കൂരാച്ചുണ്ടിൽ കാട്ടാന ശല്യത്തിന് തടയിടാൻ ജനകീയ കൂട്ടായ്മ; ഇറിഗേഷൻ അപ്രോച്ച് റോഡ് നവീകരിച്ചു

 

​കൂരാച്ചുണ്ട്: വർദ്ധിച്ചുവരുന്ന കാട്ടാന ശല്യത്തിന് പരിഹാരമായി, ഉപയോഗശൂന്യമായി കിടന്ന ഇറിഗേഷൻ അപ്രോച്ച് റോഡ് നാട്ടുകാരുടെ സഹകരണത്തോടെ ഗതാഗത യോഗ്യമാക്കി. മുതുകാട് ഭാഗത്തുനിന്ന് റിസർവോയർ നീന്തിക്കടന്ന് കൂരാച്ചുണ്ട് ഓട്ടപ്പാലം, മണ്ടോപ്പാറ തുടങ്ങിയ ജനവാസ മേഖലകളിലെത്തി കാട്ടാനകൾ വ്യാപകമായി കൃഷിനാശം വരുത്തുന്ന സാഹചര്യത്തിലാണ് ഇത്തരമൊരു നടപടി.

​ഈ റോഡ് നവീകരിക്കുന്നതോടെ വനം വകുപ്പ് ഉദ്യോഗസ്ഥർക്ക് വാഹനത്തിൽ പട്രോളിംഗ് നടത്താനുള്ള സൗകര്യം ഒരുങ്ങും. നേരത്തെ ജലപാതയിലൂടെയുള്ള ബോട്ട് പട്രോളിംഗ് പുനരാരംഭിച്ചതോടെ കാട്ടാനകളുടെ സാമീപ്യം കുറയാൻ തുടങ്ങിയിരുന്നു. ഇതിന് കരുത്ത് പകരുന്നതാണ് പുതിയ റോഡ് നിർമ്മാണം.

​പഞ്ചായത്ത് ഭരണസമിതിയുടെ നേതൃത്വത്തിൽ നടന്ന ജനകീയ കൂട്ടായ്മയിൽ രാഷ്ട്രീയ കക്ഷികളുടെ യുവജന പ്രസ്ഥാനങ്ങൾ, സാമൂഹ്യ സന്നദ്ധ പ്രവർത്തകർ, ദുരന്ത നിവാരണ സേനാംഗങ്ങൾ, ആർ.ആർ.ടി വോളന്റിയർമാർ, തൊഴിലുറപ്പ് തൊഴിലാളികൾ, കുടുംബശ്രീ അംഗങ്ങൾ തുടങ്ങി വലിയൊരു വിഭാഗം ജനങ്ങൾ പങ്കാളികളായി. ജനകീയ കൂട്ടായ്മയുടെ പ്രവർത്തനം പ്രദേശവാസികൾക്കിടയിൽ വലിയ ആശ്വാസമാണ് പകർന്നിരിക്കുന്നത്.