ഷെഡിൽ മധ്യവയസ്കയുടെ മൃതദേഹം കണ്ടെത്തി ;ഒളിവിൽ പോയ പ്രതിക്കായി ഡോഗ് സ്ക്വാഡിന്റെ പരിശോധന; നിഗൂഢത നീക്കാൻ പോലീസ്
കൊയിലാണ്ടി: പൊയിൽക്കാവ് ബീച്ചിന് സമീപം മധ്യവയസ്കയെ വീടിനുള്ളിൽ വെട്ടേറ്റ് മരിച്ച നിലയിൽ കണ്ടെത്തി. നാലുസെന്റ് കോളനിയിലെ കുട്ടിക്കൃഷ്ണന്റെ ഭാര്യ സുധ (52) ആണ് കൊല്ലപ്പെട്ടത്. സംഭവത്തിന് ശേഷം സുധയുടെ ഭർത്താവ് കുട്ടിക്കൃഷ്ണനെ (മരംമുറി കുട്ടിക്കൃഷ്ണൻ) കാണാതായത് കൊലപാതകത്തിൽ ഇയാൾക്കുള്ള പങ്ക് ഉറപ്പിക്കുന്നുവെന്ന് പോലീസ് വ്യക്തമാക്കി.
ഇന്ന് രാവിലെയാണ് സംഭവം പുറംലോകമറിയുന്നത്. വീടിനോട് ചേർന്ന ഷെഡിനുള്ളിൽ രക്തത്തിൽ കുളിച്ചുകിടക്കുന്ന നിലയിലായിരുന്നു മൃതദേഹം. വിവരമറിഞ്ഞ് കൊയിലാണ്ടി പോലീസ് സ്ഥലത്തെത്തി പ്രാഥമിക പരിശോധനകൾ പൂർത്തിയാക്കി. മൃതദേഹത്തിന് സമീപത്തുനിന്ന് കൊലപാതകത്തിന് ഉപയോഗിച്ചതെന്ന് കരുതുന്ന വാക്കത്തി പോലീസ് കണ്ടെടുത്തിട്ടുണ്ട്.
അന്വേഷണം ഊർജ്ജിതം:
കേസിന്റെ ഗൗരവം കണക്കിലെടുത്ത് കോഴിക്കോട് റൂറൽ എസ്.പി മെറിൻ ജോസഫ്, വടകര ഡിവൈ.എസ്.പി കെ. സനിൽകുമാർ, സ്പെഷ്യൽ ബ്രാഞ്ച് ഡിവൈ.എസ്.പി സുനിൽകുമാർ തുടങ്ങിയ ഉന്നത ഉദ്യോഗസ്ഥർ സംഭവസ്ഥലത്തെത്തി സ്ഥിതിഗതികൾ വിലയിരുത്തി. വിരലടയാള വിദഗ്ധരും സയന്റിഫിക് ഉദ്യോഗസ്ഥരും സ്ഥലത്തെത്തി തെളിവുകൾ ശേഖരിച്ചു.
ഡോഗ് സ്ക്വാഡ് നടത്തിയ പരിശോധനയിൽ, സംഭവസ്ഥലത്തുനിന്ന് മണം പിടിച്ച് പോലീസ് നായ ഏകദേശം 500 മീറ്ററോളം ദൂരം ഓടിയ ശേഷം നിന്നു. പ്രതി രക്ഷപ്പെടാൻ ഉപയോഗിച്ച വഴി ഇതായിരിക്കാമെന്നാണ് പോലീസിന്റെ പ്രാഥമിക നിഗമനം. പ്രതിയെ കണ്ടെത്താനായി ഇയാൾ പതിവായി പോകാറുള്ള കള്ളുഷാപ്പുകൾ, സുഹൃത്തുക്കളുടെ വീടുകൾ എന്നിവിടങ്ങൾ കേന്ദ്രീകരിച്ച് പോലീസും നാട്ടുകാരും സംയുക്തമായി തിരച്ചിൽ നടത്തിവരികയാണ്.
പോസ്റ്റ്മോർട്ടത്തിനായി മൃതദേഹം കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റിയിട്ടുണ്ട്.
സഹായം അഭ്യർത്ഥിക്കുന്നു:
പ്രതിയെക്കുറിച്ച് എന്തെങ്കിലും വിവരം ലഭിക്കുന്നവർ താഴെ പറയുന്ന നമ്പറുകളിൽ ഉടൻ തന്നെ പോലീസിനെ അറിയിക്കണമെന്ന് അധികൃതർ അഭ്യർത്ഥിച്ചു.
- കൊയിലാണ്ടി പോലീസ് സ്റ്റേഷൻ: 0496 2620233
- കൊയിലാണ്ടി സി.ഐ: 9497987192
- കോഴിക്കോട് റൂറൽ പോലീസ് കൺട്രോൾ റൂം: 0496 2645600
Comments
Post a Comment