വയനാട്ടിൽ വയോധികയെ കഴുത്തിൽ വള്ളി ചുറ്റി കൊലപ്പെടുത്തി; പ്രതിയായ കൗമാരക്കാരൻ പിടിയിൽ
കമ്പളക്കാട്: കോട്ടത്തറ വൈപ്പടിയിൽ തനിച്ചുതാമസിച്ചിരുന്ന വയോധികയെ കൊലപ്പെടുത്തിയ കേസിൽ നിയമവുമായി കലഹിക്കുന്ന കൗമാരക്കാരൻ പിടിയിലായി. വൈപ്പടി കുത്തിനി വീട്ടിൽ പാത്തു (85)വിനെ കൊലപ്പെടുത്തിയ കേസിലാണ് പ്രതിയെ പോലീസ് കസ്റ്റഡിയിലെടുത്ത് ജുവനൈൽ ജസ്റ്റിസ് ബോർഡിന് മുന്നിൽ ഹാജരാക്കിയത്. പണം ആവശ്യപ്പെട്ടപ്പോൾ നൽകാൻ വിസമ്മതിച്ചതിലുള്ള വിരോധമാണ് ക്രൂരമായ കൊലപാതകത്തിൽ കലാശിച്ചതെന്ന് അന്വേഷണത്തിൽ വ്യക്തമായി.
കഴിഞ്ഞ മെയ് 24-ന് വൈകീട്ടാണ് പാത്തുവിനെ വീടിനുള്ളിലെ കിടപ്പുമുറിയിൽ മരിച്ച നിലയിൽ കണ്ടെത്തിയത്. തുടർന്ന് മൃതദേഹം മാനന്തവാടി മെഡിക്കൽ കോളേജ് ആശുപത്രിയിൽ പോസ്റ്റ്മോർട്ടത്തിന് വിധേയമാക്കിയപ്പോഴാണ് മരണം കൊലപാതകമാണെന്ന് സ്ഥിരീകരിച്ചത്. പാത്തുവിന്റെ കഴുത്തിലെ എല്ലുകൾ ഒടിഞ്ഞ നിലയിലും, ശരീരത്തിന്റെ പല ഭാഗങ്ങളിലും മുറിവുകളും, വാരിയെല്ലുകൾക്ക് പൊട്ടലും സംഭവിച്ചിരുന്നു. കഴുത്തിൽ വള്ളി ചുറ്റി ശ്വാസം മുട്ടിച്ചാണ് കൊലപാതകം നടത്തിയത്.
തുടർച്ചയായ കുറ്റകൃത്യങ്ങൾ:
പ്രദേശത്ത് നിരന്തരം ശല്യക്കാരനായി അറിയപ്പെടുന്നയാളാണ് പിടിയിലായ കുട്ടി. മോഷണം, സ്ത്രീകളെ ഉപദ്രവിക്കൽ, പണം ആവശ്യപ്പെട്ട് പ്രായമായവരെ ഭീഷണിപ്പെടുത്തൽ തുടങ്ങിയ നിരവധി പരാതികൾ ഇയാൾക്കെതിരെ മുൻപും ഉയർന്നിരുന്നു. ഇയാളുടെ ശല്യം സഹിക്കവയ്യാതെ നാട്ടുകാർ നേരത്തെ തന്നെ പോലീസിൽ പരാതി നൽകിയിരുന്നു. 2025 ഫെബ്രുവരിയിലും 2026 ജനുവരിയിലുമായി ഇയാൾക്കെതിരെ പോലീസ് ജുവനൈൽ ജസ്റ്റിസ് ബോർഡ് മുമ്പാകെ രണ്ട് തവണ റിപ്പോർട്ടുകൾ സമർപ്പിച്ചിട്ടുള്ളതാണ്.
ശാസ്ത്രീയ അന്വേഷണം:
ആദ്യം പ്രതിയെക്കുറിച്ച് ഒരു സൂചനയും ലഭിക്കാതിരുന്ന കേസിൽ, ജില്ലാ പോലീസ് മേധാവി അരുൺ കെ. പവിത്രന്റെ നിർദ്ദേശപ്രകാരം കൽപ്പറ്റ ഡി.വൈ.എസ്.പി അഷ്റഫ് തേങ്ങലക്കണ്ടിയുടെ നേതൃത്വത്തിൽ പ്രത്യേക അന്വേഷണ സംഘം രൂപീകരിക്കുകയായിരുന്നു. ഫിംഗർ പ്രിന്റ്, ഡോഗ് സ്ക്വാഡ് എന്നിവയുടെ സഹായത്തോടെ നടത്തിയ ശാസ്ത്രീയമായ അന്വേഷണത്തിനൊടുവിലാണ് പ്രതി കുട്ടിയിലേക്ക് അന്വേഷണം എത്തിയത്.
അന്വേഷണ സംഘം:
ഡി.വൈ.എസ്.പി അഷ്റഫ് തേങ്ങലക്കണ്ടിയെ കൂടാതെ ഇൻസ്പെക്ടർമാരായ അനിൽകുമാർ, പി.വി. സജീവ്, ടി.പി. രാജേഷ്, സബ് ഇൻസ്പെക്ടർമാരായ എൻ.വി. ഹരീഷ്കുമാർ, എൻ. വിപിൻ, ഇ.കെ. രമ്യ, എ.എസ്.ഐ ബിജു വർഗീസ്, സി.പി.ഒമാരായ ഷാലു ഫ്രാൻസിസ്, കെ.കെ. വിപിൻ, മുഹമ്മദ് ഷമീർ, എം.എ. ശിഹാബ്, പി. നിഷാദ്, ഇ.എസ്. ശ്രീജേഷ്, പി.ബി. അജിത്, ടി.ആർ. രജീഷ് എന്നിവരടങ്ങിയ സംഘമാണ് കേസ് തെളിയിച്ചത്.
Comments
Post a Comment