക്കാട്ടിപ്പടിയിലെ ഈ ഹോട്ടലിൽ ആരോഗ്യവകുപ്പ് സംഘം എത്തുമ്പോൾ അങ്ങേയറ്റം വൃത്തീഹീനമായ അവസ്ഥയിലായിരുന്നു അടുക്കളയും പരിസരവും. ചെളി നിറഞ്ഞ തറയിൽ, അഴുക്കുപിടിച്ച പാത്രങ്ങളിലാണ് അരിഞ്ഞ പച്ചക്കറികൾ സൂക്ഷിച്ചിരുന്നത്. തുറന്നുവെച്ച ഭക്ഷ്യവസ്തുക്കളും പ്ലാസ്റ്റിക് കവറുകളും പരിശോധിക്കുന്നതിനിടെ ഹെൽത്ത് ഇൻസ്പെക്ടർ ശ്രീലത ജീവനക്കാരോട് ഇതിന്റെ വൃത്തികേടിനെക്കുറിച്ച് ചോദ്യങ്ങൾ ഉന്നയിച്ചു. "മനുഷ്യന് കൊടുക്കാൻ തന്നെയല്ലേ ചേട്ടാ ഇതൊക്കെ ഉണ്ടാക്കുന്നത്? വേസ്റ്റ് ഇടുന്ന പാത്രം പോലും നമ്മളൊക്കെ കഴുകി വെയ്ക്കും, എന്ത് വൃത്തികേടാണിത്" എന്ന് ഇൻസ്പെക്ടർ ചോദിച്ചതാണ് ഹോട്ടലുടമയെ പ്രകോപിപ്പിച്ചത്.

​തുടർന്ന് ഹെൽത്ത് ഇൻസ്പെക്ടർ ശ്രീലതയുടെ ചുറ്റും നടന്ന് ബെഞ്ചമിൻ കടുത്ത ഭാഷയിൽ അസഭ്യം പറയുകയായിരുന്നു. "വർഷങ്ങളായി ഞാനിത് തുടങ്ങിയിട്ട്... നിനക്കൊക്കെ പൂട്ടിക്കാനല്ലേ അറിയാവൂ. നീ ചുമന്നോണ്ട് പോടീ... എന്റടുത്ത് കളിക്കാൻ വരരുത് കേട്ടോ..." എന്നായിരുന്നു ബെഞ്ചമിന്റെ ഭീഷണിയും തെറിയും. ഒപ്പമുണ്ടായിരുന്ന ആരോഗ്യവകുപ്പ് ജീവനക്കാർ നിയമലംഘനങ്ങളുടെ ദൃശ്യങ്ങൾ മൊബൈലിൽ പകർത്താൻ തുടങ്ങിയതോടെ, അതൊക്കെ ഏത് ഓഫീസിലേക്ക് വേണമെങ്കിലും കൊണ്ടുപൊയ്ക്കോ എന്ന് പറഞ്ഞ് ഇയാൾ വീണ്ടും അസഭ്യം ആവർത്തിച്ചു.

​ഭീഷണിക്ക് മുന്നിൽ കുലുങ്ങാതെ ഉദ്യോഗസ്ഥർ

​ഹോട്ടലുടമയുടെ കടുത്ത ഭീഷണികൾക്കും അസഭ്യവർഷത്തിനും മുന്നിലും വനിതാ ഹെൽത്ത് ഇൻസ്പെക്ടർ ശ്രീലതയും ജൂനിയർ ഹെൽത്ത് ഇൻസ്പെക്ടർ വസീമും കുലുങ്ങിയില്ല. ഭയപ്പെടാതെ നിന്ന ഉദ്യോഗസ്ഥർ ഹോട്ടലിൽ വിശദമായ പരിശോധന പൂർത്തിയാക്കുകയും, കൃത്യമായ തെളിവുകളും ചിത്രങ്ങളും ദൃശ്യങ്ങളും ശേഖരിക്കുകയും ചെയ്തു.

​കഴിഞ്ഞയാഴ്ചയും ആരോഗ്യവകുപ്പ് ഉദ്യോഗസ്ഥർ ഈ ഹോട്ടലിൽ പരിശോധന നടത്തുകയും ചട്ടങ്ങൾ പാലിക്കണമെന്ന് കർശന നിർദേശം നൽകുകയും ചെയ്തിരുന്നതാണ്. എന്നാൽ ഈ മുന്നറിയിപ്പുകൾ പൂർണ്ണമായും വകവെയ്ക്കാതെയാണ് വീണ്ടും വൻതോതിൽ വൃത്തിഹീനമായ അന്തരീക്ഷത്തിൽ ഹോട്ടൽ പ്രവർത്തിപ്പിച്ചത്. സംഭവത്തെ തുടർന്ന് ഹെൽത്ത് ഇൻസ്പെക്ടർ ശ്രീലതയും ജൂനിയർ ഹെൽത്ത് ഇൻസ്പെക്ടർ വസീമും വെള്ളൂർ പോലീസിൽ ഔദ്യോഗികമായി പരാതി നൽകി. കേസ് രജിസ്റ്റർ ചെയ്ത പോലീസ് ഹോട്ടലുടമ ബെഞ്ചമിനെതിരെ കടുത്ത നടപടികളിലേക്ക് കടന്നിരിക്കുകയാണ്. ഹോട്ടലിനെതിരെ തദ്ദേശ സ്ഥാപനവും ആരോഗ്യവകുപ്പും കർശന നടപടി സ്വീകരിക്കുമെന്നാണ് സൂചന.