പ്ലസ് ടുവിന് മുഴുവൻ എ പ്ലസ്, പക്ഷെ റേഷൻ കാര്ഡില്ല; അതിഥി തൊഴിലാളിയുടെ മകന് തുണയായി മുഖ്യമന്ത്രിയുടെ അടിയന്തര ഇടപെടല്..
തിരുവനന്തപുരം: പ്രതിസന്ധികളോട് പോരാടി പ്ലസ് ടു പരീക്ഷയിൽ മുഴുവൻ വിഷയങ്ങൾക്കും ‘എ പ്ലസ്’ നേടി തിളക്കമാർന്ന വിജയം സ്വന്തമാക്കിയിട്ടും, റേഷൻ കാർഡില്ലെന്ന സാങ്കേതികത്വത്തിൽ ഉപരിപഠനം വഴിമുട്ടിയ അതിഥി തൊഴിലാളിയുടെ മകന് തുണയായി മുഖ്യമന്ത്രി വി.ഡി. സതീശന്റെ അടിയന്തര ഇടപെടൽ. മുഖ്യമന്ത്രിയുടെ സമയബന്ധിതമായ ഇടപെടലിനെ തുടർന്ന് പശ്ചിമബംഗാൾ സ്വദേശിയായ റോഹൻ പ്രധാനിന് തിരുവനന്തപുരം മാർ ഇവാനിയോസ് കോളേജിൽ ബിരുദ പ്രവേശനത്തിനായി വിജയകരമായി അപേക്ഷിക്കാൻ വഴിതെളിഞ്ഞു.
പശ്ചിമബംഗാൾ സ്വദേശികളായ റോബർട്ട് പ്രധാന്റെയും റീതാ പ്രധാന്റെയും മകനാണ് റോഹൻ. ഒട്ടനവധി പരിമിതികൾക്കുള്ളിൽ നിന്നുകൊണ്ട് കഠിനാധ്വാനത്തിലൂടെയാണ് ഈ മിടുക്കൻ പ്ലസ് ടുവിന് ഉജ്ജ്വല വിജയം കരസ്ഥമാക്കിയത്. എന്നാൽ, താൻ ആഗ്രഹിച്ച കോളേജിൽ ബിരുദ കോഴ്സിന് അപേക്ഷിക്കാൻ ശ്രമിച്ചപ്പോഴാണ് റേഷൻ കാർഡില്ലെന്ന വിവരം റോഹന് മുന്നിൽ വലിയൊരു തടസ്സമായി ഉയർന്നുവന്നത്. സാങ്കേതിക കാരണങ്ങളാൽ കോളേജ് അധികൃതരും കൈമലർത്തിയതോടെ കുട്ടിയുടെ ഉപരിപഠനം വലിയ ആശങ്കയിലാവുകയായിരുന്നു.
മുഖ്യമന്ത്രിക്ക് മുന്നിലെത്തിയ സങ്കടം; ഉടനടി പരിഹാരം
ആശങ്കയിലായ റോഹൻ, പത്തനംതിട്ട ജില്ലാ പഞ്ചായത്ത് അംഗം ആരോൺ ബിജിലി പനവേലിനൊപ്പം കഴിഞ്ഞദിവസമാണ് മുഖ്യമന്ത്രി വി.ഡി. സതീശനെ നേരിൽക്കണ്ട് സങ്കടം ബോധിപ്പിച്ചത്. വിദ്യാർത്ഥിയുടെ അവസ്ഥയും പഠന മികവും മനസ്സിലാക്കിയ മുഖ്യമന്ത്രി ഉടനടി വിഷയത്തിൽ ഇടപെടുകയായിരുന്നു. പ്രവേശനത്തിനുള്ള തടസ്സങ്ങൾ അതിവേഗം നീക്കാൻ ബന്ധപ്പെട്ട അധികൃതർക്ക് അദ്ദേഹം കർശന നിർദ്ദേശം നൽകി. മുഖ്യമന്ത്രിയുടെ അടിയന്തര ഇടപെടലിന് പിന്നാലെ തടസ്സങ്ങളെല്ലാം നീങ്ങി റോഹന് താൻ ആഗ്രഹിച്ച കോഴ്സിന് തന്നെ വിജയകരമായി അപേക്ഷിക്കാൻ സാധിച്ചു.
കേരളമാണ് ഇനി ജീവിതം
1995-ലാണ് റോഹന്റെ പിതാവ് റോബർട്ട് പ്രധാൻ ഉപജീവനത്തിനായി കേരളത്തിലെത്തുന്നത്. വർഷങ്ങൾക്ക് ശേഷം കുടുംബത്തെയും ഇങ്ങോട്ട് കൂട്ടിക്കൊണ്ടുവരികയായിരുന്നു. പ്രതിസന്ധികൾക്കിടയിലും മകനെ മികച്ച രീതിയിൽ പഠിപ്പിക്കാൻ ഈ മാതാപിതാക്കൾ ശ്രദ്ധിച്ചു. ഉപരിപഠനവും ഭാവിജീവിതവുമെല്ലാം തനിക്ക് ജീവിക്കാനും പഠിക്കാനും സാഹചര്യമൊരുക്കിയ കേരളത്തിൽ തന്നെ വേണമെന്നാണ് ഈ ബംഗാളി വിദ്യാർത്ഥിയുടെ ആഗ്രഹം. മുഖ്യമന്ത്രിയുടെ കരുതലിൽ പഠന സ്വപ്നങ്ങൾക്ക് വീണ്ടും ചിറക് മുളച്ചതിന്റെ സന്തോഷത്തിലാണ് ഇപ്പോൾ റോഹനും കുടുംബവും.
Comments
Post a Comment