ആലപ്പുഴയുടെ നൊമ്പരമായി മാറിയ ആ ചെറുപ്പക്കാരന് കൈത്താങ്ങായി സൂരജ്

 

ആലപ്പുഴ: ജീവിതത്തോട് പൊരുതി തോറ്റുപോയ ഒരു യുവാവിന് ആശ്വാസമായി സൂരജിന്റെ കാരുണ്യസ്പർശം. കഠിനമായ ശാരീരിക വെല്ലുവിളികൾക്കും സാമ്പത്തിക പ്രതിസന്ധികൾക്കും നടുവിൽ നിസ്സഹായനായി നിന്ന ആലപ്പുഴ സ്വദേശിയായ യുവാവിന്, തന്റെ കൈയിലുണ്ടായിരുന്ന 20,000 രൂപ നൽകി സൂരജ് മാതൃകയായി.

​കഴിഞ്ഞദിവസം വിശപ്പടക്കാൻ വകയില്ലാതെ അലയുകയായിരുന്ന യുവാവിനെ കണ്ടപ്പോഴാണ് സൂരജ് സഹായഹസ്തവുമായി എത്തിയത്. ശാരീരികാവസ്ഥയെക്കുറിച്ചും അനുഭവിച്ചുവരുന്ന അവഗണനകളെക്കുറിച്ചും യുവാവ് സൂരജിനോട് തുറന്നുപറഞ്ഞു. ആറുമാസം പ്രായമുള്ളപ്പോൾ മുതൽ തുടങ്ങിയ ശസ്ത്രക്രിയകളുടെ വേദനയും, ജന്മനാ അണ്ണാക്കില്ലാത്തതിനാലും ചുണ്ടുകൾ മുറിഞ്ഞതിനാലും നേരിടുന്ന ഭക്ഷണപ്രയാസങ്ങളും സംസാരിക്കാനുള്ള ബുദ്ധിമുട്ടുകളും കേട്ടറിഞ്ഞ ഏതൊരാളും കണ്ണ് നിറയുന്ന അവസ്ഥയിലാണ് യുവാവുള്ളത്.

​"പഠിക്കുന്ന കാലം മുതൽ സമൂഹത്തിൽ നിന്നും നേരിട്ട അവഗണനകൾ മൂലം പുറത്തിറങ്ങാൻ പോലും പേടിയാണ്. എം.എ വരെ പഠിച്ചിട്ടും ജോലി ലഭിക്കാത്തത് സങ്കടപ്പെടുത്തുന്നു," എന്ന് യുവാവ് പൊട്ടിക്കരഞ്ഞുകൊണ്ട് പറയുകയായിരുന്നു. വീട്ടിൽ അച്ഛനും അമ്മയും മാത്രമാണുള്ളതെന്നും, രാവിലെ മുതൽ ഭക്ഷണം കഴിക്കാൻ പോലും മാർഗമില്ലെന്നും ഇദ്ദേഹം സൂരജിനോട് പങ്കുവെച്ചു.

​ഈ സങ്കടകരമായ കാഴ്ച കണ്ട് ഉള്ളുലഞ്ഞ സൂരജ്, ഉടൻ തന്നെ ആ യുവാവിനെ സഹായിക്കാൻ തീരുമാനിക്കുകയായിരുന്നു. തന്റെ കൈയിലുണ്ടായിരുന്ന 200 രൂപയുടെ നോട്ടുകെട്ട് എണ്ണാൻ യുവാവിനെ ഏൽപ്പിക്കുകയും, സമയം കഴിഞ്ഞിട്ടും നിർത്തുവാൻ പറയാതെ ആ തുക മുഴുവനും—ഇരുപതിനായിരം രൂപ—അദ്ദേഹത്തിന് നൽകുകയും ചെയ്തു. സ്നേഹത്തോടെ ആ യുവാവിനെ ചേർത്തുപിടിച്ച് ആശ്വസിപ്പിച്ച സൂരജ്, അദ്ദേഹത്തിന്റെ ജീവിതത്തിന് ആവശ്യമായ മറ്റ് സഹായങ്ങളും വാഗ്ദാനം ചെയ്തു.

​സോഷ്യൽ മീഡിയയിൽ പ്രചരിക്കുന്ന ഇത്തരത്തിലുള്ള വീഡിയോകൾ വെറും പബ്ലിസിറ്റിക്ക് വേണ്ടിയുള്ളതാണെന്ന വിമർശനങ്ങൾക്ക് മറുപടിയായി, ഇതൊരു വലിയ പ്രചോദനമാണെന്ന് പൊതുജനം അഭിപ്രായപ്പെടുന്നു. വഴിയരികിൽ വിശന്നുവലയുന്ന നിരവധി പേർ നമ്മുടെ ഇടയിലുണ്ടെന്നും, അവർക്ക് നൽകുന്ന ചെറിയ സഹായങ്ങൾ പോലും വലിയ മാറ്റങ്ങൾ സൃഷ്ടിക്കുമെന്നും സൂരജിന്റെ ഈ പ്രവർത്തി ഓർമ്മിപ്പിക്കുന്നു.