പേരാമ്പ്രയിൽ നടുക്കം; വർക്ക്ഷോപ്പിന് നേരെ സ്ഫോടകവസ്തു എറിഞ്ഞു; വൻ ദുരന്തം ഒഴിവായി
പേരാമ്പ്ര: പേരാമ്പ്ര കൈതക്കലിലെ വർക്ക്ഷോപ്പിന് നേരെ അജ്ഞാതൻ സ്ഫോടകവസ്തു എറിഞ്ഞു. ഇന്ന് വൈകുന്നേരം ആറ് മണിയോടെയാണ് കൈതക്കലിലെ 'റിനോ ഗാരേജ് & സ്പെയർ' എന്ന സ്ഥാപനത്തിന് നേരെ ആക്രമണമുണ്ടായത്. സ്ഫോടനത്തിൽ ആളപായമില്ലാത്തത് വലിയ ആശ്വാസമായി.
ബൈക്കിലെത്തിയ ഒരാൾ കടയിലേക്ക് സ്ഫോടകവസ്തു എറിയുകയായിരുന്നുവെന്ന് കടയുടമ പറഞ്ഞു. സർവീസിനായി നിർത്തിയിട്ട വാഹനങ്ങൾക്കിടയിലേക്ക് വീണ സ്ഫോടകവസ്തു വലിയ ശബ്ദത്തോടെയും പുകയോടെയും പൊട്ടിത്തെറിക്കുകയായിരുന്നു. ഈ സമയം കടയിൽ ജോലിയിലുണ്ടായിരുന്ന അനിൽകുമാറിന്റെയും സൗരവിന്റെയും തൊട്ടടുത്താണ് സ്ഫോടകവസ്തു പതിച്ചത്. ഭാഗ്യവശാൽ അനിൽകുമാറിന് പരിക്കേറ്റില്ല. സ്ഫോടനത്തെ തുടർന്ന് തീപിടുത്തം ഉണ്ടാവാതിരുന്നതിനാൽ വലിയൊരു ദുരന്തമാണ് ഒഴിവായത്.
പ്രകോപനമായത് വാക്കുതർക്കം?
സ്ഥാപനത്തിൽ സർവീസിന് നൽകിയ സ്കൂട്ടർ തിരികെ ലഭിക്കാൻ വൈകിയതുമായി ബന്ധപ്പെട്ട് ഇന്ന് പകൽ ഒരാൾ കടയുടമയുമായി വാക്കേറ്റം നടത്തിയിരുന്നു. ഈ വ്യക്തിയാണോ ആക്രമണത്തിന് പിന്നിലെന്ന് സംശയിക്കുന്നതായി ഉടമ പൊലീസിന് നൽകിയ മൊഴിയിൽ പറയുന്നു.
സിസിടിവി ദൃശ്യങ്ങൾ നിർണ്ണായകം:
സ്ഫോടനം നടക്കുന്നതിന്റെയും പുക ഉയരുന്നതിന്റെയും ദൃശ്യങ്ങൾ കടയിലെ സിസിടിവിയിൽ വ്യക്തമായി പതിഞ്ഞിട്ടുണ്ട്. വൻ ശബ്ദം കേട്ട് പരിസരവാസികൾ ഓടിക്കൂടിയെങ്കിലും അപ്പോഴേക്കും അക്രമി സ്ഥലത്തുനിന്ന് രക്ഷപ്പെട്ടിരുന്നു. വിവരമറിഞ്ഞ് പേരാമ്പ്ര പോലീസ് ഉടൻ തന്നെ സംഭവസ്ഥലത്തെത്തി പരിശോധന നടത്തി. സിസിടിവി ദൃശ്യങ്ങൾ കേന്ദ്രീകരിച്ച് അന്വേഷണം ഊർജ്ജിതമാക്കിയതായി പോലീസ് അറിയിച്ചു.
Comments
Post a Comment