മലയോരത്തിന്റെ സ്വന്തം സർവീസ് ആയിരുന്ന; തലയാട് - കൂരാച്ചുണ്ട്- കായണ്ണ-- പേരാമ്പ്ര വഴി കടന്നുപോകുന്ന താമരശ്ശേരി - തൊട്ടിൽപ്പാലം- മാനന്തവാടി കെ.എസ്.ആർ.ടി.സി ബസ് തിരികെ കൊണ്ടുവരണം; വി.ടി സൂരജ് എം.എൽ.എയ്ക്ക് നിവേദനം നൽകി

 

കൂരാച്ചുണ്ട്: കോവിഡ് കാലത്ത് നിർത്തലാക്കിയതും മലയോര മേഖലയ്ക്ക് ഏറെ ഉപകാരപ്രദവുമായിരുന്ന താമരശ്ശേരി - തൊട്ടിൽപ്പാലം കെ.എസ്.ആർ.ടി.സി ബസ് സർവീസ് അടിയന്തരമായി പുനഃസ്ഥാപിക്കണമെന്ന് ഡി.കെ.ടി.എഫ് (ഡെമോക്രാറ്റിക് കെ.എസ്.ആർ.ടി.സി ട്രാൻസ്പോർട്ട് ഫെഡറേഷൻ) ബാലുശ്ശേരി നിയോജക മണ്ഡലം കമ്മിറ്റി ആവശ്യപ്പെട്ടു. ഇത് സംബന്ധിച്ച് കമ്മിറ്റി ഭാരവാഹികൾ ബാലുശ്ശേരി എം.എൽ.എ വി.ടി. സൂരജിന് നിവേദനം നൽകി.

​മലയോരത്തിന്റെ സ്വന്തം സർവീസ്

​   തൊട്ടിൽപ്പാലം ഡിപ്പോയിൽ നിന്ന് മുൻപ് ഓപ്പറേറ്റ് ചെയ്തിരുന്ന ഉച്ചയ്ക്ക് 14.10-ന്റെ (02:10 PM) താമരശ്ശേരി ഷെഡ്യൂൾ ബസ്സാണ് കോവിഡ് പ്രതിസന്ധിയെത്തുടർന്ന് സർവീസ് നിർത്തിവെച്ചത്. മാനന്തവാടിയിൽ നിന്ന് പുറപ്പെട്ട് തൊട്ടിൽപ്പാലം - പേരാമ്പ്ര - കായണ്ണ - കൂരാച്ചുണ്ട് - തലയാട് - എസ്റ്റേറ്റ് മുക്ക് - പൂനൂർ വഴി താമരശ്ശേരിയിലേക്കും, ഇതേ റൂട്ടിലൂടെ തിരിച്ചും സർവീസ് നടത്തിയിരുന്ന ഈ ബസ് കർഷകർക്കും സാധാരണക്കാരായ മലയോരവാസികൾക്കും വലിയൊരു ആശ്വാസമായിരുന്നു.

​യാത്രക്കാർ കുറവുള്ള റൂട്ടുകളെപ്പോലെയല്ല, മലയോര മേഖലയിൽ വലിയ ഉണർവ് സൃഷ്ടിച്ചിരുന്ന ഈ സർവീസിന് കെ.എസ്.ആർ.ടി.സിക്ക് മികച്ച രീതിയിൽ കെഎസ്ആർടിസി കളക്ഷൻ ലഭിച്ചിരുന്നതുമാണ്. എന്നാൽ കോവിഡ് നിയന്ത്രണങ്ങൾക്ക് ശേഷം മറ്റ് സർവീസുകൾ പലതും പുനരാരംഭിച്ചെങ്കിലും മലയോരത്തിന്റെ ഈ പ്രധാന റൂട്ടിനെ അധികൃതർ അവഗണിക്കുകയായിരുന്നു.

​യാത്രാക്ലേശത്തിൽ ജനങ്ങൾ; എം.എൽ.എയ്ക്ക് നിവേദനം നൽകി

​ബസ് സർവീസ് നിലച്ചതോടെ കായണ്ണ, കൂരാച്ചുണ്ട്, തലയാട് തുടങ്ങിയ മലയോര പ്രദേശങ്ങളിലെ യാത്രാക്ലേശം അതീവ രൂക്ഷമായിരിക്കുകയാണ്. വിദ്യാർത്ഥികളും സ്ഥിരം യാത്രക്കാരും കർഷകരും ഇതുമൂലം ദുരിതത്തിലാണ്. ഈ സാഹചര്യത്തിലാണ് റൂട്ട് എത്രയും വേഗം പുനഃസ്ഥാപിക്കാൻ നടപടി സ്വീകരിക്കണമെന്ന് ആവശ്യപ്പെട്ട് ഡി.കെ.ടി.എഫ് രംഗത്തിറങ്ങിയത്.

​ബാലുശ്ശേരി നിയോജക മണ്ഡലം കമ്മിറ്റിയുടെ നേതൃത്വത്തിൽ എം.എൽ.എ വി.ടി. സൂരജിനെ നേരിൽക്കണ്ടാണ് നിവേദനം സമർപ്പിച്ചത്. മലയോര ജനതയുടെ യാത്രാക്ലേശത്തിന് പരിഹാരം കാണാൻ ഗതാഗത വകുപ്പുമായി ബന്ധപ്പെട്ട് ആവശ്യമായ ഇടപെടലുകൾ നടത്തുമെന്ന് എം.എൽ.എ ഭാരവാഹികൾക്ക് ഉറപ്പുനൽകി.

​നിവേദനം കൈമാറുന്ന ചടങ്ങിൽ ഡി.കെ.ടി.എഫ് നിയോജക മണ്ഡലം പ്രസിഡന്റ് ശശിധരൻ മങ്ങര, ജനറൽ സെക്രട്ടറി കെ.കെ. ദാമോദരൻ, ഭാരവാഹികളായ വി.കെ. സുരേഷ് കുമാർ, എൻ. ചന്ദ്രൻ എന്നിവർ പങ്കെടുത്തു.