വനിതാ ഡോക്ടറുടെ ആത്മഹത്യ; ഭർത്താവായ നേത്രരോഗ വിദഗ്ധൻ അറസ്റ്റിൽ

 

ജലന്ധർ: പഞ്ചാബിലെ കപുർത്തല സിവിൽ ആശുപത്രിയിലെ നേത്രരോഗ വിദഗ്ധ ഡോ. മീനാക്ഷി (37) ജീവനൊടുക്കിയ സംഭവത്തിൽ ഭർത്താവും നേത്രരോഗ വിദഗ്ധനുമായ ഡോ. പീയുഷ് സൂദ് അറസ്റ്റിൽ. ആത്മഹത്യാ പ്രേരണാക്കുറ്റം ചുമത്തിയാണ് പോലീസ് ഇയാളെ കസ്റ്റഡിയിലെടുത്തത്. കഴിഞ്ഞ ബുധനാഴ്ച ജലന്ധറിലെ വസതിയിൽ മീനാക്ഷിയെ മരിച്ച നിലയിൽ കണ്ടെത്തിയതോടെയാണ് സംഭവങ്ങളുടെ ചുരുളഴിയുന്നത്.

ഭർത്താവിന്റെ ശാരീരികവും മാനസികവുമായ പീഡനങ്ങളാണ് ഡോ. മീനാക്ഷിയെ മരണത്തിലേക്ക് തള്ളിവിട്ടതെന്ന് പിതാവ് നൽകിയ പരാതിയിൽ പറയുന്നു. പീയുഷിന് മറ്റൊരു നഴ്സുമായുള്ള അവിഹിത ബന്ധം മീനാക്ഷി കണ്ടെത്തിയതോടെയാണ് കുടുംബജീവിതത്തിൽ താളം തെറ്റിയത്. വിവാഹേതര ബന്ധത്തെ ചോദ്യം ചെയ്തതിന് പിന്നാലെ മീനാക്ഷിയെ ഇയാൾ ക്രൂരമായി ഉപദ്രവിക്കാറുണ്ടായിരുന്നു.

​സാമ്പത്തിക തട്ടിപ്പ്:

ജലന്ധറിൽ ‘നാഷണൽ ഐ കെയർ’ എന്ന കണ്ണാശുപത്രി തുടങ്ങാൻ പീയുഷിനെ സഹായിച്ചത് മീനാക്ഷിയായിരുന്നു. വിവാഹശേഷം 35 ലക്ഷം രൂപ വായ്പയെടുത്ത് നൽകുകയും സ്വന്തം ശമ്പളത്തിൽ നിന്ന് അത് തിരിച്ചടയ്ക്കുകയും ചെയ്ത മീനാക്ഷിക്ക് പിന്നീട് ലഭിച്ചത് വലിയ ചതിയായിരുന്നു. സ്വന്തമായി വീട് വാങ്ങാൻ ബാങ്കിനെ സമീപിച്ചപ്പോഴാണ്, തന്റെ അറിവില്ലാതെ സ്വന്തം പേരിൽ പീയുഷ് 2.5 കോടി രൂപയുടെ വായ്പയെടുത്ത വിവരം മീനാക്ഷി അറിയുന്നത്. ഇക്കാര്യം ചോദ്യം ചെയ്തതിന് പിന്നാലെ പീയുഷ് മകളെ കടുത്ത മാനസിക സമ്മർദ്ദത്തിലാക്കി ഭീഷണിപ്പെടുത്തിയതായും പിതാവ് ആരോപിച്ചു.

​നേരത്തെയും വധശ്രമം:

പീയുഷ് മീനാക്ഷിയെ കൊലപ്പെടുത്താൻ ശ്രമിച്ചതായും കുടുംബം വെളിപ്പെടുത്തി. 2025-ൽ ഇയാൾ മീനാക്ഷിയെ കഴുത്തുഞെരിച്ച് കൊല്ലാൻ ശ്രമിച്ചിരുന്നു. അന്ന് പോലീസ് ഹെൽപ്പ്‌ലൈനിൽ വിളിച്ച് മീനാക്ഷി സഹായം തേടിയിരുന്നു. ഈ സംഭവത്തിന് ശേഷം ഇരുവരും വേർപിരിഞ്ഞാണ് താമസിച്ചിരുന്നത്.

​തെളിവുകൾ പോലീസിന്:

ഭർത്താവിന്റെ വിവാഹേതര ബന്ധം തെളിയിക്കുന്ന നിർണ്ണായക ദൃശ്യങ്ങൾ ഉൾപ്പെടെയുള്ള തെളിവുകൾ തങ്ങൾ പോലീസിന് കൈമാറിയിട്ടുണ്ടെന്ന് മീനാക്ഷിയുടെ കുടുംബം അറിയിച്ചു. പ്രശ്നപരിഹാരത്തിനായി നടത്തിയ ചർച്ചകൾ ഫലപ്രദമാകാതിരുന്നതും, സാമ്പത്തിക ബാധ്യതയും, ഭർത്താവിന്റെ പീഡനങ്ങളും മീനാക്ഷിയെ ആത്മഹത്യയിലേക്ക് നയിക്കുകയായിരുന്നുവെന്നാണ് പോലീസിന്റെ പ്രാഥമിക നിഗമനം. പ്രതിയെ കോടതിയിൽ ഹാജരാക്കി തുടർനടപടികൾ സ്വീകരിച്ചു വരികയാണെന്ന് പോലീസ് അറിയിച്ചു.