​ചോരവാർന്നുകിടന്ന യുവാക്കൾക്ക് കാവലായി ബസ് ജീവനക്കാർ; ദൃക്സാക്ഷികളുടെ നിസ്സംഗത കാരണം ആശുപത്രിയിലെത്തിക്കാൻ വൈകിയെന്ന് ആക്ഷേപം; ഒരാൾ മരിച്ചു

 

രാജകുമാരി: ഇടുക്കി പൂപ്പാറ ഭാഗത്തേക്ക് സഞ്ചരിക്കുകയായിരുന്ന മൂന്ന് യുവാക്കൾ ബൈക്കപകടത്തിൽപ്പെട്ടു. ഗുരുതരമായി പരിക്കേറ്റ യുവാക്കളെ ആശുപത്രിയിലെത്തിക്കാൻ സേനാപതി ബസ് ജീവനക്കാർ കാണിച്ച മാതൃക പ്രശംസ പിടിച്ചുപറ്റുമ്പോഴും, അപകടസ്ഥലത്ത് തടിച്ചുകൂടിയവരുടെ നിസ്സംഗതയ്ക്കെതിരെ വ്യാപക പ്രതിഷേധം ഉയരുന്നു. അപകടത്തിൽപ്പെട്ട പൂപ്പാറ സ്വദേശി അബ്ദുൾ റഹ്മാൻ (22) മരണപ്പെട്ടു.

​സംഭവദിവസം അപകടസ്ഥലത്ത് ജനം തിങ്ങിനിറഞ്ഞതോടെ ഗതാഗതം തടസ്സപ്പെട്ടിരുന്നു. ഈ സമയം ഇതുവഴി യാത്രക്കാരുമായി വന്ന അടിമാലി - സേനാപതി ബസ് ബ്ലോക്കിൽ കുടുങ്ങി. കാര്യമന്വേഷിച്ചിറങ്ങിയ ബസ് ഡ്രൈവർ സുധീഷും കണ്ടക്ടർ ബിനോയും കണ്ടത് രക്തത്തിൽ കുളിച്ചുകിടക്കുന്ന യുവാക്കളെയാണ്. ആംബുലൻസ് വിളിച്ചിട്ടുണ്ടെന്നായിരുന്നു അവിടെ കൂടിയവരുടെ മറുപടി. എന്നാൽ സമയം കളയുന്നത് യുവാക്കളുടെ ജീവൻ അപകടത്തിലാക്കുമെന്ന് തിരിച്ചറിഞ്ഞ ജീവനക്കാർ, യാത്രക്കാരുടെ അനുവാദത്തോടെ പരിക്കേറ്റവരെ ബസ്സിലേക്ക് കയറ്റി.

​ആ സമയത്ത് അവിടെ കൂടിനിന്നിരുന്നവരിൽ ഒരാൾ പോലും പരിക്കേറ്റവരെ ബസ്സിലേക്ക് മാറ്റാൻ സഹായിച്ചില്ല എന്നത് വേദനിപ്പിക്കുന്ന സത്യമായി അവശേഷിക്കുന്നു. യുവാക്കളിലൊരാൾ ചോര ഛർദ്ദിക്കുന്ന അവസ്ഥയിലായിരുന്നു. സമയം ഒട്ടും പാഴാക്കാതെ ഡ്രൈവർ സുധീഷ് ബസ് രാജകുമാരിയിലെ സ്വകാര്യ ആശുപത്രിയിലേക്ക് കുതിച്ചു. വഴിമധ്യേ ആംബുലൻസ് കണ്ടെങ്കിലും, സമയം വൈകുമെന്നതുകൊണ്ട് ബസ് നിർത്താതെ ആശുപത്രിയിലെത്തിക്കുകയായിരുന്നു. എങ്കിലും അബ്ദുൾ റഹ്മാന്റെ ജീവൻ രക്ഷിക്കാനായില്ല. അപകടം നടന്നയുടൻ ആശുപത്രിയിൽ എത്തിച്ചിരുന്നെങ്കിൽ ഒരുപക്ഷേ ആ യുവാവിന്റെ ജീവൻ നഷ്ടപ്പെടില്ലായിരുന്നു എന്ന് ദൃക്സാക്ഷികൾ പറയുന്നു.

​ബൈക്കിലുണ്ടായിരുന്ന വിശ്വാ (25) ഇപ്പോഴും തീവ്രപരിചരണ വിഭാഗത്തിൽ ചികിത്സയിലാണ്. കൂടെയുണ്ടായിരുന്ന ആൽബിൻ (22) നിസാര പരിക്കുകളോടെ രക്ഷപ്പെട്ടു.

​മൊബൈലിൽ പകർത്തുന്നതിലോ ‘ഹോബി’; പ്രതിഷേധം ശക്തം

​അപകടത്തിൽപ്പെടുന്നവരെ സഹായിക്കുന്നതിന് പകരം മൊബൈൽ ഫോണിൽ ദൃശ്യങ്ങൾ പകർത്തി സോഷ്യൽ മീഡിയയിൽ പ്രചരിപ്പിക്കുന്ന ചിലരുടെ പ്രവണതയ്ക്കെതിരെയും വലിയ വിമർശനമാണ് ഉയരുന്നത്. സ്വന്തം കുടുംബത്തിലോ തങ്ങൾക്കോ ഇത്തരമൊരു ദുരവസ്ഥ വരുമ്പോൾ മാത്രമേ ഇത്തരം പ്രവർത്തികളുടെ ഗൗരവം പലരും മനസ്സിലാക്കൂ എന്ന് നാട്ടുകാർ ചൂണ്ടിക്കാട്ടുന്നു. യുവാക്കളെ കൃത്യസമയത്ത് ആശുപത്രിയിലെത്തിക്കാൻ ധൈര്യം കാട്ടിയ ബസ് ജീവനക്കാരുടെ നടപടിയെ പുകഴ്ത്തി നിരവധിപ്പേരാണ് രംഗത്തെത്തുന്നത്