സ്വതന്ത്ര നിലപാട് ഉപേക്ഷിച്ചു; കിഫയിൽ ഭിന്നത, ജില്ലാ നേതൃത്വത്തിന്റെ കൂട്ടരാജി
കൂരാച്ചുണ്ട്: പ്രഖ്യാപിത സ്വതന്ത്ര നിലപാടുകളിൽ നിന്ന് വ്യതിചലിച്ചെന്നാരോപിച്ച് കിഫ (KIFA) കോഴിക്കോട് ജില്ലാ കമ്മിറ്റിയിൽ നിന്ന് പ്രസിഡന്റ് ഉൾപ്പെടെയുള്ള ഭാരവാഹികൾ കൂട്ടത്തോടെ രാജിവെച്ചു. കഴിഞ്ഞ നിയമസഭാ തിരഞ്ഞെടുപ്പിൽ സംഘടനയുടെ പ്രഖ്യാപിത സ്വതന്ത്ര സ്വഭാവത്തിന് വിരുദ്ധമായി ഒരു പ്രമുഖ രാഷ്ട്രീയ മുന്നണിയെ പരസ്യമായി പിന്തുണച്ച നടപടിയിൽ പ്രതിഷേധിച്ചാണ് രാജി.
സംഘടനയുടെ രൂപീകരണകാലം മുതൽ പിന്തുടർന്ന് പോന്ന രാഷ്ട്രീയ-മത അതീത നിലപാടുകൾ തള്ളിക്കളഞ്ഞ് മാനേജിംഗ് ബോർഡ് ഏകപക്ഷീയമായി മുന്നണി രാഷ്ട്രീയത്തിന് വിധേയപ്പെട്ടതാണ് ഭിന്നതയ്ക്ക് കാരണമായത്. ഈ നിലപാടിനെതിരെ ജില്ലാ കമ്മിറ്റി ശക്തമായ വിയോജിപ്പ് രേഖപ്പെടുത്തിയിരുന്നെങ്കിലും, നേതൃത്വം തിരുത്താൻ തയ്യാറായില്ലെന്ന് രാജിവെച്ചവർ പത്രസമ്മേളനത്തിൽ ആരോപിച്ചു.
രാജിവെച്ച പ്രമുഖർ:
- മനോജ് കുംബ്ലാനി (ജില്ലാ പ്രസിഡന്റ്)
- ബെന്നി ഇടത്തിൽ (വൈസ് പ്രസിഡന്റ്)
- ജിനേഷ് പുതുകുളങ്ങര (ജോയിന്റ് സെക്രട്ടറി, ചെംബനോട)
- രാജേഷ് ചുവപ്പുങ്കൽ (ട്രഷറർ, കൂരാച്ചുണ്ട്)
കർഷകരുടെ പ്രശ്നങ്ങൾ പരിഹരിക്കാൻ രൂപീകരിച്ച ഒരു സംഘടനയെ ഏതെങ്കിലും മുന്നണിയുടെയോ ജാതി-മത ശക്തികളുടെയോ ചൊൽപ്പടിക്ക് നിർത്തുന്ന പ്രവണത അംഗീകരിക്കാനാവില്ലെന്ന് ഭാരവാഹികൾ വ്യക്തമാക്കി. സംഘടനയുടെ പ്രവർത്തനങ്ങളെ രാഷ്ട്രീയ അടിമത്തത്തിൽ നിന്ന് മോചിപ്പിക്കാനും, ഈ അശ്ലീല പ്രവണതയെ ചെറുക്കാനും എന്തു വിലകൊടുത്തും മുന്നോട്ട് പോകുമെന്നും അവർ കൂട്ടിച്ചേർത്തു
Comments
Post a Comment