തൃശ്ശൂർ നഗരമധ്യത്തിലെ രഹസ്യ പെൺവാണിഭ കേന്ദ്രം; പണമിടപാടിലെ തർക്കത്തിനിടെ മർദ്ദനമേറ്റ യുവാവ് മരിച്ചു

 

തൃശ്ശൂർ: നഗരമധ്യത്തിലെ സ്വരാജ് റൗണ്ടിനോട് ചേർന്നുള്ള കൂറപ്പത്ത് ലൈനിൽ പ്രവർത്തിച്ചിരുന്ന രഹസ്യ പെൺവാണിഭ കേന്ദ്രത്തിൽ പണമിടപാടുമായി ബന്ധപ്പെട്ടുണ്ടായ തർക്കത്തെത്തുടർന്ന് യുവാവ് അതിക്രൂരമായി മർദ്ദനമേറ്റ് മരിച്ചു. ഒഡീഷ സ്വദേശിയായ ധൻപതി നായക് ആണ് ചികിത്സയിലിരിക്കെ മരണപ്പെട്ടത്.

കഴിഞ്ഞ പതിനെട്ടാം തീയതി രാത്രി പത്തുമണിയോടെയായിരുന്നു സംഭവം. തൃശ്ശൂരിലെ ഒരു ഹോട്ടലിൽ ജോലി ചെയ്തുവരികയായിരുന്ന ധൻപതി നായക് സുഹൃത്തുക്കളായ മക്കറ മാജി, ത്രിനാഥ് മാജി എന്നിവർക്കൊപ്പമാണ് കൂറപ്പത്ത് ലൈനിലെ വാടകക്കെട്ടിടത്തിൽ പ്രവർത്തിച്ചിരുന്ന ഈ കേന്ദ്രത്തിൽ എത്തിയത്. തുടർന്ന് പണം നൽകുന്നതുമായി ബന്ധപ്പെട്ട് അവിടെയുണ്ടായിരുന്നവരുമായി രൂക്ഷമായ വാക്കുതർക്കം ഉണ്ടാവുകയും ഇത് സംഘർഷത്തിൽ കലാശിക്കുകയുമായിരുന്നു.

​കേന്ദ്രത്തിന്റെ നടത്തിപ്പുകാരായ അസം, ഒഡീഷ സ്വദേശികളടങ്ങുന്ന സംഘം ചേർന്ന് ധൻപതി നായകനെയും സുഹൃത്തുക്കളെയും മാരകമായി മർദ്ദിക്കുകയായിരുന്നു. തലയ്ക്ക് ഗുരുതരമായി പരിക്കേറ്റ ധൻപതി നായകിനെ ഉടൻ തൃശ്ശൂർ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചെങ്കിലും, തീവ്രപരിചരണ വിഭാഗത്തിൽ ചികിത്സയിലിരിക്കെ ഇന്ന് രാവിലെ അദ്ദേഹം മരണത്തിന് കീഴടങ്ങി. സംഭവത്തിൽ പരിക്കേറ്റ മക്കറ മാജി ആശുപത്രിയിൽ ചികിത്സ തേടിയ ശേഷം ഡിസ്ചാർജ് ചെയ്യപ്പെട്ടു.

​ആറ് പേർ പിടിയിൽ; പ്രധാന പ്രതി ഒളിവിൽ

വിവരമറിഞ്ഞ് സ്ഥലത്തെത്തിയ പോലീസ് സംഭവവുമായി ബന്ധപ്പെട്ട് നാല് സ്ത്രീകളെയും രണ്ട് പുരുഷന്മാരെയും കസ്റ്റഡിയിലെടുത്തു. മോഹന്തി നായക്, മസുമ, നോബി ഹുസൈൻ, റുബീന ബീഗം, നസ്രിൻ അക്താര, മച്ചാനി കാത്തൂൻ എന്നിവരാണ് പിടിയിലായത്. സംഘത്തിലെ മറ്റൊരാളായ ബിജു നായക് ഒളിവിൽ പോയിരിക്കുകയാണ്. ഇയാൾക്കായുള്ള തിരച്ചിൽ പോലീസ് ഊർജ്ജിതമാക്കിയിട്ടുണ്ട്.

​പിടിയിലാകാതെ രഹസ്യ പ്രവർത്തനം

ഏഴുമാസം മുൻപാണ് ഈ സംഘം കൂറപ്പത്ത് ലൈനിലെ വീട് വാടകയ്ക്കെടുത്ത് ഒഡീഷ, അസം സ്വദേശികളെ എത്തിച്ച് രഹസ്യമായി പെൺവാണിഭം നടത്തിവന്നത്. ഫ്ലാറ്റുകളും വീടുകളും നിറഞ്ഞ തിരക്കേറിയ പ്രദേശമായിരുന്നിട്ടും, ആരുടെയും ശ്രദ്ധയിൽപ്പെടാതിരിക്കാൻ വീടിന്റെ പിൻഭാഗത്തുള്ള ചെറിയ ഗേറ്റ് വഴിയായിരുന്നു ഇടപാടുകാരെ ഇവർ അകത്തേക്ക് പ്രവേശിപ്പിച്ചിരുന്നത്. മറ്റ് സംസ്ഥാനങ്ങളിൽ നിന്നുള്ള തൊഴിലാളികളെ മാത്രമാണ് ഇവർ പ്രധാനമായും ലക്ഷ്യമിട്ടിരുന്നതെന്ന് അന്വേഷണത്തിൽ വ്യക്തമായിട്ടുണ്ട്. നഗരമധ്യത്തിൽ ഇത്രയും കാലം ഇത്തരം ഒരു കേന്ദ്രം രഹസ്യമായി പ്രവർത്തിച്ചിരുന്നത് നാട്ടുകാർക്കിടയിൽ വലിയ ഞെട്ടലാണ് ഉണ്ടാക്കിയിരിക്കുന്നത്.