പേരാമ്പ്രയിൽ ; ഓടിക്കൊണ്ടിരുന്ന സ്‌കൂട്ടറിൽ നിന്ന് യുവാവിന് പാമ്പുകടിയേറ്റു

 

പേരാമ്പ്ര: ഓടിക്കൊണ്ടിരുന്ന സ്‌കൂട്ടറിൽ നിന്ന് യുവാവിന് പെരുമ്പാമ്പിന്റെ കടിയേറ്റു. പേരാമ്പ്ര സ്വദേശിയും വ്യാപാരിയുമായ ഫിറോസിനാണ് കടിയേറ്റത്. ഇന്ന് രാവിലെയായിരുന്നു അപൂർവ്വമായ ഈ സംഭവം.

​കുട്ടികളെ മദ്രസയിൽ കൊണ്ടുവിട്ട് തിരികെ വീട്ടിലേക്ക് വരുന്നതിനിടെയാണ് ഫിറോസിന് കൈക്ക് അസ്വസ്ഥത അനുഭവപ്പെട്ടത്. ഉടൻ തന്നെ സ്‌കൂട്ടർ റോഡരികിൽ നിർത്തി പരിശോധിച്ചപ്പോഴാണ് തന്റെ കൈയിൽ പെരുമ്പാമ്പിന്റെ കുഞ്ഞ് കടിച്ചുപിടിച്ചിരിക്കുന്നത് ഫിറോസ് കാണുന്നത്.

​ഉടൻ തന്നെ ഫിറോസിനെ പേരാമ്പ്ര താലൂക്ക് ആശുപത്രിയിൽ എത്തിച്ച് അടിയന്തര ചികിത്സ ലഭ്യമാക്കി. പാമ്പ് വിഷമില്ലാത്ത ഇനത്തിൽപ്പെട്ടതായതിനാൽ ആശങ്കപ്പെടാനില്ലെന്നും ഫിറോസ് അപകടനില തരണം ചെയ്തതായും ആശുപത്രി അധികൃതർ അറിയിച്ചു.

​സ്‌കൂട്ടറിന്റെ ഭാഗങ്ങളിൽ ഒളിച്ചിരുന്ന പാമ്പ് യാത്രയ്ക്കിടയിൽ പുറത്തേക്ക് വന്നതാകാം എന്ന് കരുതുന്നു. ഓടുന്ന വാഹനത്തിലിരുന്ന് പാമ്പിന്റെ കടിയേറ്റ സംഭവം നാട്ടുകാരിലും കൗതുകവും ആശങ്കയും പരത്തിയിട്ടുണ്ട്. വാഹനങ്ങൾ ഉപയോഗിക്കുന്നവർ ഇത്തരം കാര്യങ്ങളിൽ കൂടുതൽ ശ്രദ്ധ പുലർത്തണമെന്ന് നാട്ടുകാർ മുന്നറിയിപ്പ് നൽകുന്നു.