​"എന്റെ മക്കൾ നേർവഴിക്ക് നടക്കണം"; മാറ്റത്തിന്റെ സന്ദേശവുമായി കണ്ണൂരിലെ ഓട്ടോ ഡ്രൈവർ

 

കണ്ണൂർ: ഇന്നത്തെ തലമുറ വഴിതെറ്റിപ്പോകുന്ന വാർത്തകൾ നിത്യേന കേൾക്കുമ്പോൾ നെഞ്ചുപൊട്ടുന്ന ഒരുപിടി മാതാപിതാക്കളുടെ പ്രതിനിധിയായി മാറുകയാണ് കണ്ണൂർ ബസ് സ്റ്റാൻഡിലെ ഒരു ഓട്ടോ ഡ്രൈവർ. തന്റെ ഉപജീവനമാർഗ്ഗമായ ഓട്ടോറിക്ഷയുടെ പിൻഭാഗത്ത്, ഇന്നത്തെ കുട്ടികളുടെ കണ്ണുതുറപ്പിക്കാൻ പോന്ന ഒരു ഹൃദ്യമായ സന്ദേശം എഴുതിവെച്ചാണ് ഈ  ഓട്ടോ ഡ്രൈവർ നഗരത്തിൽ ശ്രദ്ധേയനാകുന്നത്.

​മാതാപിതാക്കളുടെ കണ്ണീരൊപ്പാൻ ഒരെഴുത്ത്

പഠനം മറന്നും ലഹരിയുടെയും മറ്റ് സാമൂഹിക വിപത്തുകളുടെയും കെണിയിൽപ്പെട്ടും ജീവിതം ഹോമിക്കുന്ന മക്കളെക്കുറിച്ചുള്ള വാർത്തകൾ ഈ ഓട്ടോ ഡ്രൈവറെ ഏറെ അസ്വസ്ഥനാക്കിയിരുന്നു. മക്കളെ ഓർത്ത് നീറിക്കഴിയുന്ന ഒരുപാട് മാതാപിതാക്കളെ താൻ ദിവസവും കാണാറുണ്ടെന്ന് അദ്ദേഹം പറയുന്നു. ഈ സാഹചര്യത്തിലാണ് സമൂഹത്തിന് വേണ്ടി തനിക്കാവുന്നത് ചെയ്യണമെന്ന ചിന്ത അദ്ദേഹത്തിലുണ്ടായത്.

​"ഇന്നത്തെ കാലത്ത് ഓരോ വാർത്തകൾ കേൾക്കുമ്പോൾ വളരെ വിഷമം തോന്നാറുണ്ട്. മക്കളെയോർത്ത് വിഷമിക്കുന്ന ഒരുപാട് മാതാപിതാക്കളുണ്ട് നമ്മുടെയിടയിൽ. ഈ പ്രായത്തിൽ എനിക്ക് ചെയ്യാൻ പറ്റുന്ന കാര്യം ഇതാണ്... മക്കളെ ഓർമ്മപ്പെടുത്തുക. ഈ എഴുത്ത് കണ്ട് ഒരാളെങ്കിലും നേർവഴി വന്നാൽ നല്ലതല്ലേ? എല്ലാ മക്കളും നല്ല നിലയിൽ പഠിച്ച് അവരവരുടെ മാതാപിതാക്കളെ നന്നായി നോക്കിയാൽ മാത്രം മതി," നന്മ നിറഞ്ഞ പുഞ്ചിരിയോടെ അദ്ദേഹം തന്റെ മനസ്സ് തുറന്നു.

​യാത്രക്കാരുടെയും നാട്ടുക്കാരുടെയും അഭിനന്ദനം

ഓട്ടോയുടെ പിന്നിലെ ഈ മനസ്സിൽ തട്ടിയുള്ള സന്ദേശം കണ്ണൂർ നഗരത്തിലൂടെ കടന്നുപോകുമ്പോൾ നിരവധി പേരുടെ ശ്രദ്ധയിലാണ് പെടുന്നത്. വണ്ടിയിൽ കയറുന്ന യാത്രക്കാരും വഴിപോക്കരും ഈ എഴുത്ത് വായിക്കുകയും അദ്ദേഹത്തിന്റെ നല്ല മനസ്സിനെ അഭിനന്ദിക്കുകയും ചെയ്യുന്നുണ്ട്. പലരും ഇതിന്റെ ചിത്രങ്ങൾ പകർത്തി സമൂഹമാധ്യമങ്ങളിലും പങ്കുവെക്കുന്നു.

​വലിയ പ്രസംഗങ്ങളോ ഉപദേശങ്ങളോ കൊണ്ടല്ല, മറിച്ച് തന്റെ മുന്നിലൂടെ കടന്നുപോകുന്ന തലമുറയോടുള്ള താല്പര്യവും സ്നേഹവും കൊണ്ടാണ് ഈ സാധാരണക്കാരനായ ഓട്ടോ ഡ്രൈവർ വലിയൊരു സാമൂഹിക സന്ദേശം സമൂഹത്തിന് കൈമാറുന്നത്. ഈ വാക്കുകൾ കണ്ട് ഒരൊറ്റ മകൻ മാത്രമെങ്കിലും തിരുത്താൻ തയ്യാറായാൽ തന്റെ ഈ ശ്രമം സഫലമായി എന്നാണ് ഈ മനുഷ്യൻ വിശ്വസിക്കുന്നത്.