വിലങ്ങാട് അതീവ ജാഗ്രത; ഉരുൾപൊട്ടൽ ഭീഷണി: ജനങ്ങളെ അടിയന്തരമായി മാറ്റിപ്പാർപ്പിക്കാൻ കലക്ടറുടെ ഉത്തരവ്

 

​വിലങ്ങാട്: മലയോര മേഖലയിൽ റെഡ് അലേർട്ട് തുടരുന്ന പശ്ചാത്തലത്തിൽ വടകര താലൂക്കിലെ വിലങ്ങാട് ഉൾപ്പെടെയുള്ള പ്രദേശങ്ങളിൽ അതീവ ജാഗ്രതാ നിർദ്ദേശം. ഉരുൾപൊട്ടലിനും മണ്ണിടിച്ചിലിനും ശക്തമായ സാധ്യതയുണ്ടെന്ന റിപ്പോർട്ടുകളെ തുടർന്ന് അപകട മേഖലകളിലെ ജനങ്ങളെ ഉടൻ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിക്കാൻ ജില്ലാ ദുരന്ത നിവാരണ അതോറിറ്റി ചെയർപേഴ്‌സൺ കൂടിയായ ജില്ലാ കലക്ടർ എം.എസ് മാധവിക്കുട്ടി ഉത്തരവിട്ടു.

​വിലങ്ങാട്, വാളൂക്ക്, മലയങ്ങാട്, ഉരുട്ടി, പന്നിയേരി തുടങ്ങിയ പ്രദേശങ്ങളിലാണ് നിലവിൽ കടുത്ത ഭീഷണിയുള്ളത്. ഈ മേഖലകളിലെ പുഴയോരങ്ങളിലും, കുത്തനെയുള്ള ചരിവുകളിലും, മുൻപ് ഉരുൾപൊട്ടലുണ്ടായ സ്ഥലങ്ങൾക്ക് സമീപവും താമസിക്കുന്ന മുഴുവൻ കുടുംബങ്ങളെയും അടിയന്തരമായി മാറ്റാനാണ് നിർദ്ദേശം.

​ആർ.ഡി.ഒയ്ക്ക് ഏകോപന ചുമതല; ദുരിതാശ്വാസ ക്യാമ്പുകൾ ഉടൻ തുറക്കും

​ജനങ്ങളെ മാറ്റിപ്പാർപ്പിക്കുന്ന നടപടികളും ക്യാമ്പുകളുടെ പ്രവർത്തനങ്ങളും ഏകോപിപ്പിക്കുന്നതിനായി വടകര ആർ.ഡി.ഒയെ നോഡൽ ഓഫീസറായും വടകര തഹസിൽദാരെ അസിസ്റ്റന്റ് നോഡൽ ഓഫീസറായും ചുമതലപ്പെടുത്തിയിട്ടുണ്ട്.

​വാണിമേൽ, നരിപ്പറ്റ ഗ്രാമപഞ്ചായത്ത് അധികൃതർ വടകര തഹസിൽദാർക്കൊപ്പം ചേർന്ന് പ്രദേശത്തെ സുരക്ഷിതമായ സ്കൂളുകളോ മറ്റ് പൊതു കെട്ടിടങ്ങളോ കണ്ടെത്തി ക്യാമ്പുകൾ ഉടൻ സജ്ജമാക്കാൻ കലക്ടർ നിർദ്ദേശിച്ചു. ക്യാമ്പുകളിൽ കൃത്യമായ കുടിവെള്ളം, ഭക്ഷണം, വൈദ്യുതി, ശുചിമുറി സൗകര്യങ്ങൾ എന്നിവയ്ക്ക് പുറമെ മെഡിക്കൽ സഹായവും ഉറപ്പുവരുത്തും. ഇതിനായി പ്രാഥമികാരോഗ്യ കേന്ദ്രങ്ങളിലെ മെഡിക്കൽ ടീമുകൾ ക്യാമ്പുകളിൽ നേരിട്ടെത്തി പരിശോധന നടത്തും.

​രാത്രിയാത്രയ്ക്ക് നിരോധനം; പൊലീസ് കാവൽ ഏർപ്പെടുത്തും

​അപകട മേഖലകളിൽ നിന്നുള്ള ഒഴിപ്പിക്കൽ നടപടികൾ സുഗമമാക്കാനും, ആളുകൾ ഒഴിഞ്ഞുപോവുന്ന വീടുകൾക്കും ദുരിതാശ്വാസ ക്യാമ്പുകൾക്കും സുരക്ഷ നൽകാനും കോഴിക്കോട് റൂറൽ ജില്ലാ പൊലീസ് മേധാവിക്ക് നിർദ്ദേശം നൽകിയിട്ടുണ്ട്.

​പ്രത്യേക നിയന്ത്രണങ്ങൾ:

  ​വിലങ്ങാട് മേഖലയിലെ മലയോര റോഡുകളിലൂടെ രാത്രി 7 മണി മുതൽ രാവിലെ 6 മണി വരെ അടിയന്തര ആവശ്യങ്ങൾക്കൊഴികെയുള്ള യാത്രകൾ പൂർണ്ണമായി നിരോധിച്ചു.​അപകട മേഖലകളിലുള്ളവർ അധികൃതരുടെ നിർദേശങ്ങളോട് പൂർണ്ണമായി സഹകരിക്കണം.​വ്യാജ വാർത്തകൾ പ്രചരിപ്പിക്കരുത്; ഔദ്യോഗിക മുന്നറിയിപ്പുകൾ മാത്രം പാലിക്കുക.

​ഉത്തരവ് ലംഘിക്കുകയോ ജനങ്ങളെ ഒഴിപ്പിക്കുന്നതുൾപ്പെടെയുള്ള ദുരന്തനിവാരണ പ്രവർത്തനങ്ങൾക്ക് തടസ്സം നിൽക്കുകയോ ചെയ്യുന്നവർക്കെതിരെ 2005-ലെ ദുരന്തനിവാരണ നിയമത്തിലെ സെക്ഷൻ 51 മുതൽ 60 വരെയുള്ള വകുപ്പുകൾ പ്രകാരം കർശനമായ നിയമനടപടികൾ സ്വീകരിക്കുമെന്നും ജില്ലാ കലക്ടർ അറിയിച്ചു.