പഞ്ചവടിപ്പാലം വീതികൂട്ടി പുനർനിർമ്മിക്കും; കക്കയം - മുതുകാട് റോഡിനായി കൈകോർത്ത് വിവിധ വകുപ്പുകൾ; ഉറപ്പുകളുമായി ജില്ലാ പ്രതിനിധി കുന്നുമ്മൽ

 

കൂരാച്ചുണ്ട്: മലബാറിലെ  ടൂറിസ്റ്റ് കേന്ദ്രമായ കക്കയത്തിന്റെ സമഗ്ര വികസനത്തിനും യാത്രാക്ലേശം പരിഹരിക്കുന്നതിനുമായി വിപുലമായ പദ്ധതികൾക്ക് തുടക്കമിടുന്നു. കക്കയത്തെ ബാംബു പാർക്ക് നിർമ്മാണം യഥാർത്ഥ്യമാക്കുക, അപകടാവസ്ഥയിലായ പഞ്ചവടിപ്പാലം വീതികൂട്ടി പുനർനിർമ്മിക്കുക, ദീർഘകാലമായി നാട്ടുകാർ ആവശ്യപ്പെടുന്ന കക്കയം - മുതുകാട് റോഡ് നിർമ്മാണം വേഗത്തിലാക്കുക തുടങ്ങിയ വികസന, ടൂറിസം സാധ്യതകൾക്ക് വേഗം കൂട്ടാനാണ് ജനപ്രതിനിധികളുടെ നേതൃത്വത്തിൽ ശ്രമം ആരംഭിച്ചിരിക്കുന്നത്.

​പദ്ധതികളുടെ സുഗമമായ നടത്തിപ്പിന് തടസ്സമായി നിൽക്കുന്ന സാങ്കേതിക പ്രശ്നങ്ങൾ പരിഹരിക്കുന്നതിനായി ഇറിഗേഷൻ, ഫോറസ്റ്റ് തുടങ്ങിയ ബന്ധപ്പെട്ട വിവിധ സർക്കാർ വകുപ്പുകളുമായി ഉന്നതതല ചർച്ചകൾ നടത്തുമെന്നും, അനുയോജ്യമായ അനുകൂല തീരുമാനങ്ങൾ നേടിയെടുക്കാൻ പരമാവധി ശ്രമിക്കുമെന്നും ജില്ലാ പഞ്ചായത്ത് മെമ്പർ റീമ കുന്നുമ്മൽ ഉറപ്പുനൽകി. വനമേഖലയോടും റിസർവോയറിനോടും ചേർന്നുകിടക്കുന്ന പ്രദേശമായതിനാൽ വകുപ്പുകളുടെ ഏകോപനം പദ്ധതികൾക്ക് അനിവാര്യമാണ്.

​മേഖലയിലെ വികസന മുരടിപ്പിന് പരിഹാരം കാണാൻ ജനപ്രതിനിധികളും രാഷ്ട്രീയ സാംസ്കാരിക പ്രവർത്തകരും ഒന്നിച്ച് ചേർന്ന് നടത്തിയ ചർച്ചയിലാണ് ഈ തീരുമാനങ്ങൾ ഉരുത്തിരിഞ്ഞത്. യോഗത്തിൽ വാർഡ് മെമ്പർ ഡാർലി എബ്രഹാം, വാർഡ് പ്രസിഡന്റ് ബേബി തേക്കാനം, ആൻട്രൂസ് കട്ടിക്കാന, മുനീർ എ.എസ്, മുഹമ്മദ് കൊടുക്കൽ, രാജേഷ് തുടങ്ങിയ പ്രമുഖർ പങ്കെടുത്തു സംസാരിക്കുകയും കക്കയത്തിന്റെ വികസന ആവശ്യങ്ങൾ ജില്ലാ പ്രതിനിധിയുടെ ശ്രദ്ധയിൽപ്പെടുത്തുകയും ചെയ്തു.

​വകുപ്പുകളുടെ അനുമതി കൂടി ലഭിക്കുന്നതോടെ കക്കയം, മുതുകാട് മേഖലകളുടെ ടൂറിസം ഭൂപടത്തിൽ വലിയ മാറ്റങ്ങൾക്കാണ് വഴിതുറക്കുക.